2007年12月1日 星期六

2007-12-01 (Sat) 朗豪坊聖誕燈飾 & 新碌齡地點

充滿歡欣的十二月終於到啦,我諗大部份人,包括我自己,都幾鐘意十二月的,有聖誕、除夕、跟住新年,成個月都會充滿住聖誕同新年氣息,仲會有好多活動呢!由於大學24同31號係可以唔洗返工的,所以我就請左27 & 28兩日假,咁就會由22/12放到1/1了,呢咪好正呢?嘻嘻~~ 係度希望各位朋友都開開心心咁過十二月的每一日,儲定energy迎接聖誕啦!


呢幾星期溫度跌左好多,平時用開的cream都唔夠潤,但有次無意下係太陽哥哥屋企用左太陽媽媽的cream,好好用呀,好滋潤,佢話係佢做開facial間shop買既,種種皮膚都岩;尋日太陽媽媽就幫我買左喇,咁我可放係屋企,媽咪細妹又用到;但太陽媽媽唔肯收返我錢,攪到我好唔好意思;今朝我就問佢,呢兩日如果佢唔洗打牌,就一齊食飯請返佢食野,去食泰國餸;點知佢話佢weekend實會打牌咁滯,問我係咪唔當佢係自己人要咁唔好意思喎..."自己人"呢個字,令到我好開心呢!嘻嘻~~ 太陽哥哥跟住仲用"自己人呀"黎玩我呢!


到下午,我地去左旺角睇下其他旅行社的日本團,都係冇咩決定到,只係每間旅行社的日本章程都拎晒先,然後約victor一齊出黎研究;最深印象係喺康泰的介紹,個職員好好人,佢係日本導遊黎既,所以介紹得好詳盡,亦比左好多意見我地,仲叫我地唔好報團住,因為一月d機未出,宜家報一定係要經東京再飛北海道,即要坐內陸機晒左好多時間,佢話日本airline要過埋聖誕先會出資料,佢估計點都會有直航機,只係聖誕後先知...佢話北海道如果自由行,只可玩"道中"方向,如果想玩埋道北/道東,大部份都要跟團,因為點到點要幾個鐘頭,自己係好難玩晒的,亦係佢口中所講的震撼團,因為會睇到冰海、大雪山、大瀑布...道中玩法就係享受團,因為都係enjoy浸溫泉同滑雪既...


聽完佢介紹,既然佢都唔似其他sales咁引我地報團,我地都覺得佢講d野都信得過,所以都係睇定d同再商量下先;因為初步太陽哥哥同victor都對享受團偏向多d,如果只係道中咁玩,或者又可再考慮自由行...


之後約埋細妹食飯,咁之後可一齊去碌齡,我地又去左食泰妃雞!



跟住仲有時間,同要等埋BEN,我地就去左朗豪坊行陣,點知被聖誕燈飾吸引住,都冇去行街呢!好靚呀,d燈仲會變色呢,一時綠,一時藍,一時紫...



不過好多人,好難影到d冇路人既相...不過都影到dsweet sweet合照!



係小巴站等BEN時,發覺細妹買左好cute的口水肩比軒軒BB,我地係係度扮BB影相,好攪笑呢!



之後收到休打黎話荃灣齡場維修唔夠lane,改去美孚玩,點知好貴呀,$3xx一條lane任打兩粒鐘,但我地八個人,一條lane玩兩個game16局好似好"炆"水,所以開左兩條lane,四個人一條打兩粒鐘,最終我打到好攰呀,都唔打了,基本上我平時只打到兩局,到第三局都會冇力同打得唔好既;而今晚每人消費$90蚊,比平時多出一倍有多呀!最唔開心今日原本係有比賽的,諗住好齊人可六對六對打,點知都有三四個黎唔到,比賽唔到添,白白晒左袋住d禮物成日的心機,唉!呢張八位碌齡英姿圖係細妹影架,但我一d都唔知佢做過件咁既事,返到屋企先知咋,又幾攪笑喎!


新場梗係要影下相啦~~


呢度雖然貴d,但個場新d,lane亦上得好快,d波又回得好快,速度係勁過荃灣好多既;但唔知係咪d lane太新太滑,d 波成日都會有西既,好難控制碌到直線!所以有得揀,都係荃灣平lane岩我多d喇!



沒有留言:

張貼留言