2009年11月20日 星期五

2009-11-20 (Fri) 台灣遊 Day 7 - 清境 -> 台北:西門.忠孝敦化.乾杯.西門町

 


今日離開清境啦,好唔捨得呀,因為短時間應該唔會再黎啦~~今次清境之行,最得著同最開心,當然係同羊咩咩玩啦,但呢度始終係偏遠山區,夜晚又冇咩野玩,黎過一次都夠皮了~~反而如果番去,我鍾意墾丁多d,一來仲有好多野未試,好似電動電單車、吉普車等,仲有水上活動呢!二來我個人鍾意海景多過山景,其實今次係想欣賞下台灣既另一面,先想揀一個山區地方,開頭係阿里山同清境作出選擇,因為阿里山未完全開返,加上蒸汽火車亦因水災而破壞左未開通,而清境又有小瑞士之稱,我地就黎左啦!今次係清境,台灣人同我地講,外國人黎台灣,成日去城市地方好似台北咁,其實台灣真正原有既風貌,就係好似清境呢種感覺!所以今次清境之行,能夠睇到台灣另一面既風貌,總算不枉此行!


今朝又係陽光普照,太陽伯伯開心咁歡送我地呢!



呢個景色陪伴左我地幾天,最後一眼望,有點唔捨得呢!



羊咩咩都唔捨得呀~~



短片別清境:



 


落山用左大約個半鐘時間,就返到高鐵台中站啦,我地想爭取時間快d到台北,好快咁決定買十二點半既火車飛,再好快咁買左摩士漢堡上火車食~~



時間剛剛好,係月台影唔切相了~~



黎台灣實要試摩士漢堡既,但太陽哥哥冇以前咁癲要食三四次,呢次係第一次,亦係唯一一次!我梗係要試香港冇既款式啦,呢個係咖哩豬扒珍珠堡:



太陽哥哥就繼續食佢最鍾意既海洋珍珠堡~~



 


到台北啦~~太陽哥哥其實係今次旅行留左山羊鬚呀,唔知大家有冇發現呢?



我地先去酒店放低行李,因為鍾情西門町,今次都繼續住呢度,今次係同太陽哥哥第三次黎台北啦,可惜book唔到長虹,於是就book左萬事達西門店!



放低行李後,即刻出動啦!先去探阿宗麵線~~



 


跟住搭捷運去忠孝敦化站,因為太陽哥哥同事Sue都黎左台北玩,係未出發時,已約好左今晚一齊食晚飯,餐廳係忠孝敦化站,我地就順道早d黎行街!



行左太陽哥哥好鐘意既日本牌子tee,上次買時係日本原宿,當時仲買左十幾件返香港!呢間shop打左入台灣,香港就仲未殺入,唔知遲d會唔會係香港開呢?不過唔知係咪一多就唔精,d款式唔係太驚喜,反正西門町都仲有分店,我地係度冇買呀!



太陽哥哥身後個公仔好巨架,仲識360度咁轉!



黎台灣實要行Porter既,我係度睇中左個袋,為起一千蚊港幣,雖然太陽哥哥想送比我,但都係諗諗先,反正西門誠品又有Porter既!



太陽哥哥影呢間野,我又影佢影囉,雖然唔係佢個陽字,但佢話都係同音,就係同佢有關喎!



我地好鍾意食台灣既8鹽水雞,見到又要試;呢間好好味,拍得住西門町萬國高佬呀!



 


到五點半,我地就同Sue會合,去左『乾杯』呢間餐廳,係Sue介紹既,台灣應該好出名喇,因為"敗犬女王"都係呢度拍,係exactly呢間店喎,雖然我冇睇過呢套劇...



呢度係用堅炭黎燒野食,Sue話香港冇得室內燒炭,所以值得黎試架!



 


室內佈置~~見唔見所有牆都貼滿左即影即有相片呢?



原來係呢度特色黎架,呢度有個環節叫『親親五花肉』(如下圖),又真係幾有gimmick喎!



我影低左幾張即影即有相片,有男同男、女同女,好攪笑呀!



 


開始食啦~~



侍應哥哥咁上下會黎幫客人加炭~~



呢款前菜超好味,生菜、餅乾、蕃茄、厚芝士,再沾上蜜糖,真係估唔到最高個d係蜜糖!亦係全舊野既精髓所在,配搭出奇地好味+驚喜!



呢度真係好好食呀,每種肉都分好多款/部位,尤其係牛!我地叫左好多野食呀~~



蜆湯同煮蜆都好有特色~~



 


跟住到特別環節啦,侍應哥哥一檯檯咁問客人玩唔玩呢個遊戲,唔會強迫您既,但會鼓勵您囉!有免費一碟五花肉,何樂而不為呢?嘻嘻~~


侍應哥哥一邊數一至十,一邊影低我同太陽哥哥錫錫;完事後才知Sue用埋我放係檯面既相機,影左一張相+拍左短片,又有相又有片,Sue好細心呀!



餐廳會比客人兩張相,一張會叫您寫d野跟住貼係牆度,另一張則比客人用作留念,好貼心呀!錫十秒就有呢碟五花肉啦!抵呀~~



完成品:



見唔見到我地張相貼左係邊度呀?



 


食完飯我地就返西門,先上酒店休息下同沖涼,跟住就去西門町夜市!逛多次呢間tee shop既西門分店,最後太陽哥哥抱住點都應該買d既心態下,買左兩件,真係唔係好多岩心水既款式,買兩件真係唔算多!



曾經...阿宗麵線同萬國鹽水雞係我西門町既至愛,可惜萬國個位高佬老闆唔係度啦,換左兩個呀姐,對佢地冇咩信心...問佢地高佬去左邊,佢地話高佬冇做兩年啦,轉左做市場喎...雖然高佬不在,但情意結的關係,都買左黎試!



50嵐必飲既珍珠奶茶,平過香港得黎仲好味好多架!



路邊小販檔發現又有鹽水雞賣,但加了好多雞以外既材料,主要係蔬菜類,感覺怪怪地,都買左包黎試下!睇黎鹽水雞拼蔬菜,係台北近年興起的小販檔食物!



 


沒有留言:

張貼留言