一心諗住尋晚係最後衝刺為韓國滑雪之旅做準備，點知今晚出發，原來今日日頭都仲可偷到時間作最最後衝刺，因為媽咪尋晚睇完我影花園街既手套覺得OK，我地就決定一早再出去兜個轉！
今日亦係媽咪既生日大日子，我地先同姑媽表姐諾諾去新世紀飲茶，諾諾一見到舅婆就講『生日快樂』啦！
諾諾手上個部係姑媽的股票機，睇諾諾係股票機上面做緊乜．．．
原來玩緊『畫畫畫』！
諾諾識得自己楂茶杯飲野都唔倒瀉啦，見佢好小心咁拎住飲同放低，加埋著住件皮褸仔，好似陳豪既"嘆返杯cappuccino"呀！
飲完茶後我地就爭取時間去花園街shopping，先幫諾諾同商場既新年佈置影相～～
經過買雪褲既鋪頭，老闆認得媽咪，我地就入去吹下水，點知老闆拎左見我之前想要但當時唔岩色唔岩size既雪褸比我，一見即鐘情，即試上身，fit到爆，即買！因為我知係雪地著住影相一定勁靚勁sharp～～
其次買左四對滑雪手套：
因為太陽哥哥件雪褸係大圍屋企，行完花園街後，我就跟表姐車返大圍，跟住幫太陽哥哥返屋企拎雪褸．．．
之後仲去埋葵芳德仁大藥房買日用品．．．
掛住買野攪到遲晒，返到屋企已經五點，得返一個鐘，超迅速咁pack野、沖涼、鋪床鋪、熄晒全屋電掣插蘇、全屋safety checking、執返好整齊間屋(我唔鐘意去完旅行一返黎見到間屋立立亂架!!)、落潔廁得．．．勁趕！
同媽咪威哥一齊出發，準時七點三去到機場，先會合剛放工黎到既琪琪，點知發現威哥帶漏左琪琪千叮萬囑既鏡頭，唯有．．．威哥返青衣拎完再黎機場，慘～～
今日係媽咪生日，左諗右度後，最後決定叫晒姑媽同叔叔一家，一齊去機場酒店食自助餐，由我請客，希望媽咪過一個難忘的生日！因為姑丈同叔叔一家本身都唔去韓國既，為左我既邀請，佢地都唔怕遠咁入黎，順便當送我地機，真係好感謝佢地咁比面媽咪喇！
機場富豪呢期做緊東南亞風味自助餐，老實講啦，呢個題材一ｄ都唔吸引，但要搵一個大班人食得舒適同開心既地方，非自助餐莫屬，唯有屈就一下大家啦．．．
海鮮得呢四款，實在太少呀！連生蠔同長腳蟹都冇．．．失望！
其實普遍野：
甜品區最值得影相～～
原本諗住買生日蛋糕，點知問過要收切餅費一百元，我覺得唔抵就放棄了，諗住黎到實有辦法．．．我地已經帶備晒蠟燭同蠟燭託，開頭諗住成個cake咁捧入去，最後反而同細妹諗出DIY仲有心思同特別！
DIY蛋糕整好後，我地幾個細路就夾一夾，表姐負責錄影，我地就由另一邊捧住蛋糕入去，而最唔怕醜既表姐夫梗係發揮佢既強項 - 大聲咁帶頭唱生日歌喇！
呢個特別環節非常成功，ｄ大人好專心咁傾緊計時，突然有人唱生日歌，再突然我地捧住蛋糕步入，一切都黎得好自然、好驚喜！睇媽咪幾開心～～
大合照：
諾諾仲幫舅婆祝大家開開心心、快快樂樂！
食到九點九，我地就過返機場集合啦～～
米奇喼係諾諾架，佢係咁"及"到實一實！
跟住我地影左兩張相，一張係去旅行既人，一張係送機既人！
已經夜晚十一點幾，平時諾諾呢個時間已經訓左，但呢刻佢超開心＋勁興奮，好high咁周圍跑跑跳跳，仲知道公公(姑丈)冇份去旅行，死都唔拖住公公，淨係痴住我地幾個會去旅行既人，人仔細細都好心水清呢！同公公黎個goodbye kiss我地就入閘啦～～
我地乖搭CX412 0020起飛既航班：
已經踏入凌晨十二點啦，但大家都好興奮呢！因為我地既滑雪旅程隨即要展開啦～～
兩款飛機餐：
諾諾的兒童飛機餐：
韓國時間凌晨五點，我地就抵達仁川國際機場！
入境時我地等左勁耐囉．．．香港機場原來真係最perfect架！排隊期間，遠處望見有幅眼鐘漏左係填入境紙既檯上，我地仲話不如即刻問下邊個漏低啦，唔係一黎到旅行，冇左幅眼鐘，咩都睇唔清，好慘喎～～行近ｄ睇，原來唔係有人漏低左，係特登有三種歲數既老花眼鏡放係度比人用架！雖然韓國人做野手腳慢，但呢個安排又真係好細心喎，加返ｄ分呢！
沒有留言:
張貼留言