2009年2月1日 星期日

2009-02-01 (Sun) 年初七.家有喜事2009


今日年初七,人日呀,係度祝大家生日快樂,日日都咁開心!


我就繼續逗利是先,今日同曾維叔叔飲茶,佢睇住我地出世到長大,識左好多好多年架啦!




我都睇住佢結婚生仔架,呢個係佢太太:




呢個係曾維叔叔個仔derek,我係咁叫佢做呀發(珠光寶氣入面關禮傑的角色)!佢好勤力同生性,同威哥雖然同年,但人地成熟同聽話好多,仲識得自己搵錢,唔要呀媽比既錢,著衫又唔重牌子,知慳識儉,如果威哥好似derek仔咁,我同媽咪就安心好多啦!


derek仔以前都做過麥記呀,山頂個間store,個度個經理winnie我都識架!




跟住過左天后接太陽哥哥放工,做個廿四孝女朋友,哈哈!





之後返旺角睇 "家有喜事2009",其實我冇咩興趣入戲院睇呢類鬧劇架,但見有古仔同中基,不過一心諗住就算睇,都排到最尾,因為呢期實在有好多戲都想睇,仲有"游龍戲鳳"同"3D版零零狗";太陽哥哥都想睇"游龍戲鳳"同"家有喜事",所以預左同佢睇既,"3D版零零狗"我就約左朋友今個星期六睇;所以今日只係"游龍戲鳳"同"家有喜事"二揀一!


不過今日係weekend呀,唔係吉日睇戲,我話左唔會再係weekend同太陽哥哥睇戲架麻,今日太陽哥哥楂完車呀,我唔想佢睇華仔會訓著,咪揀左笑片,咁佢應該唔會訓啦!哈哈!估唔到華仔個套到宜家都未睇...唉!


不過呢套我一心以為係鬧劇既戲又幾好笑,始終有君如、古仔同中基,都係我唔抗拒既人,佢地本人係攪開笑,拼埋一齊見到個樣都好笑啦,哈哈!不過劇中個兩個新大陸演員我就覺得好麻麻喇,一個就算哨牙好返後都唔覺得靚,另一個就扮可愛過火得滯,原本都幾清純幾靚女既,不過扮cutie over左,我有d頂唔順(純粹個人意見)!


家有喜事2009 (2).jpg
 



跟住發現上次影波兒展覽既地方多左舊野係未曾見過既,上次冇架!




梗係又要去影下先心息啦,又會咁既...會唔會過兩日又唔同架,我咪要影好多次先影晒?!





仲有把波兒扇仔派,後面可以用黎去玩"釣波兒",好似釣金魚咁玩喎,不過要排隊,我地冇入去玩呀!




沒有留言:

張貼留言