2007-05-31 飲下午茶

今日十二點半訓醒，就開電腦，玩玩下聽到出面有聲，一開門，媽咪係度既？佢話做完野返左黎啦，話一陣約左個同事去青衣城買手機，會飲茶，我就話：我又想去！因為係屋企好悶呀！媽咪就話我痴住晒，我就諗起琪琪句"一於死跟"！哈哈！三個人，叫左八個點心，好味道！

今日亦係太陽爸爸生日，今晚一齊食飯慶祝，但太陽哥哥好遲放工，接完我再返大圍，都九點幾，佢地仲未開始，等埋我地，真係勁唔好意思．．．太陽哥哥的哥哥換了架好搶眼的鮮黃色車，成架跑車咁，有Ｄ招搖，唔係咁襯，嘻嘻．．．佢今日食飯情緒好高漲，係咁講野同笑，有Ｄ嘈，太陽哥哥就話因為我係度麻．．．下．．．唔係化？

2007-05-30 覆診之二

今日係出院後第二次覆診，拆紗布後，腳趾腫的程度似乎一樣；醫生話傷口附近都係紅，但勉強都可以，唔使食藥住，除非嚴重過宜家啦；我自己就覺得腳趾公的彎度好轉左，滿意過上一次！

上星期五(五天前)：

今日：　　　　　　　　

但醫生話我腳趾下面個位有ｄ黑，佢就問我以前係咪好少做運動，我話係呀，佢話黑係因為ｄ血管有ｄ萎縮，就要我提早開始郁動下ｄ肌肉，唔好等拆針先，唔係驚過多幾日越來越嚴重。

佢教我係屋企唔好用拐杖行，我就話其實我冇啦，甚至連隻特別鞋都少著左好多，除非要出街；因為隻鞋好高，我行時好辛苦，好似長短腳咁，每行一步，都要成隻腳提起先行到下一步，"咬"晒腰咁，樣衰不特止，仲攪到我個盆骨位都好攰。咁既然已經開始用腳行，點解ｄ血管都唔夠郁動而咁黑呢？

傾吓傾吓先知，原來我平時係屋企行時，因為驚整到傷口同影響骨的癒合，就避開左邊掂地，用晒右邊的力，成隻腳係"挨"晒右邊咁行，左邊一ｄ都冇掂到地；但原來咁行係唔岩，醫生話，我要成隻腳掌平放落地，但唔好曲起腳趾部份，要平住咁放，再平住咁成隻腳掌提起，再行下一步，只要冇曲到腳趾，就唔會影響到骨的癒合架啦！

但可能我已經慣左，行比醫生睇時，都係唔可以每一步都平放，同埋平放時，始終左邊腳掌個傷口位有ｄ痛．．．醫生仲話見我連小腿未放落地都已經慣咗傾咗向右先，叫我要比心機，及早矯正返個行路姿勢，唔係就唔可以跟schedule拆針。我真係要加油喇！

 

至於個盆骨位好攰的問題，醫生話可能隻特別鞋太高，就幫我換了一隻平低的，所以，我今日有新鞋仔著呀！！！

今次好呢隻好型架，包唔會影衰各位朋友，唔信大家睇下，哈哈！

醫生係即刻call另一位醫生上黎幫我睇腳形同開個窿係隻鞋度架，仲係男醫生黎添，佢幫我攪掂後，仲話：呢隻鞋型仔好多喎！我就話：兩隻都好樣衰呀！

但醫生叮囑我，呢隻鞋係平低，唔會好似之前個隻咁，會迫住我用唔到前面ｄ力同唔會曲到ｄ腳趾，所以我要靠自己，千祈唔好曲到ｄ腳趾！

今日仲有個大環節，就係拆線呀！我都係即時先知，因為醫生話手術後兩星期就可以拆，一個結代表一針，原來我都係縫左八針咋！掛住影相，唔記得拎返ｄ結返屋企，放係個樽仔度留念．．．到記得時，已經比姑娘清理左啦．．．唉．．．

拆線時都唔係唔痛架，姑娘係要挑起個結，先放到個較剪尖入去剪斷條線，所以扯起個結個吓，都好痛架．．．我仲係"挨"左頭六針，先有力拍低最後個兩針比大家睇架．．．嗚嗚~~~~嗚嗚~~~~　　　

http://video.yahoo.com/video/play?vid=591491 

拆線前後：                

醫生仲係話我洗傷口ug得唔夠入，我話我買的敷料包的棉花棒頭好大粒，好難捽入去呀，跟住個護就醒左幾包筍野我，叫我試下用呢ｄ會唔會好ｄ！真好人！

今日有兩張單，埋單一千及五百，共千五，好甘！我就問問，五百張單上面寫係診金定係隻新鞋？係寫診金，咁就好啦，診金應該claim足，寫左第二ｄ野就幣啦！嘩，個男醫生上黎，摸下我隻腳，咁就五舊！嘻嘻！

2007-05-29 執相

貪靚的休，嫌呢張相影到佢個額頭反光，就叫左太陽哥哥伸出同情之手，幫佢執執張相！我出聲，當然冇問題啦，五分鐘攪掂！好勁呀！

睇吓睇吓，我先發覺太陽哥哥原來仲附送左另外兩部位，除左額頭外，仲有眼袋同左邊粒墨呀！嘩，買一送二，買一得三呀，抵請食飯啦！

休：您咁後生就咁多野要執，響起訊號啦，快ｄ問下auntie點樣keep住ｄ靚靚皮膚啦！唉．．．真戥您擔心！