2010-05-23 (Sun) 主婦甚艱難．太陽家半海鮮餐

 

今日係屋企吸塵打掃，去到騎樓發覺．．．大鑊～～洗衣機同雪櫃下面都濕晒！

太陽哥哥又返緊工，無計啦，都要自己攪．．．先拉開雪櫃．．．

濕成咁．．．然後抹抹抹～～

抹完雪櫃個位，就移個洗衣機去另一邊．．．又再抹抹抹～～洗衣機呢個位好污糟呀，超唔想理，但又唔得喎！ 最後發覺係睡房冷氣機滴水先攪成咁，因為咁多年都冇駁喉係去水位度，都相安無事，可能部冷氣機老啦，開始會滴水；但太陽哥哥話無論冷氣機新舊都好，都會有水出哥喎；但咁多年一路都冇出過，又點解呢？

一個女仔咁樣搬法，攪掂完我成個人已經癱左，做主婦原來唔係一件易事呀！

 

夜晚返太陽家食飯，經過葵芳就shopping一下獎勵自己，買左三件衫，勁開心！

今日太陽媽整左半海鮮餐，我最鍾意食椒鹽瀨尿蝦！

蟹都好大隻，但我唔鍾意剝蟹乜滯，所以只食左半隻！

睇獎門人時，我叫太陽哥哥同太陽爸爸試下玩"口不對心我最勁"，攪笑！