2009-10-09 (Fri) 婚後記 - 自製slideshow

太陽哥哥為我地個婚禮整左咁多野，其實我都有少少貢獻架！因為我地冇整成長片段，而婚禮五時恭候至八時入席呢段時間，好多時都會狂播婚紗相，但我又唔太想，一黎實睇到想嘔，二黎太自戀咁；於是我既貢獻，就係整左一個．．．自製slideshow！入面有好多相，當然有我地既成長片段、我地既相識、去過旅行既地方等等．．．除左關於我同太陽哥哥兩個人外，最特別係有埋我地既親戚朋友，甚至來賓，因為我好想在座黎到既每一位親友，都會係鏡頭度搵到自己呀，實好驚喜架麻！

因為想盡力搵齊晒所有親友既相，起碼每個人係瑩幕度出現一次丫，我摷左好多好多好多好多相呀，成個harddisk所有既相都睇過晒咁滯，仲整左幾晚通宵呢！之前婚假都冇請咁多日，後來知個slideshow原來要花好多時間，先臨時再請多兩日，真係付出左好多心機同時間架！

但好遺憾係．．．原來有好多朋友係當天係睇唔到個slideshow既！因為五時恭候至八時入席呢段時間，其實好少賓客黎左，加上黎左個ｄ，好多時都會同好耐冇見既朋友仔相認＋傾計，冇咩時間睇個slideshow；加上當時全場又開左燈，slideshow個瑩幕變相好模，真係唔多覺．．．其實最多人得閒同最適合播既時間，應該係我地影完相落台換衫等註冊個段時間，因為當時全場會熄晒燈，賓客們又會坐定定等睇註冊！我開頭都估其實個slideshow當時應該都繼續 loop緊架，但唔知點解，原來我去換衫時就熄左，真係激死我，令我覺得好失望＋好遺憾呀！

既然九成朋友都冇睇到個slideshow，我又花左咁多心意，宜家就係度post返比大家睇啦！由於片長過左十分鐘，youtube要分開兩段片，希望大家見諒！記得開埋喇叭聽埋音樂，ｄ歌都係我好細心咁揀架！

2009-10-08 (Thu) 婚後記：十年前爆笑相識相．婚紗相ＭＶ

今日就同大家分享下一張經典＋爆笑既相片先！以下呢張相，係攝於我同太陽哥哥相識個年，即係1996年既暑假，當時我做暑期工，就係咁識到佢喇！呢張相真係好經典，話說當年公司大旅行，咁先有緣同太陽哥哥影到呢張相，仲係一張咁大把！估唔到十三年後既今日，我地會走埋一齊兼結埋婚！影呢張相個剎那，真係冇諗過企係我隔離個個人，會係我第時個老公！所以話呢，緣份呢家野，真係好微妙架！

亦因為影過呢張相，結婚個日，就post左出黎比賓客黎，相片一彈出黎，引黎嘩嘩聲同哈哈笑聲，真係勁攪笑！我諗在座每一位來賓，都勢估唔到我地以前個樣係咁．．．攪笑．．．即係樣衰囉！哈哈！尤其係我，我成日好自豪咁講，『超級飛躍進步大獎』仲唔係非我莫屬？

婚禮當日，亦播出左未曾公開過既婚紗相MV，呢個MV係我同太陽哥哥影婚紗相時另外加錢拍既！因為我成日都想自己個婚禮特別ｄ，我本身覺得一般婚禮新人進場時都播成長片段，好似例行公事咁，一ｄ都唔特別；加上ｄ成長片段來來去去都係個ｄstyle，真係睇到有ｄ悶；於是我就想出比來賓們一個新鮮感、估您唔到既感覺，佢地以為係播成長片段之際，原來唔係既！就係咁，比左大家一個驚喜，播左呢個婚紗相MV喇！

事後朋友們都同我講，好鍾意個呢個MV呀，因為我地拍得好sweet好自然好開心；Yammy仲話每次聽到"今天您要嫁給我"呢首歌，就會諗起我地呢個咁開心既MV！其實我地都好鐘意呢個MV架，剛拎左返黎個時，睇左好多次，因為有ｄ位都真係幾攪笑架！哈哈～～仲記得當時好想即刻同朋友仔分享，但都忍住先，只公開婚紗相先，諗住個MV係當天先第一次公開播放！

個MV拍得咁好，咁當然全靠間公司啦，我地影婚紗相係蒙羅麗莎，同佢地合作間MV公司叫Be True，幫我地拍個個叫Andy，仲有助手＋剪片呀基！唔講都唔知，Andy係公司老闆黎架，因為影婚紗相個日佢地接左好多個jobs，所以連老闆都要親自出馬幫手拍ｄ，而咁岩Andy就幫左我地呢對新人，我地真係好幸運呢！仲有呀，佢地既services真係一流，所以如果有朋友唔知揀邊間影婚紗相好，我首推join蒙羅麗莎！

因為有部份朋友未睇過呢個MV，我就係度post埋比大家睇啦，睇過既朋友又可以重溫多次啦！嘻嘻～～不過因為係DVD，我唔識點轉做電腦檔，所以我好低能咁一路播住隻MV，同一時間就拎住部相機拍低，跟住將file過落電腦再upload上網，所以質素麻麻地，請大家見諒！