2008年5月31日 星期六

2008-05-31 (Sat) 忙碌的五月最後一天


平時只有玩到攰的我,好少會有work到攰的我...好耐未試過星期六返工啦,仲要係由九點踩到七點十個鐘,仲仲要係銅鑼灣,七點就要起身啦!好在有太陽哥哥叫我起身、陪我食個豐富早餐(因佢知我唔會食lunch)、同埋送我去搭車,呢個係好好的推動力!雖然腳同腰都好攰,但付出同收入成正比架麻,咁好pay的part-time去邊度搵呢!


早上只得兩位同事,真係counter同電話係咁不停不停咁做...下午好d啦,多兩位同事返,我仲監考左一堂,坐低休息休息,正呀;不過悶到烚眼訓!我亦冇食lunch,一來冇買;二來好忙,真係唔覺餓,或者早餐刻意食左好多野啦!放工後太陽哥哥送來驚喜:



太陽哥哥今晚要去數碼港飲呀,但佢太掛住我啦,少少時間都忍唔住點都要過一過黎銅鑼灣見一見我,哈哈!講笑啫,佢話我返工辛苦,黎接一接我同比d獎勵我呀!嘻嘻~~ 獎勵就係我最鍾意的royce crunch!仲送左幾片dark chococlate呢,不過好苦,唔岩我...





媽咪同朋友係沙田行完街,朋友有車,所以佢又特登過黎銅鑼灣接我放工再過返青衣,哈哈,兩位我至愛的人今日做咩呀?爭住接我放工既!但我真係好開心呀!


不過等媽咪期間,有段小插曲;我一早同佢講左七點三係sogo等,因太陽哥哥係個頭搭小巴,送太陽哥哥上車後,我就係sogo行下,嘩...因為sales,勁多人,仲多過旺角,直情打蛇餅咁出入,傻架,咁多人,行咩鬼丫!我一見人多就超炆架麻!七點半...等十五分鍾係我極限啦,打比媽咪,點知佢話係紅隧塞緊車...炆!佢話快d的話都係係times...下,我返工係times個頭,已經行左過黎sogo,我今日返左十粒鐘,企多過坐,對腳已經攰到爆燈,宜家又叫我行返過去,唔係麻,仲落緊雨!勁炆呀!死死地行返過times,炆到想爆粗...最後媽咪竟然八點先到,救命!!!早d講,我繼續返part-time都好丫,激死我呀!


不過當知道自己EQ好低時,打左比BEN抒發,好左好多;所以媽咪黎到時,冇黑面同投訴之餘,仲好開心見到媽咪,話晒咁遠水路黎接我放工,心意已經無價寶,算啦!


由於周圍都勁多人,我地決定返青衣城食,媽咪真係專登過海黎陪我過返海呀,好偉大的媽媽,我啖氣"嗗"一聲冇晒啦;去到香港站見到奧運倒數:





返青衣城食新開的池記,新張期內有九折呢!雖然全日我只食左早餐,但已經晚上九點幾,我一d肚餓感覺都冇,只係好正常咁食左碗麵!





2008年5月30日 星期五

2008-05-30 (Fri) Japanese snacks @ tea time


今日既 tea time太開心了,因為有Prof. Cheung係日本帶返黎既卡樂B薯片!第一包藍色呢包超勁爆好味呀!大家要認住佢,有機會買黎試!第二包有個"堅"字,原來真係好堅...好硬呀,咬到口都攰,唔好試啦!第三包就仲未試...






食薯片時,諗起前幾天太陽哥哥接我放part-time工時,靜靜雞放左罐我好鍾意既日本飲料係我個紙袋度,原來佢特登係citysuper買比我架!冇端端個紙袋又凍又濕濕地,驚喜+開心!


我一路放左係公司雪櫃仲未飲,趁宜家拎埋出黎飲;嘩...一個好日本feel既tea time!如果可以日日係咁就好了,哈哈!




2008年5月29日 星期四

2008-05-29 (Thu) 明治柚子胡椒味薯條


Erica尋日幫了我一個大忙,為答謝佢,我買了個明治出的柚子胡椒味薯條請佢食!





嘩...好長呀!成支原子筆咁長呢!好期待有種強烈柚子味的我,可能太期待,要失望了,因為柚子味並不重,反而有種檸檬酸酸地的味道;加上十六元只得十九/二十條,唔太抵食呢!




2008年5月28日 星期三

2008-05-28 (Wed) Dinner @ 和民


sa同ronnie一向都有見,但好多年冇見的stephen係我地今晚期待以久的人物;屈指一算,我諗都有十年冇約出黎食飯啦,呢十年黎只係試過好怱忙咁撞過兩三次!


今晚重聚,四個人入面有一男一女無論講咩都好夾呢,咪就係我同佢囉!但唔係我覺得架,係sa同ronnie覺得架咋,因為我同stephen都可互相一唱一和,亦接到好多有味笑話呢!成餐飯就好似我同stephen負責講,sa同ronnie就負責笑咁!




stephen因為遲到,我地開始食先,亦當然開始影相;到佢黎左,梗係到佢拎住碟野影相啦,佢好愕然,ronnie就同佢講:黎食飯就要適應givens既習慣,我上一次影相都係同佢食飯咋!哈哈!不過stephen好無所謂,好聽話咁好呀!







我地食左十樣野呀,係咪好勁呢?係咁傾係咁傾,講左好多近況,其實我地三個都好清楚彼此,係對stephen近況一無所知啫!不過好深刻stephen講我的聖誕咭,話我真係好有心,十多年來年年都寄,仲係佢唯一一個咁有心既朋友,係呢個年代真係好少會寫聖誕咭了!佢話佢真係儲起晒架,唔信影張相我睇喎;其實唔係唔信佢,只係我好開心朋友會咁欣賞我既誠意啫,講真,親手花時間寫聖誕咭呢個動作,無非都係想朋友們收到一份與別不同的溫暖,所以當聽到朋友咁開心同對我的聖誕咭咁好好保存時,我真係感到好欣慰呢!








今晚呢個重聚,真係令我好開心呀,呢餐飯食左成四個鐘呢!人大左,朋友一唔keep contact,好快就會失去聯絡,希望今日之後,我地可繼續約出黎聚舊同保持聯絡啦!





2008年5月27日 星期二

2008-05-27 (Tue) Family Dinner @ 金皇朝

 


爸爸星期四就會返泰國一個月啦,唔知係咪掛住我地咁,佢今日又叫我同琪琪出去食飯啦!開頭佢話叫我地三個細路既,但我同佢講,叫得威哥好難唔叫聲媽咪喎;講真,威哥都唔太尊重佢,亦唔會好想同佢食飯既,其實叫唔叫佢無咩所謂,慳返仲好啦;但我就同爸爸講,一係唔叫佢,叫佢就都要問聲媽咪,唔係比媽咪知道又唔係咁好啦;我估爸爸個心並唔係話好唔想請媽咪,只係怕出到黎有d拘謹,亦無得同我地唱所欲言啫,佢係口水佬黎架麻;不過最後,爸爸都係叫晒我地一齊出黎!


我地去左金皇朝食,呢餐好正呀,又響螺湯又雞又龍蝦,勁好味呀!




循例都又係影返幾張相啦!






 


今餐食左七百蚊幾蚊,我覺得幾貴,雖然唔係我比係爸爸比,但我可能知佢收入唔穩定,佢都肯叫成家人出黎食飯,個心係為左聚下見下面,呢個心意係好值得欣賞;但係回家途中,威哥竟然話:七百幾蚊食d咁既野,折現比我好過啦!我聽到好反感...我明,威哥對爸爸一向唔尊重,我自己雖未至於好恨爸爸,只可講同佢唔深感情,有咩我一定揀左媽咪先,但我都唔會講d咁既說話囉,過去係過去,都冇得返轉頭,咁可以點?唯有宜家做得幾多得幾多囉,點解要抹殺左爸爸的心意呢?咁唔妥爸爸,間唔中比幾百蚊零用又照收?個口話唔稀罕,咁又照收?生性d可交比媽咪當幫補又得,叫媽咪個個禮拜唔洗比零用又得,但冇喎,每次只會jer一聲咁用埋...唔鍾意威哥咁樣同口不對心...


跟住,我忍唔住講左件事出黎,其實係細妹早前同我講既;細妹一向同爸爸close好多,爸爸亦會講好多野佢知,好似朋友一樣;原來係新年時,爸爸因為冇團帶的關係,曾經過過段好艱難既日子,銀包仲只係得返二百蚊,最後就去左機場幫人搬野賺三百蚊,其實我都唔知算唔算做"姑里"?爸爸同琪琪講,一路搬一路流眼淚...嘩,幾唔鍾意爸爸都好,個刻我聽到都好心up,個心好唔舒服...試問邊個人知道父母做d咁既工作會開心?點都好,佢都係我親爸爸呀!


我講呢件事,係覺得爸爸收入不穩、冇積蓄,攪成咁,可能真係佢個人選擇問題,但起碼我睇到,當佢有收入時,叫我地食飯都唔會吝嗇,睇得出佢係真心想一家人齊齊整整咁食餐飯聚聚;點解要咁負面咁話佢,唔正面咁諗下佢的心意呢?



 


2008年5月26日 星期一

2008-05-26 (Mon) Cover Page 的真相


四月中的一個entry(http://hk.myblog.yahoo.com/aquarius-givens/article?mid=6453),咪講過同太陽哥哥上左雜誌封面既;好多朋友都恭喜我,亦私下問左我好多比賽的問題,我話遲d再同大家講...

等我今日講個真相比大家知啦,其實呢個只係一個小玩意,如果醒目同細心的朋友,留意到當時相的右下角,應該會睇到一個網址;而呢個網址,就係比人整屬於自己既cover page架,有好多款揀架,我其實亦整左好多款呢!


大家快d去試下玩啦:http://www.magmypic.com/