2008年12月31日 星期三

2008-12-31 (Wed) 再見2008!!

Picture
 
 
Picture
 


今年的2008除夕我好開心,因為同我三位好知己朋友一齊過,當然都有太陽哥哥啦;雖然只係幾位朋友,冇上年一大班碌齡朋友咁熱鬧,但我都好開心,係另一種感覺,因為今次係第一次同埋我的best friend TRACY一齊countdown,心裡有說不出的興奮和感動!


多謝細心的TONY前晚幫我地訂到一間氣氛幾grand又坐得耐的餐廳,等我地可以慢慢享受晚餐、聚舊傾計,因為呢餐應該係JACKY以未婚身份跟我地最後一次聚舊,意思係四位好朋友仍係未婚身份的最後一餐,好有紀念價值呢,哈哈!




我地去左位於麼地道的"正宗印度餐廳"食我地2008年的最後一餐,呢個係一坐低就送上的"前菜",不過味道...好怪!




我地叫左好多野食呀,呢個尼泊爾餃子好好味!




唔少得薄餅啦,一咸一甜!





三款咖哩分別係魚、茄子、雞!






鐵板拼盤有海鮮又有肉類!




炒飯辣辣地,岩晒我口味!




食完送上下面呢碟野,我地覺得好怪呀,唔知係咪比我地清口氣呢?青青地個款好似比雀粟呢...白色個款係糖粒,紅色個款又係甜甜地架!




食完野梗係影下相啦!








今日仲有特備節目,就係預祝TRACY一月的生日,雖然一月十四先係佢正日生日,但佢下星期三就走啦,而佢好少係一月返黎香港架,所以今次返黎過到幾日一月都算好慶幸架啦!


係TRACY同JACKY未黎前,我同太陽哥哥同埋TONY已一早去左買禮物同咭啦,仲匿係麥記度畫公仔添!支鉛筆好難先班到返黎,成間麥記都借唔到,最終太陽哥哥走左去KFC先借到架!




霎時間都冇TRACY近照,唯一係手機裡幾年前的照片,頂住先啦!





我地利用檯上的蠟燭,順理成章唱首生日歌同扮吹蠟燭,好攪笑好開心!TRACY聽到我話太陽哥哥唔係成日肯出手架,係我叫先會後,好開心咁多謝太陽哥哥呢!






我地十點三埋單,出發到海旁倒數,出面好凍呀!





點知黎到太空館呢頭已經好多人,根本行唔到去海旁!見到咁,JACKY提議過IFC,佢舊年都去過唔錯,雖然睇唔晒全景,但起碼睇到煙花,企係度倒數實乜都睇唔到!





出發到香港站,頂頭的水晶燈好靚呀!






我影影下相時,突然幾個外國人衝埋黎攬住我,把口係咁講HAPPY NEW YEAR!! HAPPY NEW YEAR!!,,我同太陽哥哥都唔知咩事,以為佢地作下狀擺個甫士就走,點知佢地hold住唔郁喎,太陽哥哥咪拎起相機諗住幫佢地影張囉,點知佢地係要帶埋我入鏡喎,真攪笑!其實中間個鬼妹都幾靚幾索呢,佢地著咁少,唔凍咩?哈哈!




今年我見到聖誕燈飾,都冇衝動行埋去影,但同TRACY一齊,就會想影低留念呢!





等JACKY去洗手間時候,我地又不忘自娛一返!講真,都係因為TRACY係度先有呢種"張力",佢係度我先有動力去攪下笑氹佢開心,哈哈!






IFC的聖誕摩天倫係身邊朋友既相都見過不少,既然人都黎到,就影低留念啦!





Picture
Picture
  


呢邊冇尖沙咀個邊咁多人,但靚位已被霸晒,我地只可係呢個街燈+路牌位下搵到位咋!唔知係咪係海邊,好鬼凍呀!


仲有半個鐘先夠十二點,我地就拎住大拉炮出黎影相!但我好失策呀,唔記得拎晒d拉炮出黎影,因為下午特登同太陽哥哥過去深水埗買架,仲買左一打呢!因為一支@$30,一打十二支先$208,抵咁多!大家估下d拉炮有幾長?係足足80cm呀,半個人咁高呢!最攪笑係淨係得我地幾個有呢,其他人眼金金望住呀,好攪笑!






最衰盞眼燈阻住晒啦,但冇計啦,十一點半黎到有個咁既位,算唔錯了!



WELCOME TO 2009!!






最精彩的煙火部份拍了movie!



成地都係我地的紙碎,最攪笑只係我地個位先有,梗係啦,成打80cm高既拉炮喎,哈哈!2009年第一件事竟然係做左垃圾蟲呢,哈哈!



以下係TRACY給我的手信+禮物,微波爐爆谷香港好少有得買,極鍾意份 playboy underwear禮物,因為我係二月之星,MISS FEBRUARY...TRACY真有心思!




2008除夕令我好難忘好開心,大家亦可回味下上年的的2007除夕我係點過既;話咁快就過左一年喇,2008年唔係咁順利,金融海嘯亦都影響左我心情,希望2009年各方面都順順利利,如如意意,而身邊所有屋企人同朋友就和和氣氣、開開心心、身體健健康康!HAPPY NEW YEAR!


 
 
 


沒有留言:

張貼留言