2007年11月22日 星期四

2007-11-22 (Thu) 腳傷 & BeBe last day & 3D魔戰王 (with Tracy)

今朝睇完醫生,醫生即比病假我至聽日,發生咩事呢?其實星期一左腳(腳趾公下面肥嘟嘟個舊肉)開始有dd痛,星期二朝早就睇醫生啦,醫生比左d消炎藥;食左兩日都未見好轉,反而更紅更腫同更痛,我就今朝再睇,順便睇報告;醫生都話嚴重左,換了另一隻消炎藥比我,再加痛風藥;雖然測試係冇事,但佢話未係最痛時抽血驗有機會未係最準的,因為我係星期二抽血的;呢隻痛風藥負作用係會痾,一痾就要停食,唔痾就冇問題!大家可睇下,左腳腳趾公上下都較右腳的厚同腫!



睇完醫生後冇即刻走,因為有個重要lunch要食野,因為今日係BeBe last day,一早約好左食lunch既!我地去左麥生飯堂,飯後亦有留念拍照!



跟住去左Tracy屋企休息同訓覺,佢住青衣城,去佢度仲近過我返自己屋企啦;因為買左飛今晚要睇3D魔戰王,費事走黎走去!約埋Tony放工後,我地先去Freshness Burger食少少野先;太陽哥哥係對面海過黎食唔切,唯有等食我既愛心外賣啦!



今次係大家第一次睇3D電影,大家都好有新鮮感,就好似迪士尼既米奇3D短片咁,d野蒲晒出黎,係側邊飛過,好得意,幾特別!迪士尼只係幾分鐘,今次就係全套戲!呢套戲內容一般,d中文翻譯仲好三級添...但如果要為睇3D效果,就好值得睇喇!我睇到尾先知d人物係畫出黎,我仲以為係真人黎添!其實近鏡時我都覺得d人有時有d假假地咁;到尾段我同太陽哥哥講個魔女好似盜墓者羅拉呀!太陽哥哥話係佢黎架!我話佢唔係大緊肚既咩?太陽哥哥話呢d人係畫出黎架,唔係真人黎架傻妹!我個時先知...唔怪之啦...哈哈!



3D眼鏡...太陽哥哥話我戴到好似戴左潛水鏡咁,哈哈!真係好似,因為太大了;仲戴到夾住個鼻,呼吸都有d唔舒服!係度比個tips大家,睇3D電影,最好揀中間後多幾行,因為個職員話最正個位係係正中間,但我地覺得太前了,有d暈同眼花的感覺,好在我地個場無咩人,幾乎任坐咋,所以我地調後黎坐,唔係對眼實攰死!



睇完戲後我地食埋宵夜先回家,太陽哥哥係度真好,我地三個朋友仔可以一齊影相留念了!tony仲話太陽哥哥咁識擺pose,果然比我訓練有素,哈哈!臨走時太陽哥哥同tracy講的一句"祝您一路順風,永遠成功!" ,笑死佢地了!



沒有留言:

張貼留言