2007年4月29日 星期日

2007-04-29 捐血 & 琪琪join埋太陽爸爸煮的晚食飯

今日又係四月一度捐血既大日子,呢四五年黎,我都有keep住捐血架,今日係第廿二次啦,呢張係我捐第廿次血時紅十字會頒比我的獎狀黎架!

今日去到,門口就有兩張尋血啟事,仲咁岩係我同太陽哥哥既A型同O型,係咪好夾呢?哈哈!唔知Alex同Stephy係咪都係呢兩個血型呢?

捐過咁多次血都無影過相,大膽的我,問過姑娘係可以影相後,就將我個捐血過程錄低了!

姑娘會先幫您消毒,跟住打麻醉針,然後入針,針一入,d血就會即刻由身體流入個血包度架啦!但開頭個d,佢地會過落幾支既tube度,我諗係拎去做化驗,之後d血先會開始流入個血包度,我每次都係捐350cc,但大隻d又或者係男士,就可以捐450cc架!捐完後,您個血包會好快拎走,放入雪藏箱度保鮮!整個捐血過程需時大概十分鐘,但計埋填表,見護士,"篤"手指,量血壓,捐完的休息時間,加加埋埋都要成粒鐘架!

今晚又係太陽爸爸下廚,其實開頭都冇諗住食架,只係朝早佢好誠意拳拳話煲雞腳湯我地飲,我地就應承左,佢一知道我鐘意飲雞腳湯就好鐘意煲咁,希望唔會次次都係味湯啦,哈哈!最攪野係琪琪比我"唉"多兩"唉",佢竟然答應過黎一齊食,大膽,有家姐-我既風範,哈哈!


2007年4月28日 星期六

2007-04-28 搬梳化 / 太陽哥哥 drawing / 媽咪朋友大晚飯 / 松記甜品笑片

今日有好多事要記低呀,首先係搬梳化,由沙田搬去九龍城,其實琪琪叫左雞記包車,司機話只要搵到一個人幫手可平一百蚊,二百五攪掂,唔係要三百五,為左慳錢,唯有搵個壯男啦...呢個時候,梗係要叫大隻既太陽哥哥幫手啦,嘻嘻!(梗係要讚下佢啦,不過,佢都好樂意既)

開頭我地以為都係"豆"一"豆",應該唔係幾辛苦,點知...係超辛苦呀!因為九龍城個度係唐樓,冇樓梯,仲要上二樓,d轉角位死位攪到大家都R晒頭,條隙位簡直係岩岩好個隻...我既責任雖然係看車,但八怪的我,成日走上去偷望佢地搬成點,去到邊,個司機叔叔就成日叫我:不如您落返去睇車啦!哈哈!佢勁驚架車抄牌!我仲係佢地好辛苦咁搬緊時影左幾張相,表面上睇好似好賤咁,但我都係為左要post係度比大家表揚下佢地姐!

返到屋企,阿漢好好人,幫我地換大門鎖,呢個時候,太陽哥哥就教細佬妹畫下畫咁,我知琪琪係好有興趣,因為由細到大,佢畫野都幾得意架,唔知係咪左撇子既關係呢!我亦叫左太陽哥哥畫個琪琪頭送比佢,仲拍低左movie添,不過驚成六分鐘會悶親大家,我地將個movie fast forward拍多次,大家欣賞下啦!太陽哥哥畫畫個樣真係好型呀,電到我暈得一陣陣~~幾時都話,男人聚精會神做野個樣,真係係最charm!哈哈!

之後媽咪慰勞阿漢,請佢食飯;我地又想請返BEN食飯,因為佢借車比我地;休又冇野做黎埋一齊食,所以呢餐飯既組合好得意,係我屋企人加我d朋友!我地去左媽咪至愛既金潮小廚,每人叫一個餸,岩岩好!

之後未夠鐘碌齡,我地就楂車去左松記食糖水,叫左:哈囉,Summer,芒果世界,雪山!有車真方便!我仲好無聊咁將d朱古力棒棒溝雪糕既物體"bit"出"bit"入,拍左個攪笑movie比大家欣賞!哈哈!

 


2007年4月27日 星期五

2007-04-28「冇得彈」

太陽哥哥開左首歌我聽,話好正要介紹比我,我一路聽,佢就企我我旁邊問,點呀點呀?我答:好聽咩?佢唱到咁快,都唔知佢up乜...點知佢話歌詞好正架,佢係收音機聽過幾次,佢覺得好鐘意,會諗起我,所以佢想送呢首歌比我!見佢講到咁,梗係要留心聽啦,大家睇下d歌詞,尤其是chorus個四句,您係我,聽完都實鐘意啦,唔好聽都話好聽啦!好冧呀,我已經聽左十幾次啦,哈哈!快d去我FTP度download啦!

「冇得彈」

作曲:M. Farina
詞:林若寧
編曲:Eric Kwok /Ted Lo
監製:Eric Kwok

連暴肥都迷人 連爆牙都迷人 連肉麻都迷人 連痘皮都迷人
連賴床都迷人 連病容都迷人 連鬧人都迷人 零度瑕疵情人

救天災救貧民 去饑饉去扶貧 還捐錢捐上癮 人心地好到震
最出色女強人 最溫婉有情人 模範情侶你最勝任

*這個女友豈止得到二千分 這個女友識到三生都有幸
這個女友想依戀到下一生 眼裡看你 缺點我都看得吸引

我只懂喜愛你 我不懂討厭你 著衫有簡樸美 化妝有典雅美
我只懂稱讚你 我不懂批鬥你 瘦身有曲線美 吃飽有豐滿美

我歸家有時遲 你都給我門匙 即使我很放肆 多得你不介意
每當感到猶豫 你都給我權宜 從未曾對我有抗議

Repeat*

會摙骨到零晨 會煲湯會彈琴 織冷衫識配襯 煎炆炒香噴噴
有姿色有才能 有思想有靈魂 連敵人也向你送吻

Repeat*

我要送你 我一世所有的飛吻


2007-04-27 Lunch@小白鷺 & Bu Bu 車驚喜

早於上星期已約左好姊妹好兄弟今日食午飯,點知有位舊朋友知道後自薦要一齊食,佢就係我個舊老闆嘞!同佢食,預左唔洗比錢,就係咁,我身份勁尷尬,好似痴餐咁...不過唔通唔去咩,咪仲衰!佢帶左我地去環境清幽既小白鷺食,都幾唔錯架!

大概四點半,BEN就將佢架車楂左入中大交比我,因為佢唔方便泊返天水圍,叫我幫佢keep到聽晚,我梗係極度願意冇問題啦!哈哈!尋晚仲諗定點樣運用呢個千載難逢既機會,就係接太陽哥哥放工,比個驚喜佢喇!不過呢個係一個幾高既挑戰,一來我已好耐冇楂車,二來次次楂都有人旁住,好少自己楂,三來今次的目的地係...鰂魚涌!尋晚已開始"咪"地圖,因為我係一個冇方向感兼極度驚青的女司機,今次仲係孤身上路,真係要做好準備!

大概七點半,就係青衣出發啦,我既路線係:

青衣 -> 三號幹線 -> 油麻地 -> 紅隧 -> 靠左挨左線往北角方向 -> 上東區走廊 -> 鰂魚涌

最大壓力當然係紅隧出入口同cut線上東區走廊呢幾個位啦!好彩紅隧口唔係好塞,但過左收費處後都係入唔到隧道左線,因為太多大車;到出紅隧時,好緊張攞唔切線,但好彩,唔係太難就挨到最左線,哈哈!出返露天世界時,順住線往北角方向,跟住要挨右一條線上東區走廊,但隔離線d車好快,我根本cut唔到,架車挨左三分一過右線時,仲比架快車bu我呀!眼見快到雙白線位,車速亦越來越慢,心情勁緊張,最後係貼近雙白線前終於切線成勁,舒一啖氣!上左東區走廊後,簡直係另一個世界,好靜,d車唔密,好好楂,好容易就去到終點!

因為紅隧冇塞車,比預期早左二十分鐘到,就打比太陽哥哥試探下佢走得未,之前其實我係吹水話ELSA有野比我,麻煩佢係公司樓下等一等ELSA,佢梗係信以為真啦!同佢講ELSA早到左後,佢話約十五分鐘落到黎,我就一路望住後鏡一路等,係呢個時候,我岩岩有電話,冇咁為意,其實講左五分鐘倒,太陽哥哥行過左我身邊兼拎個頭望到我!佢一下愕然,我地大家都大笑左出黎,我就即刻收線啦,雖然呢下驚喜未100%做得好好,但佢都好開心,話估唔到我咁遠都夠膽同識楂過黎,好叻女,佢好開心呢,我都好開心呀!

跟住我地去左天后食贊師傅喇唦,好好味,上次食已經係五個月前!(個喇唦我食左一半先記得影相!)

晚飯後太陽哥哥帶左我去佢十幾年前學斜路泊位個小山頂,真係有學神係度學緊泊位呀,我地又係個框度輸住試,不過我d技術已經忘記晒,一係出晒框,一係撞晒膊,總之肥晒佬!哈哈!跟住落車睇左陣維港風景,我仲笑太陽哥哥帶我黎d咁既地方,好似係度溝緊我咁呀!好可惜...我地根本係情侶黎啦,哈哈!

今晚好開心,好有滿足感,但有少少後悔唔記得影低d相留念呀!好似係每個spot,比如出車前,紅隧等車,到逹後等等...唔係個blog一定更加生動呢!


2007年4月24日 星期二

2007-04-24 山長水遠的午餐 & 腳傷

今日放假,下午橫掂要去灣仔,所以就早d早門口,約了太陽哥哥食午餐!佢應該幾開心我的到訪,哈哈!帶了我同baby sister去一間佢覺得最好味既餐廳,又真係幾好味架!

今日幾狂風大雨兼天雨路滑大家都知啦,我就係因為跣腳,對美腿又弄傷了!話說係回家途中,落車後一如以往地"誇欄",但今日又拎傘又拎住細佬外賣,唯有交比細妹負責"蚊"我上去,點知一跣,隻腳由上面跣返落地,就刮成咁了...最好笑係細妹一邊哎呀哎呀望住我跣落去,但另一邊又唔放手係咁"唓"住我,攪到我個隔勒底比佢"唓"到都好痛呢!唔知點解,對腳硬係成日會整親,好邪呀!



2007年4月22日 星期日

2007-04-21 吊靴鬼

大家有冇見過真正既吊靴鬼?今日我就遇到一隻!

話說太陽哥哥今日碌齡勁到好似食左弗得咁,有turkey兼且尾局"立盡",亦即"盡拎所有分數",有人仲話懷疑佢食左禁藥,要捉佢去驗尿添呢!哈哈!

咁好既分數,梗係要影低美麗的一頁啦,係我地影緊相之際,有隻吊靴鬼係咁黏住我地,第一張冇計,被迫就範,點知第二張佢偷偷地係我後面攝出黎,第三張仲係遠處對住鏡頭攞pose添!真係揮極都揮唔甩,避極都避唔到!大家話攪唔攪笑先?


2007年4月20日 星期五

2007-04-19 與小學老師晚飯

今日跟小學同學們約了黃老師食飯,自小學六年級畢業後,這次是第一次跟老師同枱食飯,感覺很得意,好像我地已經長大成人,學有所成,宜家亦有自己的工作,識賺錢了,就請返老師食飯,分享返我地既兒時往事,真係好開心呀!呢餐飯足足食左三個鐘呢!

遺憾是聽見其他我喜愛的老師已離職了,部份仲係食左肥雞餐,哈哈!希望係將來仍有機會見返佢地,因為記得佢地都好錫我呢!眼見黃老師現在教得辛苦,好像孤身作戰咁,真替佢擔心,希望佢d學生聽聽話話,唔好蝦佢啦!

老師話我地真係好乖,好生性,我就話:梗係啦,我地係您教出黎架麻!氹到佢好開心呢!呢餐晚飯真係食到勁開心勁開心,同咁多位同學仔朋友仔咁齊心約呢次聚會,好難得呀!

發覺我地撈埋一齊既記憶力係好驚人,除左好多兒時軼事外,最勁係由學號一號開始數起,竟然數得出八成同學仔個名呢!我地會繼續努力搵返失去聯絡既同學仔,更新返d資料,希望我地呢group能繼續擴大,呢個係在坐每位同學仔的心願呀!


2007年4月19日 星期四

2007-04-19 親親梁靜茹愛的大遊行演唱會

終於買到梁靜茹演唱會飛啦,真係買得艱苦,一向依賴太陽哥哥的朋友買靚飛,誰知因主辦單位唔同,買唔到,最幣仲係我地問時先知係三月尾已公開發售左,得返d唔靚既貴飛;諗住買黃牛啦,但開價千二蚊兩張,第一行喎,雖然好想,但真係唔抵呀,已經唔係十八廿二,咁樣做似乎太瘋狂;跟住收到消息話加場,尾場,好想睇,問黃牛係咪一樣價錢,點知佢話千六,神經!唯有靠自己,每日打去電腦網問幾時開售,尋日得知係今日,但又要返工,諗住電話/綱上訂,誰知電話要開售第二日先開始,得返綱上訂,但聽人講個系統好易load唔到,好擔心...係呢個時候,我既幸運星出現,就係我 best friend TRACY,佢幫我係樓下通利買到呀!

不過有件勁唔愉快事件,就係個通利職員好鬼串,其實因為臨時叫翠西幫手,佢又唔知我想要咩位,所以都諗住佢買時會用電話比我同個職員溝通,點知佢一入去,個職員就話:AE行,比咭定比cash?翠西下...我係電話度都下...跟住我同個職員對話:

我:點解無得揀位?

職員:後面有人,唔公平!

我:但我都想知係咩位喎,AE即係咩?

職員:第五行

我:邊個位置第五行,我有floor plan,麻煩您講比我聽丫

職員:地下位個度

我:咁係咪 65 段落到低既黃色area個度?

職員:我唔明您講咩喎!

我:咁係咩段?

職員:冇段喎,地面黎,其實電腦會揀個最好既位比您

我:咁係咪路口位?

職員:係

我好想小佢,但忍住...下面就係floor plan啦,我既問題都好大路姐,佢完全答唔到我兼且態度惡劣,講野串,又冇尾音!

框住個度係地面加椅,我見佢話AE係第五行,我咪以為係最左邊既黃色椅由舞台開始數落第五行,都好ok喎,就買左喇!點知下午發現,係第二舊黃色椅開始計起,即係我買個位係再後多五行,即紅圈位置,後左好多咁...比條友厄Q左!嬲爆!

不過最終買到,其實開心既,總算還返個心願啦,又唔使比黃牛老屈!最唔好意思係要TRACY等左半個鐘,辛苦您啦!


2007-04-19 Lunch @ A-1 Cafe

今日Jimmy車我同Bebe去A-1 Cafe食Lunch呀!好好味,不過,唔夠飽呀...但精神上好飽,食得好滿足,因為同開心的朋友,錫我的朋友一齊,做咩都會開心,時間仲過得特別快,落車時係咁同Bebe揮手,好唔捨得佢呢!

好驚喜係食飯坐低時,Bebe問我:您隻腳係咪有事呀?我話:咁您點知?佢話:我見您行路時就住就住,有d"gut"呀!其實開頭好驚,驚比佢話我又唔聽話亂食野,但呢個感覺唔使一秒就被掩蓋左,因為我覺得Bebe真係好細心,好留意我呀,我鐘意細心的人,因為呢d人係會真真正正用"心"去做每一樣野,用心做出黎既野,好令人感動架!正所謂只要有心,就算做得唔係好好,結果係點,其實都唔係main point,最重要係個過程,接收個個feel到您好有heart去做,就已經足夠啦!

我好開心有位對我真正用心,真正關心我既朋友!



2007年4月18日 星期三

2007-04-18 MSN 公仔

我諗玩開MSN既人,都知道有d好得意既公仔可以SAVE低,而呢d公仔,好多女仔為佢地著迷,簡直係俘虜左萬千少女既心!我亦係其中一份子,哈哈!

有唔同既男仔同我講過:"都唔明您地咁鐘意呢d公仔為乜,好花呀!" "可唔可以唔好用呀,好難睇呀!" "又save?好煩呀您,可唔可以唔save呀?" "部機有時load唔到,都唔知您想講乜!" "咩意思呀,唔明呀!"...等等...等等...

我想講,您地可唔可以比d耐性呢?因為冇得解,鐘意就係鐘意囉,就好似您地d女朋友鐘意您地一樣,您想唔想佢地唔要您,delete左您丫?save得咁辛苦,都係為左同您傾偈時開心d,colourful d麻!各位帥哥,包容下啦!嘻嘻!

比個tips您地添啦,用呢d公仔同女仔傾偈,而又中個女仔鐘意既款式(因為我其實都唔係個個款都鐘意),可氹到個女仔好開心架,仲增加唔少印象分呢!

呢d就係我d MSN公仔呀,得意嗎?睇中又未有的朋友仔,可問我攞呀!


2007年4月17日 星期二

2007-04-17 Thai Dinner & Dad's Translation

今日約左Tracy & Tony食晚飯,原本太陽哥哥都黎,諗住介紹我好朋友佢識麻,可惜要OT黎唔到...其實出黎都係諗住見多d,因為Tracy好快就走,下次返可能要等到下年啦,我地原本諗住去Cafe食,點知我鐘意個間執鬼左,行下行下就去左女人街一間泰國餐廳食喇,叫左個兩人餐三份食,好豐富呢!




返到屋企,細妹話我知已幫我問左爸爸泰國朋友封信講咩啦,翻譯時仲拍低左movie比我睇,真係好開心!只係一次旅行識到的當地人,無啦啦好似做左筆友咁,宜家電訊咁發達,希望我地唔好偷懶,繼續keep到呢個咁有緣份既friendship,我會繼續回信比佢架!見到佢海嘯後終於等到生意復甦返,仲越做越忙,生意追得返以前,真係好戥佢高興!


2007年4月16日 星期一

2007-04-16 希望世界和平

一位美國朋友話,以前係香港,真係感受唔到咩叫希望世界和平,去到美國就真切體會到,佢比左條LINK我,係一個媽咪作既一首歌,講佢個仔去左打仗,由佢個女,亦即係妹妹唱比哥哥聽咁,問哥哥幾時返屋企...我睇完聽完都覺得好感人呀!

妹妹好純真咁唱,問哥哥幾時返屋企呀?話哥哥好叻,好細個做人就好有目標;大時大節哥哥點解唔係屋企既?屋企一切如舊,但冇左哥哥,一切變得枯燥;雖然哥哥成日同唔到我地一齊,但大家都好為佢而驕傲;好想哥哥快d返黎呀,睇我長大左,我仲要介紹朋友仔比哥哥識...呢d聽到都好有feel...又一次,大家真係要好好疼惜身邊既人呀!

http://www.youtube.com/watch?v=eVFF98kNg8Q

http://www.youtube.com/watch?v=JsRqV3lu5X8&NR=1

when you are coming home

almost sixteen when I came into the world.
Mom and Dad had you first then 3 more boys I'm the baby girl.
I sure have a lot to look up to in you, you're really smart and funny with a big heart too.
After one year of college you knew what you had to do.
It's just like you wanting to help with the war.
So you joined the army when I was only 4.
This time of year we talk of big plans but you're over seas in some distant land.
You can't be here for Christmas, I don't understand.

Chorus:
When are you coming home, Shaun?
When are you coming home?!
We lit up the house like we always do but it doesn't seem bright 'cause we can't have you.
In my prayers I ask God to keep you safe.
And I'm trying to be really brave.
Tell me that the fighting's through.
Come home!
I really miss you.

It's hard to enjoy the holidays without you.
But we're so proud of you and all the red white and blue.
Remember that Jesus is your best friend,
And someday our families will be together again.
Wow! You know we'll have a great big party then.

Chorus

I want to show you how tall I've grown and introduce you to my new friends at school.
Maybe we could go and get some ice cream together but I really don't care what we do.

 


2007-04-16 我又有新BB玩啦!

尋日跟琪琪探佢契仔,我變相又有新BB比我玩個痛快啦,哈哈哈哈!!!

今日有相到手,要即刻同大家分享,因為呢個BB好可愛,又係我最鐘意既...仔呀!呢個B四月四日兒童節出世,跟威哥一樣,係細妹一個中學同學生既,又係住青衣,好近我,咁我就大把機會去玩佢啦,yeah!!

通常剛出世既BB個樣都係一PET野咁,但呢個就唔同呀,五宮己好標緻,好清楚,仲幾靚仔呢!唔多喊,又好relaxed,唔會好似一啲BB成日好驚咁楂實拳頭!同佢影相時又伸脷又打喊路仲識say hi添,好精靈鬼馬多神情呀!不過就好似成日訓,訓得多得滯,好難捕捉到佢睜大眼既鏡頭!我就鬼馬地扮返佢訓覺!嘻嘻~~


值得一提係d衫仔係媽咪買比BB架,係咪好得意呢?我諗如果媽咪有個親孫,實成日有新衫著,因為係呢一個禮拜,佢已經買左幾個奶樽,四件衫仔,一件褸仔...救命~~