2010-08-28 (Sat) 壞蛋獎門人．上海坊．Shopping

想做的事情太多，但有限的時間太少，好在最後都比我睇到『3D版壞蛋獎門人』；得返六點前的場次，亦只得APM/奧海城，諗都唔洗諗就揀左後者！

 

如我所料，套戲好好睇呀，勁好笑！牛高馬大的壞蛋"犀利哥"，跟三個小女孩的感情好感動呀！佢本身係一個神

憎鬼厭既大犯罪家，但自生命中出現了三個小女孩後，慢慢變了做一個好人，甚至係一位好爸爸！

 

成套卡通片的顏色好色彩繽紛，構圖亦好豐富，尤其是遊樂場個幕，視覺效果好正，同反斗奇兵有得 fight！三個小女孩的造型都好可愛，尤其最細個個，好似怪獸公司的呀 Bu！反而主角犀利哥個樣麻麻地，我覺得佢好似尼古拉斯基治呢！勁鍾意另一壞蛋"屈機"的橙白 mix & match，無論係佢間大屋定係佢個造型，佢就令我覺得似張達明！ 而個隊青色機械人仔，一大堆咁出現，我覺得好似反斗奇兵ｄ三眼仔呀！

 

  

 

 

極少黎奧海城，不過睇完戲我地都冇係度逗留太耐，因為想出返旺角shopping同食飯，門口就有小巴出旺角，好方便呀！

去左上海坊食晚飯，我地唔太肚餓，只係叫左兩樣野！

跟住去了Chocoolate行街，因細妹話呢幾日七折，勁抵！我勁想買野，但行了三轉女裝，睇完又睇，全都係波點同橫條，我之前都買了好幾件，太陽哥哥都話好似差唔多樣喎，最後我零收獲；但我真係勁想買野，好抵好抵麻，於是不自覺咁將購買慾轉移到太陽哥哥身上，係咁揀ｄ唔同顏色既 tee，再推佢入試身室試，最後佢睇岩的兩件反而著出黎唔鍾意，我個ｄ佢就好滿意！梗係啦，我係佢老婆，當然知道咩 style 岩佢，唔洗著上身已估到八九成啦！佢呢排送左咁多野比我，我今日又開心，咁碎料就由我埋單啦！

最後再戰吉之島十蚊店，呢排我地一出旺角，臨返屋企就好自然會上去行個圈；因為廚房只得一個洗手盤，旁邊又放了微波爐，洗完野平時只係放係雲石度掠乾，今日買了個幾實用既掠碗碟兜，very good！仲有甜品紙兜仔，想搵日試下整芒果糯米糍呢！