2009年5月19日 星期二

2009-05-19 (Tue) Happy Birthday to 太陽哥哥


今日係太陽哥哥的孖三生日,死梗...我實比佢打!嘻嘻~~我知佢好恨係外地過生日既,上年我就成全左佢呢個願望,幫佢達成左第一次係外地過生日的心願;其實今年原本都可以架,記得我地的大日子原本係上星期六嗎?如果冇改過,宜家應該去左honeymoon啦!真係有d遺憾,除此之外,我地亦要儲錢結婚啦,佢又冇咩假,真係要儲起黎等結婚用...所以今年太陽哥哥的生日,要係香港過...


生日最正路梗係食自助餐啦,不過覺得冇咩新意,加上母親節又食左餐,今次我心郁郁想試d高級餐廳,見yammy去過幾次dap食得好滋味咁,又上過openrice的確好多人捧場,今日一於去試下!


dap Modern European Restaurant
地址:佐敦柯士甸道102號一樓
電話:3526 1228




聽人講呢度燈光好暗,我都有心理準備,一開lift門真係好暗呀,又無人,好似未開門咁,驚驚地呢!




餐廳入面都好暗,一定暗過呢張相好多架;呢度都幾elegant 幾 grand,雖然燈光昏暗,但環境帶點 romantic,真係名符其實candle light dinner,全店只得十幾張檯。



水晶燈好靚好大!




每張檯都有一個小蠟燭,呢種暗度就似餐廳本身喇!呢度好靜呀,太陽哥哥話講野要勁細聲,切野食都唔可以有刀碰碟的聲音,成日"薯"我,哈哈~~不過講真,我相信琪琪更加唔可以黎呢度食啦,佢d笑聲咁驚人,實忍得勁辛苦啫,哈哈!




我地叫左橙汁任添〔$40 x 2〕,呢度水都要roder架,所以一定要叫野飲,唔係就失禮人架啦!



麵包籃係free既,有四款兼好多片呢,不過我地都冇食到有芝麻個兩個!




帶子湯〔$72〕:




香煎鵝肝〔$63〕:



上面張相睇唔出呢,其實舊鵝肝好細碟架咋,太陽哥哥衰衰咁要我一定要影低呢張相!哈哈~~




主菜有辣蕃茄汁海鮮意粉〔$178〕:



法式燒小乳豬伴醃鮮葡萄〔$238〕:




碟牛油都要吱住花咁上!



個湯入面有兩粒大帶子架,正!




鵝肝係貴價野,所以真係好細碟,不過係我自己揀side dish既,因為我未試過食正宗鵝肝,驚叫主菜size唔鐘意食就幣,鐘意食鵝肝既朋友可揀main course款,大約二百蚊度;呢碟香煎鵝肝一上檯已有陣陣香味,咁細碟都咁大陣味真係勁喇,我第一次食,感覺好好,好鐘意;但太陽哥哥就麻麻,佢話一pat野咁,似豬潤喎,佢就唔太識欣賞啦喎,哈哈~~




兩款主菜都係跟yammy order既:


辣蕃茄汁海鮮意粉好好味,亦係太陽哥哥最鐘意既菜式,蕃茄汁佢飛弗黎架!d海鮮好足料亦好高質素,我未試過食意粉係有龍蝦同咁多蝦,仲好帶子...總之料多過意粉,似食海鮮多d!



因為print了openrice coupon,法式燒小乳豬伴醃鮮葡萄可享有半價!乳豬皮好鬆脆呀,食薯片一樣;食落亦好多肉,足料;醃鮮葡萄帶點酒味,但我同太陽哥哥都唔好酒,只食左兩粒咋!




訂檯時已為太陽哥哥生日做好準備,無論叫咩甜品都好,到時都會幫我寫字同點住蠟燭咁上,算係一個小驚喜啦!雖然比太陽哥哥話我抄佢,因為我生日食buffet時,佢又係事前叫左酒店安排左有我個名既蛋糕;但如果連呢樣野都唔預備的話,未免太冇誠意攪生日吧!


最後比太陽哥哥揀左dessert platter〔$58〕:




影多幾張先,咁難得喎!




吹願+吹蠟燭:




吹完蠟燭諗住食甜品時,就係我show time喇!


太陽哥哥一路都話冇咩特別野想要,叫我唔洗晒錢買野比佢,有錢就留返結婚用...但我知佢好想要一樣野,而呢樣野,價錢都幾貴,所以佢都唔會叫我買比佢,因為呢個價錢好少係情侶之間既禮物掛...


westwood card holder?係就係...不過係整古佢啫!呢個card holder係細妹舊野,係屋企見到,就把心一橫,借黎用黎整古太陽哥哥先!




真禮物就係...i-phone一部,仲要係16GB,high d 個隻架!梗係啦,我一係唔出手,一出梗係唔得失禮架麻!(肉赤+ing~~~)




但成個四方盒比佢,好易估到喎...於是我就將電話抽起...



就咁包住...



再放入盒仔...




生日咭實要有啦!




睇住太陽哥哥拆禮物、見到個女裝card holder、O左咀但又好快扮冇野咁講多謝個樣(d咁既紋既pattern, 我好肯定佢唔鐘意架!! 不過佢話見到係名牌野, 冇理由我買黎玩佢咁晒喎!!)...跟住到見到部 i-phone 時好驚喜個樣、再睇我張咭、跟住...眼濕濕繼而流左幾滴眼淚...真係咩都值得啦!


佢話好感動呀,話我好錫佢,冇諗過我會買部 i-phone 比佢做生日禮物...問心啦,呢份禮物就咁睇好貴咁,我的確都未送過咁重禮,但對比佢平時咁錫我,又請過我去北海道旅行啦,又間唔中買埋dtiffany比我啦,雖然唔可以咁計,但其實真係小毛見大毛啫;同埋兩個人一齊,您錫我多d,我咪又錫返您多d囉,唔可以只係收,唔比出去架麻,加上佢都就黎係我老公啦,咩都定晒,所以冇計既~~


其實呢個價錢都可以兩個人去到個旅行架,我都有掙扎過,不過我了解佢,一個做design既人,係超崇尚apple所有products既,咩mac機呀mac book呀;i-phone未係香港有得買時已見佢眼甘甘啦,跟住出左都一段日子,但一路以黎,佢有錢都會揀儲起黎作結婚之用,都唔捨得買自己想要既野乜滯,佢咁為我地既將來,我都要慰勞下佢;仲有呀,佢平時做野楂車咁辛苦,做足七日喎,真係唔係咁多人捱得住架!有時冇時間陪我,仲要比我EE哦哦添呢!


所以我估比佢揀旅行同 i-phone,佢會揀 i-phone既,但起碼旅行我都有一半受惠丫,哈哈~~講笑啫,總之今年雖然去唔到外地過生日,但都希望佢收到有如去外地過生日既驚喜啦!〔其實我呢招係拋磚引玉,唔係第時點換架車返黎呀,哈哈~~〕


其實太陽哥哥拆禮物、睇咭、感動到喊...以上過程我有拍低movie架,成個過程大約五分鐘,但唔知點解返到去插張咭落電腦時,搵唔到個movie!試左五個recovery softwares都搵唔返...究竟係錯手delete左,定根本一開始都冇禁制,我都唔知了...總之係十萬個upset同unhappy啦,因為段片我覺得好珍貴架麻!



呢幢大廈既lift我第一次見,係出面禁制想去邊層,跟住會示意您去邊架 lift,入到lift入面係冇制架,亦唔需要再禁制,好得意呀!



但太陽哥哥話對面海都見過好耐啦,睇黎係我大鄉里呢!




太陽哥哥收到好多祝賀,其中琪琪呢個好爆笑呢!仲有CW,MCCW我睇左陣先知係邊個,咁快就咁稱呼自己呢,真有心!



 



沒有留言:

張貼留言