2009年11月22日 星期日

2009-11-22 (Sun) 台灣遊 Day 9 - 台北:西門町.台北西站.國光客運 -> 香港


今日係我同太陽哥哥既結婚2個月紀念日,好開心仍在外地,能令今日變得特別一點!所以今日個網誌標題應該係:結婚2個月紀念 暨 台灣遊 Day 9,不過太長寫唔到呀!


今日就返香港啦,時間又會過得咁快既...雖然好唔想走,但都要面對現實,跟住要接受,然後就...即刻出發去買野,作最後衝刺! 先去樓下老天祿,呢度好似七八點就開啦,因為尋晚黎時close左,我地今朝九點幾就黎啦!



之後去埋買黑橋牌,但唔記得影鋪頭相;以上兩個地方買左以下手信:




跟住到我啦,前日睇中個Porter袋,最後一日總會更加心動+心軟,加上售貨員姐姐教我地點睇dlogo,從而認識邊d貨品會出口,邊d唔會;原來成個士兵人行路就會出口既,即係我頭上個logo;而只係得個士兵頭,即環保袋上個logo,就唔會出口(除非特別原因)...見佢講到咁與別不同,就決定買啦!


今日紀念日咁岩又有禮物收,多謝太陽哥哥! 




買晒野就去食lunch,去左食意粉~~



d包同個湯真係超好味,意粉都唔錯!




之後經過西門町成日攪簽名會既地方,見到袁詠琳呢個女仔...我唔識佢呀,但聽佢唱歌都幾好聽,仲話佢又識彈珍又識彈結他仲識踢波,同周杰倫仲互相作曲添喎...




大約行到三點半,我地就返酒店拎行李,要出發去機場啦!



見到d小販檔,又忍唔住買黎食,試最後一次呀,因為今次一別,真係唔知幾時會再黎,實在黎過台北好多次啦!藉口藉口~~



突然有人叫我:林太!林太!


拎轉身,一對唔識既人係我面前對住我笑,我就叫住太陽哥哥啦,原來呢位靚靚女仔係太陽哥哥既朋友,我地結婚仲有黎飲架;太陽哥哥問我認唔認得佢,我話唔認得...真係失禮死!


佢地係冇約過同唔知對方黎台北既情況下,竟然係咁旺既西門町鬧市度撞到,真係好有緣呀!!!感覺就好似上次我地係日本好旺既原宿街頭,係冇約過同唔知對方黎東京既情況下,撞到Jimmy-san一樣!



繼續買野食~~



好為食呀~~拎住行李都掛住食!冇計啦,離開西門就冇機會架啦~~




我地搭捷運去台北車站,然後行去台北西站,呢度係搭國運巴士去機場既地方!



係台北西站出面終於見到郵筒啦,太陽哥哥宜家先寄佢係清境買既明信片,真係被佢激死!我個d一早係清境寄晒啦,好在佢唔係寄比我咋,唔係我實嬲死佢呀!



台北西站內~~呢度有好多目的地,我地就係11號閘口既桃園機場,如果可以搭去其他地方,再繼續玩就好啦~~



車票:



拜拜啦台北~~




去到機場已天黑啦~~



先去退稅,拎返NT200帶返香港,咁下次黎就唔怕係移民局內未換到台幣攪台證啦!



排隊check-in~~我地今日特登早d黎機場架,真係兩小時前到,因為記得上次太遲差d冇得一齊坐,怕怕~~



早左黎就多d時間最後衝刺啦,入閘後去左免稅店行街,買左...



由於我身上冇晒台幣,但都疊埋心水諗住貴少少rate都要碌咭架啦,點知呢度好勁呀,碌咭時可揀用咩貨幣碌架!部機會即時對返唔同貨幣,成個list比您睇到,從而問您揀咩貨幣碌咭!好勁既服務呀,咁就唔洗碌左外幣,返去比碌咭公司食rate啦,我梗係即對港幣碌啦!Yeah~~


本身只諗住買支植村秀卸妝油,只係香港四分三價錢咋,超抵!點知間免稅店鬼咁大,鬼咁多野睇,最後買左一大一小袋!


之後就去閘口等上機啦,我地返香港坐CX呀~~



點知班機delay左成個鐘,呢個時候我就順便影下免稅店既戰利品!因為hand carry 液體有限制,免稅店特別為我包好同封好左支卸妝油比我上機!



另外,忍唔住手買比大小朋友仔既手信,全因見到句 "For Sale in Japan Only" 發晒光咁向我招手,我先失守!






飛機餐只食麵包,有點失望呢!



到香港啦~~出閘時,太陽哥哥對住人群作狀揮手,扮有人接,笑爆咀!




一如以往,我地會show晒d戰利品出黎影相留念,但尋晚知道今朝仲會買野,尋晚就算係酒店影的話都唔齊,所以今次係返到屋企先影!以前同太陽哥哥去完旅行都要分別,佢返大圍,我返青衣;今次係第一次一齊推住行李,由機場返到屬於我地自己既屋企,感覺原來係咁唔同架,原來係好開心既!


排完第一次覺得影得唔好,又唔夠位坐...



再排第二次,咁擺好好多啦!



戰利品close-up:



話咁快九天台灣之旅就要結束,真係唔捨得呀!雖然台灣唔係我地諗住去既地方,又雖然,我話唔當係honeymoon,但今次既環(半)島遊,的確有好多難忘既經歷同回憶,係屬於我同太陽哥哥既!墾丁既陽光與大海、清境既雲海與綿羊、第一次拖住喼搭高鐵由高雄玩到上台北...都深深留係我地腦海裡面!希望下次去下宜蘭、花連,人地話個度好靚架!


呢幾日真係過得好開心+sweet,Happy 2nd month Anniversary to SUN & MOON!



沒有留言:

張貼留言