今日去左香港國際魔術節2008，我對魔術一向都好有興趣，覺得魔術可以氹到人好開心，同埋冇咩人識，如果識的話就會好特別；但奈何要練到好純熟，的確要花好多時間，加上唔知係咪女仔隻手細隻的關係，我係玩唔到啤牌魔術架，因為我隻手連幅牌都遮唔晒，太易露出破綻啦！
黎到後覺得個會場好小型，廿蚊入場費後，如果睇魔術表演要比一百蚊，玩迷宮要四十蚊；由於個魔術表演唔會劃位，我地怕坐得後就唔抵，所以只諗住玩個迷宮！
入到去唔比影相，以下個ｄ全係偷影；可能我地黎錯了，呢度好多小朋友呀；而個迷宮，見玩完出黎個ｄ都係小朋友，我怕太low b，最終都放棄了！咁有咩做呢？咪係會場入面睇ｄ魔術姐姐做表演，其次入面有十多個小型counter不停咁表演小魔術的！
魔術姐姐的表演有三個，下面係其中一個；一個有尖柱的箱，搵了個小朋友訓係上面，機關一按．．．小朋友完好無缺！
冇事就同魔術姐姐影返張先啦，呢ｄ魔術姐姐有號碼比人投票架，我覺得最右邊橙晚裙個位最靚女，成個公仔咁！
另一個表現係其中一位魔術姐姐訓係箱入面，機關一按．．．個箱分開左一半，但位魔術姐姐又係完好無缺！
之後同太陽哥哥去左睇太空奇兵威Ｅ，冇諗過之前想睇但睇唔到既戲，原來仲未落畫，不過就遠ｄ要去太古城；但我唔知太古城原來有兩間戲院，我去左MCL但原來係UA，所以一來一回遲左十分鐘先入到場呀！
呢套卡通都好得意好好笑，係場內ｄ小朋友太嘈，有個仲坐正係隔離，成日問佢爸爸：點解咁既？咩事呀？佢做咩呀？．．．煩死人！
