2008-12-06 (Sat) 28個月紀念日

跟太陽哥哥第28個月紀念日啦，但今日都幾辛苦，因為要返早上PT，七點就起身了，太陽哥哥當然更辛苦啦，佢五點幾就起身開工；因為今日係紀念日兼我又過海返PT，約左佢八點幾係銅鑼灣食早餐，佢仲車我過左灣仔活道個邊食呢！

跟住就各自各返工賺錢啦，我返到下午一點半就放工啦，但太陽哥哥仲有三個鐘先放，我就去左 time square 等佢；今朝又凍又肚餓，食早餐時食得又急又多(因我食埋太陽哥哥件多士呀!!)，十點幾就開始胃痛，PT個度又冇藥．．．所以一放工就去左pacific coffee休息，中間仲攰到恰著左添！

充電後就當然行街等太陽哥哥放工啦，間間舖頭都做緊sales，IT旗下舖頭最少都有七折，開頭都係齋睇咋，因為知好快應該半價，但睇中左後又心郁郁，怕之後減價仲混亂，我好怕好多人ｄ衫又亂晒籠．．．等太陽哥哥黎到後，得到佢認同應該買既情況下，由齋睇變左堅買，哈哈！因為第三件會有額外半價，所以買左三件衫，紅色個件仲係太陽哥哥幫我係女人堆中搵到既筍野，好鐘意，醒目！

埋單時個sales話憑單去IT旗下舖頭買野，會有現金回贈；比如張單$500，買$1,000以下既野就最多回贈返$500，同50% off 差唔多！因為咁，我地又行呀行，行埋去金百利 izzue，不過冇咩收穫，只係超攰．．．去左starbucks休息，諗緊點運用呢張單，因為只得三日有效期，最後決定去葵芳行埋，順便試下未試過的"小城知味"！

"小城知味"開左好幾個月架啦，但都未有機會試，今日係第一次光顧，見個二人餐好抵食，我地就扑鎚啦！

我地揀左：老火靚湯(蓮)、酸辣湯、小籠飽、香油飯、花刁雞、脆皮素鵝、紅燒肋排、燒汁野菌豬手。

呢個二人餐真係又豐富又抵食，係個紅燒肋排差少少，其餘款款都唔錯！