2007-05-08 親親梁靜茹愛的大遊行演唱會

今日係期待已久的"親親梁靜茹愛的大遊行演唱會"，真係好興奮呀！多謝太陽哥哥請我睇呢場咁難忘的演唱會，咁我就請返您食飯啦！我地去左Yammy介紹的"好時沙嗲"，因為太陽哥哥好鐘意食海南雞飯架，除左招牌菜，我地仲叫左我想試的喇唦，同埋炒通菜！碟海南雞飯真係幾好味，拍得住我地成日係旺角幫襯既"泰妃雞"，不過地點就真係僻左ｄ！

等緊食物來時，太陽哥哥突然拎左兩個信封出黎，叫我揀一個，又有神秘遊戲玩，驚喜！揀完後，把信封面翻向上，一睇，係一個女仔頭(我)，而佢個個係男仔頭(佢)，女仔的咁岩比我抽中！信封入面就係我地今晚的演唱會飛，最特別係佢整左個holder放張飛囉，好prof呀！我好好好鐘意，所以好好好開心！

其實上一次同佢睇演唱會係軟硬，佢當時都整左個holder裝住張飛冧我，估唔到同佢一齊都一段日子，佢仲會繼續咁有心機冧我，仲越整越prof添，希望佢繼續都咁錫我啦！嘻嘻~~

入返正題，飯後就出發去紅館啦，去到紅館外面後，我地就搵四面閘入啦，發覺得紅黃藍綠，冇啡色既？原來我地係地面位，唔使上樓梯排隊入場架，地面有個暗隔位入場架，我覺得好勁呀，好以入後台咁，真係要影相留念！入到去，我地個位好近呀，但好唔開心係知道冇可能同靜茹握手囉，唔知係咪台灣style唔興有握手環節呢？因為個台都幾高，而個台既設計係無樓梯到地面既，好傷心！！反而上面個層最旁邊的四百蚊側邊位就可以握到呢，所以，真係冇得兩全其美！

靜茹把聲真係好靚，好似播碟咁好聽，驚喜係JOEY係嘉賓，佢地一齊合唱作首"昨天"，幾好聽，遲ｄ下載先！不過更驚喜係JOEY獨唱時竟然係全埸的厠所時間，真係尷尬喇！由於佢地唔同公司，我亦相信第時呢個演唱會出vcd一定唔會有呢part，我就拍低左movie喇！

仲有品冠係嘉賓，佢的出現沒甚特別，唯佢同靜茹安排的一幕歌迷求婚環節好感人，其實我以前睇靜茹concert的vcd時，已看過呢個求婚環節，雖今次又重演，但可能在現場，我都睇到眼濕濕，好感人好感人呀！試問幾多個歌迷可係自己偶像促成下完成人生咁重要的一件事呢？最重要係台上的人好真，係真的感動到喊呢，眼淺的靜茹當然都有份喊啦！

靜茹比我感覺係好有愛好有感情好有feel的一位歌手，聽佢唱歌，睇住歌詞，就會有無限的感動，我唔點形容呀，總之，一路聽，亦會泛起好多自己愛情故事的片段啦，而呢ｄ咁真切咁真實的感覺，我係係其他台灣歌手度搵唔到，好多人鐘意孫燕姿，但我就只愛梁靜茹，哈哈！

我仲發覺，買飛入場的朋友，唔係為睇佢跳舞，為睇佢身材而黎，而係真真正正想聽佢唱一晚歌而黎，睇相都知，舞台並不堂皇，我仲問太陽哥哥點解咁舊咁，有Ｄ聯邦皇宮FEEL，哈哈！但在座每一位，都睇到好投手好開心好滿足！

今晚大部份的歌都耳熟能詳，有我喜歡的fly away，暖暖，小手拉大手，孤單北半歌（呢隻歌個背景圖畫好靚，我亦拍下movie）等等．．．

仲有一首大家要留意的最新廣東歌"原來你也唱過我的歌"，係ERIC KWOK同藍奕邦既作品架，用左好多靜茹既歌名填的一首曲，如靜茹話齋，填得好好，我都覺得係，尤其係香港演唱會，唱比支持佢的香港歌迷！encore後以我勁愛的"如果有一天"，"分手快樂"及"勇氣"作結！唱勇氣時，我都忍唔住流左少少眼淚，真係好奇怪，睇一個女歌手的演唱會會睇到喊．．．其實，之前睇VCD時都試過，哈哈！佢就係有種令人感動的魔力．．．

原來你也唱過我的歌 - 梁靜茹

曲 / 詞：藍奕邦 编曲：Ted Lo  監制：Eric Kwok

聽說過  這邊失戀的人  也會點唱分手快樂  
旁人話過  這裡有個大男孩  欠缺勇氣想示爱  唱勇氣來當替代
分開兩地都不緊要    即使距離也會再變小
從旋律中的感覺再把我們連繫了
如樂章的變調　連過客也變得親切了

原來你也唱過我的歌   陪同見證年月的經過
感激有你    肯相信我   我們隨旋律的高低挽手走過
原來我唱你也在拍和   親暱猶如我是情人嗎
即使從未認真拖手過   卻也彷佛愛過

聽說過  這邊廂的戀人  唱我喜歡都很快樂
寧靜夏季   分享多一首親親   完全無條件為你
我也覺無窮快樂　分開兩地都不緊要    今天我陪你唱到破曉
如像熟悉的歌曲已把友誼維繫了　唯望好好答謝　能碰上原是有多奇妙

原來你也唱過我的歌   陪同見證年月的經過
感激有你    肯相信我   我們隨旋律的高低挽手走過
原來我唱你也在拍和   親暱猶如我是情人嗎
即使從未認真拖手過   卻也不願離座　

原來你也唱過我的歌　陪同見證年月的經過
悲喜對錯    一起去過    我們還未共分享的尚有很多
原來再見仍然未生疏    心底埋藏我每段情歌
感激從未認真相識過    卻這麼寵愛我

演唱會係十一時三十分完結，勁抵睇！