今日其實好唔舒服架，但有重要事情要辦，就係．．．揀結婚當日既衫！加上今次約埋了Phoebe，佢係我當天的stylist，佢好忙架，我一個月前已約好左佢今日，所以無論如何都唔改得！
知道自己成日有選擇恐懼症，今次又要揀衫都幾擔心架，今次仲要揀五件喎，上次揀衫影婚紗相，三件衫都揀左兩次啦；我估計今次要幾個鐘先揀到晒ｄ衫，四個鐘都唔知夠唔夠，仲諗過驚人地夠鐘close都未攪掂添！點知非常出奇，我竟然係兩個鐘內攪掂左，睇睇錶都唔信自己咁快手，講比Elsa知佢都唔信啦！乜我麻煩咩？其實都唔係丫，哈哈～～
今次揀得快，好大可能係影婚紗相的經驗，我已好清楚自己著咩cutting靚同鍾意咩顏色，所以縮窄左好大範圍！
今日Phoebe先陪我去，太陽哥哥就後join，就比大家睇下我揀左咩衫啦！
婚紗．．．好重要，今次亦係最後一次著啦，點知我一試即岩，只係試左一千零一件就扑鎚！其實係上年十月join呢個package時已經試過，當時未落訂都可試衫，我地見試左五件都有兩三件鍾意，就係咁先落訂，無睇過其他舖頭；而呢件婚紗當時都試過，一見鐘情，尤其是太陽哥哥都好鍾意呀！今次重試，感覺一樣，所以唔洗試其他都好肯定就係佢！
雖然我一向唔太鍾意漲卜卜，但婚紗．．．點都係要隆重ｄ既，咁先似結婚麻；我最怕好多厘士or一層層蛋糕裙個ｄ好誇張既款式，而呢件前面的一開二款式，我覺得簡單得黎又特別，特別得黎又唔誇張！
而尾部的拖尾．．．係就係幾靚，但我當時心裡面諗：著住佢咪好麻煩？
雖然我呢個諗法好怪，但太陽哥哥同Phoebe都話好靚，咁就唔諗咁多了！
撇開怕麻煩，其實我自己覺得個蝴蝶仔好可愛，到時我應該會加多個大少少既蝴蝶添！
晚裝方面，顏色已諗好，喜好有黃呀藍呀或者蘋果綠，揀唔到先考慮粉紅色，因為我著唔到深色麻；每隻色只揀兩件去試，好狠心呢！
呢件個色就鐘意，夠sharp，sharp得黎唔老；不過個款唔鐘意呀，唔太鍾意娃娃裝，好似大肚咁．．．
呢件未試時，我同Phoebe都覺得好普通同麻麻地，不過試完我又著得幾靚喎，carry得唔錯！哈哈～～ 我唔鍾意太誇張，小拖尾我已經好鍾意了；又唔洗著鋼紗，正呀！
我好鐘意黃色架，影婚紗相著過，結婚當晚都好想著多次，因為著得靚麻，哈哈～～ 奈何．．．呢度黃色款只得兩件咋！
呢件．．．我諗冇咩人會贊成啦，我覺得下身成把掃把咁呀，哈哈！我都話唔鍾意誇張漲卜卜款架啦，唔係我會諗到好多藉口架！
呢件一睇就係my cup of tea啦，都係呢ｄstyle適合我，不過美中不足係個色唔夠sharp，但係唯有鍾意的黃色，就扑鎚啦！
以上個ｄ都係confirmed架啦，我自己就好滿意同好鍾意，亦係三個人既意願，都係一致通過，所以過程好快好smooth！
不過有少少擔心，有人提到結婚要誇ｄ去盡ｄ，但我個ｄ款好似差唔多，亦唔夠誇張同唔太sharp色．．．希望到時影相都靚啦，希望唔會揀錯啦，唔係我又後悔架啦！
敬酒個件同褂，就有保留喇！紅色，我一向極度抗拒架，但奈何褂同敬酒都要帶紅，走唔甩．．．亦因為有紅，所以未confirm，因為冇一件著上有好鍾意的感覺！
先講敬酒，呢件只可講OK，款式鐘意，仲好似我影結婚相個件婚紗呢，腰間有朵花同小拖尾，鬼叫我專一，鍾意都係黎黎去去個ｄ款，冇辦法啦，哈哈～～ 我同Phoebe都OK既，不過太陽哥哥話麻麻地，同埋好似好多白色，驚唔太好．．．所以未能通過！hold住先．．．
呢件半年前試過，可惜件衫今日出左街冇得試，post返舊相先。比唔到真身Phoebe睇添，齋睇返呢張相，其實我地三個都OK架，不過記得問過媽咪、細妹、Elsa、May都覺得麻麻地，Phoebe話要搵日試上身比佢睇真ｄ先，佢始終係我stylist，佢點頭我先OK架！hold住先．．．
到褂啦，真係冇咩好感．．．雖然個個都話冇野，幾靚添，但我就係對褂一ｄ興趣都冇，好熱好焗，箍住條頸，好難頂喎，好唔想著！
褂一世只可著一次，所以試身時只可穿上身，太陽哥哥話要影呢張穿崩相喎！
迫我著褂呀啦，我都要迫返太陽哥哥著男褂，我會叫呢ｄ做 box仔衫！
睇佢幾乖，平時紮紮跳串串貢，係外人面前就唔敢出聲，咁難得我梗係影低佢啦！
著完一層，本性已開始暴露出黎啦，係度整古做怪～～
繼續整古做怪＋ing～～
老實講句，大家都覺得太陽哥哥著得麻麻地，好似oversize咁，佢就更加唔洗講，一開始已講到明唔想著，只係我諗住如果我著褂，佢著box仔衫兩個先襯，除非我唔洗著褂啦，所以都係hold住先．．．
仲有第二隻色，不過即foul啦，成件老爺衫咁，又老又沉，睇睇下仲似呀嫲添呀！
太陽哥哥唔想著，一路試就係咁彈，但同一時間又係咁玩喎，又扮大哥又耍拳又耍功夫，睇相都知佢試得幾咁開心啦！連試身姐姐都忍唔住幫左我講一句：唔係喎，我見您著左之後好開心好enjoy喎！
佢即係唔敢再玩再笑啦，驚我迫佢到時著吧！哈哈～～
近年新興西式褂，取替傳統既褂，不過呢度得兩三件，選擇唔多，而其餘兩件仲係low cut；我覺得西式褂取替傳統褂可以接受(因為我本身唔鍾意傳統褂麻, 梗支持啦, 哈哈~~)，但取替得黎太暴露就唔好，始終係著住黎出門同斟茶麻！但唯一的呢件又冇個種好鍾意既感覺，所以就hold住先，試身姐姐話六七月會返多幾件西式褂，因為西式褂越黎越受歡迎啦，咁橫掂遲ｄ都要帶兩位媽媽黎揀衫，唯有到時再黎試過啦！
冇諗過咁快完成揀衫過程，之後我地返旺角等太陽爸媽食飯，太陽媽媽剛係大陸放工返緊落黎；係等佢地期間，醫下肚先，呢間肥姐小食店ｄ橙色東東好好味呀，一律五蚊串，而大生腸同大墨魚就十蚊串，十蚊串係貴ｄ，但真係好爽口好彈牙架！
晚飯帶太陽爸媽食海南雞飯，一家人食飯好開心呢！
沒有留言:
張貼留言