2010年1月31日 星期日

2010-01-31(Sun) 韓國滑雪之旅Day 2:江原雪嶺High One滑雪場 (下午實戰篇).餃子火鍋


飯後我地四個細路就繼續我地重點行程 - 實戰,將今朝學既野,搬到真正既滑雪道!呢度唔再係滑雪學校既小斜坡,而係真真正正既滑雪道!


導遊Pauline先教我地擺甫士,被隨團攝影哥哥Simon幫我地影相留念!我同太陽哥哥呢個甫士,咁似影個d婚紗相甫士既?!



粉紅色衫個位就係Pauline啦,佢係我地既導遊,成團人都好鐘意佢架,因為佢真係超nice超好人超盡責,好似佢陪我地滑雪咁;我以前個團既導遊,一離開滑雪學校就閃左去,團友自由活動架啦,大佬,冰天雪地喎,但Pauline係全日咁陪住我地一齊玩,真係好少有呢d咁好既導遊!



威哥同琪琪呢兩張相係Pauline操刀既:




跟住再幫我地影跳跳相~~




咁岩呢個時間開始落雪,相中一點點白色就係雪啦!



琪琪身後個條就係滑雪道啦,望唔到盡頭架,因為真係斜架,就係咁滑落去架啦!我地宜家係山中間(箭咀位置):



呢條係初級滑雪道(AT2),我地就係咁每次由高滑落低處,我一路玩一路跌到飛起呀!




係Gondola影落去,呢條就係我地玩既滑雪道啦!



滑到落去點呢?梗係唔洗自己行返上黎啦,咁斜有排行呀!滑雪道旁邊會有兩種方法比您上返黎,一係輸送帶,就咁企上去就會運返您上山架啦;二係叫T-BAR既物體,佢係一個倒轉左既T咁,用手拉落黎,然後坐上去,類似借力咁坐住咁拉返您上山頂!



不過對snowboard初學者用T-BAR就較高難度喇,因為我地對腳有如同snowboard鎖為一體咁,好難咁借力坐係T-BAR上,所以我同太陽哥哥試過都失敗,都係用返輸送帶上返山;反而琪琪玩ski就好成功咁用T-BAR上返山!



T-BAR究竟係點,可係威哥自拍短片度睇睇:




玩左兩三個鐘,成條滑雪道玩左好似四次,又未至於碌落山既,不過都有跌住跣住咁滑落山,真係好好玩,勁鐘意snowboarding呢個新活動!


懷住唔想走既心情,都要走啦,因為要就返時間合集,我地就坐返Gondola落山!



去到纜車站見到呢個紙牌公仔,即影~~我地真係好鐘意呢度,好鐘意High One呀!We Love High 1!




跟住發覺今日冇咩型相影過,出返室外補影!先幫琪琪~~



打斜影...扮落緊斜!似嗎?哈哈~~



呢張有d似痾屎唔出...




跟住到我~~



琪琪扮埋玩過snowboard!




跟住我同太陽哥哥輪流影跳相!勁呀~~




跟住我地仲一齊跳添,影到都好似從第二個山頭飛過黎咁丫!我覺得影得唔錯,好鐘意呢幾張相,全靠琪琪影得掂!



呢個滑雪場真係又新又大又靚又好滑,或者又咁講,我咁大個女都係第一次滑雪滑到要坐吊車上山玩,真係好唔同,好鐘意!




離開滑雪場後,我地即刻食晚飯,今晚食餃子火鍋,我地仲加料呢(便利店買既蟹柳)!




Pauline真係有點似李珊珊呀~~佢示範點用紫菜夾d飯黎食,我仲即刻推太陽哥哥去試,叫佢餵太陽哥哥!大家都玩得開心,借個老公出黎又有咩所謂呢!



Pauline仲搵威哥做對象表演神秘魔術添~~試問邊個導遊咁親民,安頓完團友食飯仲唔拿拿林自己食,反而成日走黎同團友們與眾同樂?咁親民,難怪個個團友都咁鐘意佢啦!




知道有團友今日生日,Pauline同領隊Hoday仲買左蛋糕同燒酒,一齊舉杯飲勝,黎個mini birthday party!仲叫埋餐廳另一團既香港團友一齊唱歌,所有人一齊又拍手又唱歌,氣氛真係好正呀!


諾諾都分到蛋糕食,睇佢食得幾開心!




夜晚係酒店還滑雪用具時,先發覺有免費上網室!琪琪仲上youtube比thomas諾諾睇,點知段片係講thomas撞車,諾諾一見到thomas跌低左,反應如下:



跟住好快又嘻嘻咁笑返~~



註:還滑雪用具之際,Pauline問細妹聽日仲玩唔玩,玩就會特登租套ski,陪細妹一齊上山玩喎,反正聽日大家都自由活動,一係去滑雪場,一係留係酒店享用設施!琪琪聽到好心動,但一個人又怕羞,就問我同太陽哥哥一唔一齊玩...我地concern緊體力支唔支持到啦,因為怕聽朝對腳會因耐冇做運動而好麻痺,又怕去另一個更難玩既滑雪道會唔會對我地難左d,始終ski同snowboard level唔同...


正當商量緊點好時,媽咪就話:玩啦,唔好諗咁多,聽日我請您地玩!咁遠黎到梗係盡玩,又唔係成日可以黎,唔好晒左d團費,唔係下次想玩又要再比過團費,一齊去啦!


的確,我地唔係住係有雪落既國家,唔係成日有機會去滑雪,既然黎到,就盡玩啦!所以聽日我地又可以玩多次啦,好開心呀!拜託聽朝起身,對腳千祈唔好麻痺呀~~