今日八點幾就起身啦，因為約左十點有車接我地去墾丁，先係酒店享用早餐！
原本約左楂七座位的士既王大哥架，王大哥好好人，係香港我已同佢msn，佢仲幫我check高雄既酒店；不過佢臨時唔得閒，搵左另外既人接我地！
車程兩個小時十分鐘就去到墾丁，全程基本上我同太陽哥哥一齊狂釣魚！哈哈～～呢間亞哥之家，就係我地係墾丁住兩晚既民宿啦！
亞哥之家位於馬路旁，馬路另一邊就係一望無際既大海啦！舊大石亦係墾丁其中一個出名既路標「船帆石」喇！
我地揀左海景房，係最高既五樓，要行樓梯上呢！上到我索晒氣，不過一開門．．．嘩～～就會唔介意要爬樓梯架啦！因為間房真係好靚呀～～
雖然size冇高雄個間咁大，但好骨子，又新淨，當您見到個大浴缸望住個大露台再望到個無敵大海景，就會覺得好正好正架啦！
露台景觀～～個海係闊到無盡頭架，相機根本影唔晒，我要分三張先勉強影到咋！
放低行李後我地周圍行下，先醫肚，原本想去食意粉，點知只做 lunch，已close；跟住是但去左呢間餐廳，三樣野入面，除左碟菜係吞得落肚外，另外個兩味簡直可以用難食黎形容
見網上朋友強力介紹呢款7-11既奶油海鮮焗飯，我地就試下，反正有間7-11係民宿隔離，真係一步路就到，超近！
試後感：好好味呀！呢度既7-11有好多款便當選擇，仲真係好多人會黎買黎食，7-11出面仲有晒檯櫈，仲寫左city cafe，我估台灣好興去7-11買便當吧，所以質素我覺得好過香港呢！
醫完肚後，我地就係船帆石呢帶周圍行下～～
遠少少既沙灘，今日天陰陰，都幾大風下，但仲有人玩水！勁～～
突然見到好多架電單車一排咁刷身而過，唔知佢地係咪環島遊呢？
因為大風關係，民宿主人唔建議我地租電單車玩，其實本身想租都係想同太陽哥哥試下，但原來呢度租電單車要出示堅車牌架，冇就只可租電動電單車，但因為車身較輕，大風情況下係唔建議玩，加上租車要租一日，冇得話租一兩個鐘，所以我地最終都係冇玩到呀！
沒有留言:
張貼留言