2007-09-02 (Sun) 買姊妹裙 & 泰式晚飯

今個weekend重要任務係買姊姊裙，因為下下星期六就要幫陸氏夫婦做姊妹啦，再唔買真係趕唔切！

尋日買了這條灰色波點雪紡裙，但去到佢地屋企，咁岩各人係度，可惜劣評如潮，咩似檯布，咩好老．．．攪到信心大跌，不過著上身真係唔係太岩我，因為無修腰，真的有ｄ似大左肚呢！因為當時冇得試，但又覺得靚，就買左，其實貪佢雪紡，諗住grand啲，點知佢地反而覺得唔夠grand！吹帳！

今日同太陽哥哥諗到條絕世屎橋，屈佢比我換其他野，點知成功左，十個yeah！！換左呢條連身裙，雖然未必著到去做姊妹，太普通了，但起碼平時都著到，唔會晒左ｄ錢．．．不過都勁肉赤，因為呢條連身裙要成接近成四百蚊呢！唔係要換，我平時見到真係唔會買，又唔係超靚，但聽聞個牌子"silent worth"，係頗出名的日本定唔知韓國牌子喎，話睇開時裝雜誌就會識，係咪真架．．．有冇人話到我知？

今日經過"街知巷聞"，忍唔住又想試糯米糍，今次試左芒果豆腐、黑芝麻同新出的馬荳糕味；芒果豆腐勁好味呀，係我試過兩次共六種味道個人最鐘意的，可能我唔鐘意食椰絲，所以呢個味係我覺得no.1的，下次一定會再試！另外兩種好麻麻地，應該唔會再試了！反而上次的木瓜味可再試（又係無椰絲的，嘻嘻），其實芒果豆腐都唔錯，但係有椰絲呀！

之後返左沙田IT行街，因太陽哥哥識得有個朋友係個度做，買野七至八折，包括izzue、b+ab、chocolate，仲有其他日本牌子，好勁好抵囉！我地掃左好多貨，不過只係試晒同埋晒單，未拎得住架，拎到後再post比大家睇睇我地ｄ戰利品啦！

夜晚去左大圍食泰國餸，好好味！