2010年11月30日 星期二

2010-11-30 (Tue) 飛到驚起


收到 Ben 的婚照,呢幾張係我被其他兄弟們拋起的相片,睇得出我個樣好驚囉...梗係啦,當時佢地真係拋到我好高架,仲高過埋backdrop,好有離心力呢!




2010年11月29日 星期一

2010-11-29 (Mon) Cooking Class:冬菇馬蹄魷魚蒸肉餅.蒜蓉粉絲蒸大蚌

Photobucket
Photobucket


今日到我跟媽咪上堂,想學蒸肉餅好耐架啦,因為可放係煲或電飯煲內蒸,咁煮餸時可少一樣餸用鑊,煩少樣麻!



材料:$15半肥瘦梅頭(媽咪自己剁碎, 我整梗係買攪碎算啦!!)、8粒冬菇、四粒馬蹄、兩片魷魚。先醃肉碎,用約半匙糖、一匙粉、多多生抽。



其餘材料切粒,跟住同肉碎撈埋一齊就可拎去蒸架啦!



Photobucket
Photobucket


今日有我勁極鐘意的貝殼類,仲係大蚌,街市唔成日有架!但我返到黎時,媽咪已洗好晒,佢仲話我唔好學呢樣啦,因洗得好辛苦架喎!



調味:鹽、蒜蓉、少少豆粉。



鋪上粉絲就可拎去蒸架啦~~



落d鼓油可以食啦,呢樣餸我超鐘意食架!



Photobucket
Photobucket


今晚都有蒸魚,但我怕買魚,應該好少煮架啦!



Photobucket
Photobucket


2010年11月28日 星期日

2010-11-28 (Sun) Cooking@Home:花膠湯.茄汁蝦.焗雞翼.瑤柱蒸水蛋.翠玉瓜炒什菇

Photobucket
Photobucket



今日係屋企煮飯,因為媽咪都會一齊食,我又要帶飯聽朝返工,加上媽咪認承我可以係度stand by,我有咩唔識可即刻問佢,我就好勇咁決定整四餸一湯!

今日仲去左兩次街市,一次早餐後,一次下午時間諗住買新鮮大蝦,點知冇...


花膠湯:
煲湯排骨$35、粟米紅蘿蔔各兩條、五粒蜜餞、秘製果皮三片、花膠。



焗雞翼:雞翼一打+孜然粉。



翠玉瓜炒什菇:翠肉瓜一條+一堆什菇。



瑤柱蒸水蛋:蛋四隻+瑤柱六粒(熟水浸)。



茄汁蝦:下午落街市個轉冇工而回,因為今日冇大蝦;唯有改用惠康超唔抵"特大虎蝦",係雪格儲貨的最後一盒,唔會再買。



Photobucket
Photobucket

先將食材出水,通常水滾後放入,待水再滾起時,再烚約五分鐘,撈起用生水洗淨+浸住,備用。


菇切條狀,跟住出水,因為水會變黃,菇類要換幾次水。



花膠媽咪一大包買返黎時已經出晒水,再分好一包包咁放入雪格,每次煲湯拎一包用;只要解凍同洗下就得,好方便!



放入約四分三煲水後,大火煲滾,落晒所以材料,花膠除外;待再次滾起後,轉中小火,慢慢滾住咁繼續煲,大約煲兩個鐘啦;跟住先落花膠,再煲個約半個鐘,落鹽,熄火蓋住;食晚飯前再煲返滾就得架啦!



雞翼洗淨抹乾,醃製,我用了多多糖、中中豆粉、少少鹽、兩三圈生抽、少少老抽、一蓋酒,仲有我同媽咪都係第一次試的孜然粉。



翠玉瓜切條備用:



預備薑、蒜蓉、蔥等,切片備用;今日心情好,切下蔥花先。



大蝦解凍後,剪晒d鬚同腳、挑蝦腸唔難,但係最嘔心...跟住用鹽醃下。





Photobucket
Photobucket

休息左個幾鐘,六點三太陽哥哥放工返黎,開始煮飯;最怕煮野食樣樣都要用個鑊,分散投資好d,所以先用煲蒸水蛋;先楂d油上碟,跟住連碟一齊係煲入面,落蓋待水煲滾;發蛋時落鹽,浸好的瑤柱撕好一條條,連浸瑤柱的水倒入,再另加熟水,份量預蒸碟的容量。


水一滾,開蓋,繼續開住火咁倒入蛋汁,即上蓋,待大約兩分鐘,其實會睇到蛋汁開始變淺色咁凝固。



約兩至三分鐘後熄火,千其唔好揭開蓋,放埋一邊由佢自然繼續焗,煮好晒飯就自然食得!


Photobucket
Photobucket


另一邊廂,雞翼用多士爐焗,我冇錢亦冇位放焗爐呀,所以只能運用屋企唯一的多士爐焗雞翼咋;第一次玩,原來每次頂多放到七至八隻雞翼咋,下次會因返個數量買!第一轉用了15+5分鐘,第二轉用了10+5分鐘,+係指反轉再焗。呢個好簡單,吩咐好太陽哥哥幫手就可繼續入廚房煮其他野!


Photobucket
Photobucket

大火落油、薑片蒜片、翠玉瓜,炒至瓜半熟時,再落菇,跟住調味,落左多多蠔油、中中糖、少少鹽,唔夠色可加點老抽。


Photobucket
Photobucket

大火落油、薑片蒜片、大蝦,煎熟兩邊時,跟住調味,落左多多茄汁、多多糖、少少鹽、少少水,最後一路落豆粉水一路炒,炒到岩杰度就成。


Photobucket
Photobucket

水蛋同第二轉雞翼未得,媽咪已忍唔住想食喇!


不如影相先啦~~



水蛋都攪掂啦~~



個湯好甜好正呀,我同媽咪講左,以後煲湯就會自己去佢雪櫃度拎花膠果皮蜜餞,哈哈!



真係食得啦~~



為食媽咪太快,熱親!



好味就比個笑啦~~



今次煮飯寫得好詳細啦,朋友仔唔好再話我啦,其實比起媽咪細妹,我煮得個d都係簡單野;今日自己都好開心,不過最多謝媽咪一路係我身邊,令我好有安全感!佢又陪左我落左兩次街市啦,下午佢想訓覺但又知我想佢係度陪我,佢就唔走,跟住係我張梳化度訓左;媽媽真偉大,I Love You!


Photobucket
Photobucket