今日係一年一度既中大開放日，不過今年我request左想四點半放工，因為整屋個度真係好多野要攪呀！
先講今日既開放日啦，天氣真好，好清涼，爽！不過就算熱都唔太怕，因為今年BA既大本營係新起既西部教學大樓，全天候室內，good！同上年一樣，有個簽名會，就係呢本新書，大家可買黎睇下支持下啦：
同學們開始派書啦：
等緊主角出場，先係個簽名位置影下相先！
趁仲有時間，跟同事們影下相留念先！
主角出場喇，好似粉絲咁排隊簽名，好攪笑！
呢個係新building入面既lecture theatre，嘩．．．好大好大呀！
呢個係2010先收生既新programme - IBCE，拍得住環球商業學架，我都有份幫少少手呢！
四點半放工後，即刻碌返屋企，因為約左裝修師傅開會！其實呢排我真係好辛苦好忙呀，體力開始不能透支．．．屋企裝修後，因為冇地方住，有時係媽咪度訓，但大多數都係返奶奶個邊度訓，因為青衣媽咪度只能訓梳化．．．但我又要返工，有時返埋PT，咁都要抽時間"及"住個進度，所以一有時間就撲返青衣，個師傅好早就收工，放工最快返到去六點半佢都未必係度，但有時ｄ野真係要係間屋度，面對面講先清楚架麻．．．咁跟住係屋企食完飯坐陣，又要搭車返大圍，總之日日都好頻撲咁過．．．其次就係好多野要整，所以要去睇、去格價、去買．．．但ｄ地方好早就收，好似旺角快富街咁，揀牆紙揀鏡櫃揀燈，再簡單ｄ，好似門鎖、微波爐架、窗簾木架等等，樣樣都好花時間！唉．．．真係好攰好辛苦呀！仲有呀，要報honeymoon呀，曾經諗過自由行，但都冇時間plan，我地宜家都好慘呀，夜晚都冇得上網，所以點有時間plan honeymoon丫，都係跟團算了！
好啦，呻完就講下呢兩日做過ｄ咩關於間屋先，先講尋晚，因為間屋差唔多黐牆紙啦，所以要買燈，不能再拖．．．尋晚放工就去左銅鑼灣，諗住行IKEA＋GOD，但因為就旅行社八點close，所以約左太陽哥哥先睇旅行團；我都唔明白，香港人通常都遲放工架啦，點解ｄ旅行社點可以八點就close架？！我地個日；排隊問左一間，想再問第二間時已經八點要close了，好炆呀！
跟住去實惠睇櫃，呢ｄ薄身企櫃，好岩放係大間旁邊，而太陽哥哥特別偏愛白色系列！我唔抗拒白色，但如果條邊加ｄ野似乎好睇ｄ，唔係就好似太齋！
行完實惠已經八點九，記得elsa講過有間日本野九點半後半價，就過去問下，原來叫東京，仲同旺角食過既夏雪原來同一個集團！得返45分鐘，應該行唔切IKEA，就決定去GOD啦，反正我星期日都會黎銅鑼灣返PT，到時再睇啦！我地去GOD都係睇燈睇櫃咁，呢ｄ照雞蛋燈真係好型呀，一間房一個好冇呢？
呢ｄ口型架都幾好，可用黎遮住個電錶箱！
跟住夠鐘食野啦～～
九點半，勁肚餓，叫左好多魚生同壽司，半價丫麻！
牛舌係我地至愛，雖然冇半價，但都照叫，有串燒同幫您燒兩種：
當然幫您燒係貴ｄ同多ｄ啦～～
以上就係尋日既行程喇！
到今日，放工後碌返屋企同師傅開完會後，就碌出荃灣路得圍睇燈，因為師傅介紹呢度好多燈鋪頭！我地都睇左四五間，真係好多款，但冇買住，要冷靜ｄ諗諗，唔係好易出事架！哈哈～～
睇完燈就係一間好多人食既街邊粥鋪食飯：
我對眼已不能支撐需要戴眼鏡了！
食完飯先九點，我話比太陽哥哥知荃灣廣場好似有IKEA呀，就即刻碌過去睇，點知間IKEA原來執左幾年喇！個度得實惠，咁又睇實惠啦，呢組書檯＋書櫃幾岩我地心水同就到我地間房既間隔，可惜檯面長度唔夠，訂造又貴．．．
一係加張細既駁埋一齊．．．真係要度清楚！
實惠十點close，跟住見JUSCO close十點半，殺埋上去，因為想買架單車比諾諾做生日禮物，佢24/10就開兩歲birthday party啦！其實單車係太陽哥哥提議架，仲指名話要買thomas，我地睇左兩架，一架14吋一架12吋，等我問下表姐先！
突然太陽哥哥同我講：琪琪呀！跟住望前見到一個疑似琪琪既背形，我梗係大叫Maggie Q啦，佢真係拎轉頭喎！又會咁岩撞到真係橋到爆呀，原來佢同emily同契仔軒軒黎左行街，咁有緣梗係要影下相啦！
沒有留言:
張貼留言