2010年11月20日 星期六

2010-11-20 (Sat) (下) 玲玲晚飯@鵝頸橋明記



食完自助餐已三點,同太陽哥哥由金鐘一路慢慢行到銅鑼灣,既可消化又可行街;夜晚約了Victor一家食飯,去左鵝頸橋明記大排檔:



玲玲好可愛呀,肥嘟嘟,宜家識講好多野啦!佢仲係咁叫我『林太林太』,Gigi話上次八月係大戶屋食飯時,拍左個短片,係我地送禮物比玲玲;每次一放,玲玲一聽到我把聲就叫『林太林太』架啦,好攪笑呀!



剛見面未warm up 好,但玲玲都肯一齊影相,仲挨過黎錫錫;不過話抱佢去睇魚魚,佢就話『唔好呀』!



太陽哥哥同玲玲呢張相,影得超靚呀,我楂機架,簡直一百分,我都忍唔住要用黎做手機 wall paper!



用咀錫添,太陽哥哥開心死囉!




開餐~~今日有點失策,叫左七個餸添!




玲玲飲橙汁:



自己斟,個樣又為食,好攪笑!




玲玲多個古蠱趣怪樣:




食左成餐飯,friend 晒~~玲玲同我影相又手指指又O咀,擺好多甫士之餘,仲比我抱去睇魚魚!



睇魚魚時玲玲好多野講,好攪笑!我同太陽哥講佢(玲玲)好攪笑呀,點點點啦...玲玲聽到竟然跟我講『好攪笑呀』,即學架!跟住全程勁講『好攪笑呀』,又講『爸爸好攪笑呀』,又講『媽媽好攪笑呀』,真係勁攪笑!



跟住我地去左 Citysuper 行一陣,之後就分道揚鑣啦;真係好開心玲玲肯比我抱呀,好有滿足感!不過佢就唔肯比太陽哥哥抱呀,攪到太陽哥哥有d灰心呢!



沒有留言:

張貼留言