2007年8月31日 星期五

2007-08-31(Fri) 突如其來下收花 & 毓民私房牛肉麵

今日係突如其來的情況下收到花,好開心,好鐘意,因為係我鐘意的包法,堆埋一齊一個波形咁,而唔係大大紮三角包法,楂又楂得舒服,細細地又唔會攰;仲係我最愛的鬱金香,顏色亦係至愛之一;總之鐘意啦,係我咁大個女收到最鐘意的一紮花呢!

我地仲楂住紮花影左好多攪笑pose相呢!

今晚試左旺角的毓民私房牛肉麵,水準好多一般:麵質一般,但雞翼同牛肉都好好味;鹵肉好味,但豆腐唔好味;埋單一百零一蚊,咁既味道,貴左少少啦!


2007年8月29日 星期三

2007-08-29 (Wed) Free Buffet Dinner @ Shangri-la

今日係靚仔JIMMY SEN請食BUFFET,聽佢講係summer幫OSP手,點知當人工咁出左糧比佢,係意外之財,講真,請BEBE同ESTHER都係理所當然,我諗我都係拉車邊先有份做席上之客!仲有MAGGIE同佢個女,佢個女真係又型又高又靚女呀!

但可惜今日lunch係official lunch,食左野,放工仲好飽,仲有d胃痛添,唔知係咪JIMMY SEN手車...總之去到香格里拉係好唔舒服呀!我咁愛生蠔,今日都係食左三隻,其餘都食好少咋,基本上係相片咁多,好唔抵呀!


2007年8月28日 星期二

2007年8月27日 星期一

2007-08-27 (Mon) 兩套電影

呢個星期看了兩套電影,一套西片,一套泰片,大家都是驚慄片,但要評分,我會揀後者多好多!前者內容唔夠充實,只係為逃避病毒而走黎走去,逃黎逃去,可以講有些少無聊,結局亦草草收場咁;至於後者,成個故事都有前因後果,內容變相豐富不少,加上結局亦令人估唔到,好緊張,又好驚,值得一睇!果然,驚慄片論口碑,都係泰片為首選!勁!



2007年8月26日 星期日

2007-08-26 (Sun) BEN新舖開張

BEN舖頭終於開張啦,我地一行九人北上祝賀佢,花牌當然唔少得,有我地三個個名架,好勁呀,咁大個女第一次咁威送花牌比人!不過由於BEN舖頭趕住開,招牌用唔切太陽哥哥個個LOGO,係大陸做左個;太陽哥哥個個要印紙袋時先有得睇呀!

由於太多人,費事阻住人地開張做生意,我地夜晚先掃貨,先去沙井玩高卡車先!但我好快已掃左一對鞋,哈哈!第一日做生意,唔好講係咪勁鐘意,我覺得點都要幫襯下!

點知去到沙井,有人book左個賽車場,要一個鐘後先有得玩,我地買定飛後就周圍影下相先!




點知等左大半個鐘後,突然落起大雨,仲係勁大;d飛又出門恕不退換,只可簽做一個月內黎玩返,但沙井咁遠,成一個鐘車程,兼且我地係四百蚊包架車,好難約過...誰知有四個貪玩之徒,話只要細返d雨都會玩,咁我地平時玩開通常都玩兩round,佢地就玩晒d飛,剩返一張就平十蚊賣左比人,總算唔洗大蝕d飛啦!未戴頭盔前的頭套,大家覺得似唔似...『避孕套人』?哈哈!


琪琪真係好,唔玩都貼身追訪佢地,幫佢地影相留下回憶,點知有人唔領情,話好嬲唔影喎,唔該佢檢討下啦,人地唔玩,落雨C濕都跟住您地行左一段路上車幫您影相,仲咁態度!哼!不過我今日玩唔到都有d失望,因為我都幾想玩同最緊要今次咁遠黎,係因為呢個場真係算好大好靚...

返到去BEN一早已係小肥羊霸定位設宴款待我地,佢真係好好,自己一個人等位等左大半個鐘,今餐仲係佢埋單呢!埋單成八百幾蚊...d野其實叫多左,尤其是d丸,多到呢...唔係我地班禽獸好似唔洗錢咁,其實呢餐可以平d...真係戥BEN肉赤...

琪琪又玩每人一大頭的影相遊戲啦,今次係第二次啦,又真係幾有意思同幾開心!

出晒名輪盡的琪琪坐定後話隻眼好濛,叫我望下佢眼入面係咪冇左隻隱形眼鏡,點知真係,但佢個身又無,檯又無,最後我竟然係佢張櫈度見到,真係笑死人!我地就即刻用湯匙盛住拎去廁所清洗!

我地一家三口食飯時玩自拍,邊個條脷長d呢?嘻嘻~~

飯後就回BEN舖頭掃貨,我地好似唔洗錢咁,係咁試試試,我就揀左兩對,細妹一對,仲有一對諗住送比太陽媽媽!但費事用左BEN舖頭的現貨阻礙佢做生意,佢遲d會去倉拎比我地!不過真係好抵呀,今朝佢已經話收收我成本價就得(大概價錢三分一),但我識做既,幾fd都係打開門做生意姐,唔好去到咁盡,話晒人地開張,人生大日子,我叫佢比折頭我得啦,最終以半價成交!(拎到鞋先再post相啦!)

係度再次祝BEN生意興隆、大展鴻圖、賺到盤滿砵滿,跟住開分店!




2007年8月25日 星期六

2007-08-25 (Sat) 甜品

呢個係許留山的芒果三重奏,糯米糍好好味,細細粒白色波波好"煙靭",不過冇"饀",淡左少少,價值$35。

"街知巷聞"的糯米糍,想試好耐了,終於試到,價值$12三個,最impressed係幾蚊的小吃,老闆對包裝都一絲不苟,每個糯米糍都有一個盒仔同膠紙盛著,每個盒仔仲係唔同色,分別印有舖頭名同各種味道,肯花成本,真係好認真呀!


M記開心樂園餐的獨家食品,芒果乳酪同Qoo荳奶,芒果乳酪如果有埋果肉會更有質感,荳奶一般;一向冇留意到,今日先發覺原來M記咁多獨家食品!


2007-08-24 (Fri) 細妹PHOTOSHOP的傑作

細妹PHOTOSHOP的傑作:

細妹一向對呢d野好有興趣,唔知係咪真係左撇子的關係,對美術野有興趣,所以佢同太陽哥哥有時都有共同話題架;反之我對呢方面就冇咩興趣,連我個blog的閃閃令banner都係佢幫我整架,有個能幹細妹真係好喇,嘻嘻~~


2007年8月23日 星期四

2007-08-23 (Thu) BEN舖頭的新logo

呢個係BEN舖頭的新logo,攪左個幾月,終於會係今個weekend開張啦!至於個logo,係佢個idea,跟住叫太陽哥哥幫手整的,加上太陽哥哥的建議,就變成咁啦!

我覺得整得幾靚呀,尤其是個鞋扣,整得幾detailed,仲閃一閃咁!不過BEN的手畫稿都幾攪笑,大家可睇下佢的畫畫天份!左邊個個就係啦,左邊係傾的過程出現的idea,成個過程我只是旁觀,但感覺都好神奇咁!

由一個idea,加上設計人的意見及諗法,就整左個咁既logo出黎,而設計人的身份亦很特別,我覺得製作呢家野,某程度上都幾主觀,我覺得咁係靚,但您可能覺得咁係肉酸;設計人係製作過程中,要加入個人元素,但又唔可以冇左原創人的概念!好難呀,我實做唔到,因為我太主觀!


2007年8月21日 星期二

2007-08-22 (Wed) 零晨兩點的宵夜

今日放假,所以尋晚好夜訓,因為終於有時間清理下自己d野!放左咁耐病假,一返返工,好唔慣,係生理時鐘問題,始於做野要用腦,返工後,夜晚好早就好攰,試過十點就要訓覺,攪到我放工後都唔多想出街,我諗過多排會好d!

尋晚知道自己今朝可訓到幾點都得,即刻輕鬆晒!凌晨肚餓仲識歎返杯雪糕,呢種生活真係好,可以變返以前幾個月就好喇!




2007-08-21 (Tue) 朱古力餅乾

女老闆上星期送給office的朱古力餅乾,好似幾高檔咁,共兩層,全是不同的朱古力餅乾款式,幾好味,好想每款都試到一件,可惜office太多人,應該做唔到了...



2007年8月20日 星期一

2007-08-20 (Mon) 物理治療

今日第一次係學校做物理治療,物理治療師教左我點行、點練習、點郁,去盡量減低手術後的還原狀況;其實佢呢度幫唔到好多,最緊要自己喎;我都覺得係,但您叫我行時挨返右邊d,咁右邊咪負荷好大?同埋行路係成隻腳掌掂到地面架麻,我一挨右,左邊的腳趾公同整個左邊部份,係離開地面架,咁點夠力呢?究竟係我隻腳太瘦?定係無肉?...宜家要等星期五返威爾斯醫院見矯形及義肢部醫生,到時試下個新模,用左希望會有改善啦!

今日物理治療師先幫我用超聲波抒援隻腳,因為佢都知我仲未消晒腫;做時都幾舒服,可能有專人幫您按摩咁!

之後就自己控制電力,隻腳比舊野電下電下咁,上面有冰包敷住...但做完後,無咩感覺到,又唔覺舒服左咁...



2007年8月19日 星期日

2007-08-19 (Sun) 軒軒BB

軒軒BB係我細妹的契仔,大家有印象的話,我係四月時同佢影過相的;相隔接近五個月,軒軒BB大個左好多,輪廓出晒黎,加上我又鐘意仔,梗係要玩多幾錢重啦!

今日軒軒媽咪就帶左佢上黎我屋企比我地玩啦,唔係,係探我地之真...嘻嘻!

軒軒BB係一個開心BB,好容易就會笑,只要對住佢叫:『軒軒...軒軒...』佢就會笑架啦!

嘩...好大個口,無牙仔,好得意!

加油!努力撐住呀!


傻豬樣~~

軒軒BB間唔中要小睡,十五分鐘就夠,就會由謝謝地變返精靈仔!佢身長同細妹的攬枕差唔多咋!

同契媽好friend喎!

同契姨媽都ok喎,哈哈!『軒軒,軒軒,望下我啦,望下我啦,我叫您叫到口乾了...』

好嗲喎!呢個係咪...契...契婆婆??關係複雜,諗唔到呀!

跟住我地拎左媽咪隻monchichi同軒軒擺埋一齊,發覺佢地個頭係差唔多大架!

"bu"口水...

呢張"friend過打band"相,係大家一致認為全日最靚的一張,由名攝影師Giv仔操刀架!搭晒膊頭,真係cute到爆呀!

『您地影夠未呀?我好攰,要休息啦!』

跟住我地靈機一觸,同軒軒戴上monchichi頂帽,效果?有目共睹啦,好可愛!

『嘩,monchichi,我幾時先可以有您咁多頭髮呀?』

monchichi:『您好啦喎,帽又比您搶左,仲"lam"我?算點先?再唔收返條脷我告您性騷擾架!』

『我冇力喇,"lum"喇啦,help!』

嘩嘩嘩,食晒成個拳頭!


喂,細路...咦...好多口水呀!

(突然一百八十度轉變)『嘩,影相個件!您好樣衰呀!』


擰"咩"少少頂帽仔,似唔似小飛俠頂羽毛帽呢?

希望軒軒今日唔會比我地玩殘左啦,哈哈!不過,佢今日用左咁多精神陪我地玩(陪您地玩?定比您地玩呀?),我相信佢今晚應該會訓得好"冧"下!哈哈!記得多d上黎探我地呀!