聖誕就快到啦，情侶們通常都會去食個開心聖誕buffet，我同太陽哥哥都有諗過，但邊日食其實冇所謂既，最重要唔想比人"掠"，所以原本諗住今日去萬豪食，早一個星期平ｄ麻，可惜上個星期book時，原來成個十二月full 晒了，唯有waiting list 啦，聽同事講先知，如果book萬豪或香格里拉等，十一月就已經一早book 晒架啦！
我地期待住waiting list，希望有人唔去，點知．．．最後都冇份，但唔緊要啦，又唔係第一年同太陽哥哥過聖誕，我地上兩年已係平安夜正日食過兩年聖誕buffet 啦；加上佢已經有第二手準備，就係book左我鍾意的pokka cafe，仲要係窗口位呢，真細心，嘻嘻~~
pokka 無論邊間分店，食物質素都好高，樣樣野都好好味呀！
呢個牛扒三重奏其實好耐之前同事聚會都食過，好回味所以今日介紹比太陽哥哥，佢都好鍾意呀！
我地對Carbonara意粉情有獨中，五月時係泰國食過一次後就返尋味，我之後就記住呢個名；pokka都係第一次食，不過略嫌cheese味重左，同落左我地一向唔太好的鹹火腿！
食完出黎對面就係維園工展會，我咁大個女都未去過，太陽哥哥就話入去行下！
原來工展會賣好多野食，咁點解會叫工展會而唔係食物節既？？
去到已接近九點，得一個鐘時間，所以我地冇仔細睇，只係想去美食廣場個邊睇，因為見報紙話有蚵仔麵線同鮑魚呀！
行緊途中，當然唔放過任何jumbo size既野啦，我最鍾意架麻，所以拉埋太陽哥哥影相！雖然好低Ｂ咁，但睇返好攪笑丫，有ｄ仲設計係個booth既頂，太陽哥哥仲叫我快ｄ爬上去影呀，哈哈！
呢兩個booth佈置得好靚呀，一望過去就搶晒其他booth鏡！
係美食廣場我地周圍睇下有咩食，蚵仔麵線賣相麻麻，唔知係咪放左成日，覺得ｄ麵線好似林pat pat咁；最後試左路人甲極力推介既"花膠翅"，我仲用懷疑既眼神望住佢，佢就即刻努力澄清佢唔係做媒，又係咁解釋佢係熟客等等；見太陽哥哥平時都鍾意食碗仔翅，我地都買碗試下！
落左花膠既碗仔翅真係第一次試！
食完翅就搵鮑魚食，間間都大概三十幾蚊一隻，始終唔知咩質素，我地揀左間五十蚊三隻黎試；不過鮑魚始終係貴價野，唔好抱好大期望，好細隻架咋！
咁睇ｄ鮑魚又好大隻喎~~
呢隻超級大鮑魚雖然係假，但又整得好鬼似，有層汁係面，令立立！諗返ｄ鮑魚又真係幾好食，宜家諗返都流口水添，工展會好似仲開好耐，如果有朋友有免費飛唔要比我丫，等我入去食下鮑魚都好，嘻嘻~~
除左食，我地只係買左一樣野帶走咋，就係下面的壽桃牌食品，都係貪ｄ杯粉絲抵食可當早餐，下面所有野夾埋只係$60咋！
見到2009 JAZZ係抽獎頭獎呀，我都想要．．．但明知冇可能，影張相算啦！
值得一提係今日過紅隊時見到一間好罕有同型既跑車，即刻影低左！
沒有留言:
張貼留言