旅程好快就黎到尾二個日啦，真係過得非常快！今朝起身後，早餐又去左食貴刁，今次我揀左豬肉片＋豬骨！
我仲去左廚房影相～～不過呢度未必人人接受到架，可能您地睇完會嫌污糟，不過落後地方係咁上下架啦！
之後就開始全日探親戚之行，探望既全部都係太陽媽媽同太陽呀姨係柬埔寨既親戚，但我已經唔記得佢地係邊個加邊個，或者係咩關係啦，因為我地個個都叫『呀姨』同『呀古(uncle)』！
第一家：
佢地有架電單車，我貪玩坐上去影相！
第二家：
呢家有個好可愛既大眼ＢＢ：
第三家～～太陽媽媽話呢間係真正既別墅呀，入面真係好大呢！呢間既呀古呀姨好熱情呀，叫我地今晚要返黎佢屋企食飯，已經買晒餸煮比我地食架啦，所以我地夜ｄ都會再返黎食晚飯！
探左三家親戚後，我地就出發去有『小香港』之稱既郊外野餐喇，呢度有好多搭出黎既樹棚租比人野餐用既，樹棚旁既海邊係非常之靚架，成個海景一覽無遺！
香蕉樹：
呢度ｄ人較窮，所以ｄ小朋友會係咁．．．
各式食物攤檔：
我最鐘意食大蝦同燒雞，望到已經流晒口水啦！
白色個ｄ係烏龜蛋，但當然冇人買黎食架！
買完食物就買野飲～～
買埋飯後果添～～好豐富既野餐呀！
竟然意外地發現Sunny牌紙巾！
買完食物，我地就去租左既樹棚啦！
呢度風景真係一流呀，我梗係即刻揀個『窗口位』坐啦！嘻嘻～～
仲會有水上呀姨賣生果～～
睇我地買左幾多野食～～表弟太太充當好心抱角色，即刻幫大家拆開ｄ食物同埋分配餐具！今日係第一次見表弟太太既素顏 look，又真係幾靚女喎，表弟真係識揀，唔怪之會堅持，去到第二個省咁遠娶老婆都冇所謂啦！
今日呢個野餐聚會，我地仲約埋女家親友架，後面個班就係啦，食埋呢餐佢地先返屋企，咁好似話要等到新年，表弟太太先會返去探望父母啦！
每樣野對我都好新鮮，所以每整好一碟食物我都要影相！
淨係魚都三款，太陽表妹拎個條勁大呀！
開餐啦～～
前日係郊外買個個Jumbo size 蕃鬼荔枝，今日拎埋黎野餐時一齊食！真係好大個呀～～
食到中途，有小朋友係隔離個樹棚問我地拎食物，我地就分左ｄ比佢地，佢地即刻打開黎睇，但亦好奇怪，佢地唔會狼吞虎嚥，佢地只會拎係一舊食呀食，其他的都包得好好咁安放住，唔知係咪拎返去屋企比其他成員食呢？其實佢地真係好慘呀，見到佢地令我諗起係香港睇過柬埔寨既特輯，講ｄ小朋友係垃圾山執野食．．．太陽哥哥話我地到個ｄ地方未係最窮，所以見唔到好多電視入面咁慘既情景喎．．．原來我地真係好好好幸福架啦，咩都有，佢地連鞋都冇一對，最基本既食物充饑，都要等人施捨！反思反思～～
之後又有小朋友問我地有冇食物比佢地．．．佢地又唔會好騷擾我地，只係乖乖咁坐係度等．．．
右邊個兩位小朋友好地地乖乖咁坐係度食野，突然黎左三個大牛龜，我聽唔明佢地講咩，但個格似撩事鬥飛個隻囉．．．只見坐係度個兩個冇得還擊，只係坐係度無奈咁聽ｄ大牛龜講野，ｄ大牛龜仲踢跌佢地既食物呢，好衰呀！
我地一走，佢地就黎執食物啦．．．
食完野同女家親友分別後，我地又出發，繼續探親友既旅程！第四家：
第五家我地"細路幫"唔熟，所以係街度買下野食等"大人幫"算啦，呢度好似六七十年代既香港呀！
買左蔗食，好甜好好味呢！又已經切到一舊舊，唔洗成碌楂住咁食，好方便呢，唔係我都唔知點咬！
第六家～～有架YAMAHA電單車呢！
探晒所有親戚後，因為未夠鐘去返今朝第三家既別墅食飯，我地就去左商場行陣街先！不過呢度既商場好流，唔係大型shopping mall，亦唔係for遊客，我地都係黎hea下啫！
做個OK手勢既OK牌condom：
BB World係一間快餐店：
賣相好掂既雪糕：
行完商場冇咩做，我地就遊車河，係馬路中途見到大笨象呀！
車上睇埋日落，原來柬埔寨既日落都好靚架，個咸蛋黃好大好大，亦好黃呢！
之後夠鐘去親戚屋企食飯啦，呀古呀姨果然冇講錯，真係買定餸煮左好多野比我地食！佢地好好客，買左好多勁大隻既大頭蝦比我地食，仲係呀姨親自燒架！
表弟同太太呢張相，真係影得好好呀，因為平時好 cool 唔笑的表弟都笑了！
我地"細路幫"坐細檯：
"大人幫"坐大檯：
全餐飯都係呀姨親自下廚煮架，左上係鱸魚，右下係燒牛肉，成餐飯都勁好味！
潮州人好興食完飯"蓆嗲"(嘆返杯茶)，我地就順道影埋大合照，因為咁既場面都唔知幾時會再有．．．講真，唔係因為太陽細表弟出事，我同太陽哥哥，甚至太陽表妹，都唔會係香港同紐西蘭飛過黎呢！
大人幫傾計，我地細路幫就同呀古呀姨屋企ｄ小朋友玩，睇太陽哥哥幾識自娛，佢都玩得幾自得其樂丫！哈哈～～
太陽哥哥仲特登踢遠ｄ個波，佢仲話唔係同個小朋友玩，係"玩"個小朋友喎！好賤呀～～
臨別時同小朋友影相留念，下次再有機會見佢，都唔知佢變到幾大個 lu ～～
之後我地回程返屋企，返去前先去買糖水食，話晒今晚係我同太陽哥哥係柬埔寨既最後一晚！
呢ｄ係鴨仔蛋，不過我梗係唔敢食啦！
呢間糖水鋪勁多人圍住呀，係金邊好出名架喎，每晚賣到十點ｄ糖水就賣晒架啦！
由太陽呀姨同太陽媽媽發板，每款都要ｄ！
真係好多款架～～
返到去沖完涼後，太陽表妹已分好同撈好每碗糖水啦，我地就係大露台度一邊抖涼、一邊食糖水、一邊傾下計，雖然我只聽到好少，因為佢地講潮州話，但到親友們陸續回房訓覺，得返太陽表妹同太陽呀姨時，佢地會盡量就我而轉講國語＋廣東話，呢段時間係最開心既！
我地最後傾到一點先訓，聽日就係旅程既最後一日啦，難得岩岩先同太陽表妹同表弟太太建立了感情，點知就要分別，有ｄ唔捨得添．．．
沒有留言:
張貼留言