2009年6月21日 星期日

2009-06-21 (Sun) 香港紅十字會週年捐血頒獎典禮


今日都算係我人生一大日子,因為我出席紅十字會一年一度的捐血頒獎典禮;要捐夠廿五次血先被邀出席架,跟住五十次、七十五次、一百次...一個女仔一年只可捐三次血,咁計法,下次可能要等八年後,所以我好珍惜今次既機會呢!



好多謝太陽哥哥諗辦法出席,可以見證到我呢個重要時刻;最終我地個方法都非常好,就係佢照楂的士,中間個三個鐘就黎參加典禮,請柬話明有兩個鍾免費泊車,其後每個鐘只係十蚊,好方便!雖然楂少左三個鐘的士,但計落都實會有錢賺,又可去到頒獎禮喎,一舉兩得啦!




頒獎禮地點係黃埔漁人碼頭商場的海皇宮大酒樓,睇地圖見漁人碼頭商場係好入好入,黃埔我係路癡呀,好在太陽哥哥係佐敦接我,我一落巴士就上佢車,唔洗自己搵!


呢個就係reception:



reception table上面放左好多獎章:



場刊:



我一見到呢個場面,即刻諗起學校攪既Beta Gamma Sigma Induction Ceremony,激似度達90%!以前咁多年就係我做攪手,今日我就係參加者,角色對調,感覺得意,亦感受良多!



原來包晒場,冇諗過有咁多人架,成七十張檯,我地係48th;典禮十一點開始,我地準時黎到,但BEN就...無眼睇佢呀,我只可做既就係幫佢霸定位囉!



我以為食物供應只係食下西餅,飲下fruit punch咁,冇諗過係擺酒中式咁坐,仲有咁多野食呢!




頒獎台...雖然好多出席者,但原來真係人人有份上台領獎架!



podium(我又諗起攪BGS時, 又係張個BGS徽旗掛係podium前面):




場刊:



搵到我同BEN個名呀!其實真係好多捐血者,原來典禮分左兩日進行,一日係上星期,另一日就係今日!




Programme:




太陽哥哥今日係觀禮嘉賓:



太陽哥哥的血滴型貼紙:




工作人員話要將d pins掛係身架,仲唔係激似 BGS...



影返張相先:




典禮開始啦,有嘉賓致辭,亦有長期捐血者(左二)/受惠者(中)的分享,呢個長期捐血者好勁呀,佢已經捐血達三百次!我地好奇怪,捐左三百次咪成百幾歲?聽司儀講佢係成分捐血喎,不過我都唔知咩黎,等我下次去捐血時問下姑娘,如果可以我都想參加,咁咪捐到多d血比人囉,好有意義呢!




典禮中途有個特別環節,好多小朋友走左上台,多謝所有爸爸,因為今日係父親節!



有大賀咭:



同埋好多紙牌仔,主要都係多謝熱心捐血的人士既!




到我上台啦,其實我個檯一早上晒,因為想等埋呀BEN,我同工作人員講想join後d既檯上台,話我朋友趕緊黎...點知,頒到最尾張檯,BEN都仲未到!工作人員一路係咁埋黎問我:點呀?到未呀?氣氛緊張...雖然佢地好nice,但我覺得自己好煨呀!



佢地安排個上台方法都幾好,每人拎住有自己個名既咭紙(附於早前發出的請柬內),排隊時工作人員會按次序收好,再交比台上司儀把名字讀出,咁就唔會出亂子!呢個方法的確快而準亦方便,不過只限台上領既獎係一模一樣;而我之前攪既學校頒獎禮,係每張證書都印有各人的名字,未上台已安放係台上面,所以由reception點到、坐位安排、整埋證書次序、典禮開始時送證書上後台預備頒發、上台次序...要事先細心安排妥當,每刻都在緊張狀態,不可miss左任何一個人/一個部份!相比起紅十字會的頒獎禮,我們學校攪個個似乎複雜得多,諗返自己的參與度,先覺得自己原來咁叻咁勁呢!哈哈~~




好開心幫到人之餘,亦得到感謝,但用"再生之德",實在不敢當...




頒完所有獎就開始食野啦,呢個時候BEN先黎到,十一點開始的活動,佢居然十二點半先黎到,遲成個半鐘,真係好離譜同有d過份喎...不過都唔關我事,唔係我切身麻,我同太陽哥哥勁笑佢,反而好擔心佢922會唔會都係咁...驚~~




d食物影影下就無影啦,因為被其他野吸引左...就係呢djumbo size大型紙牌,我又點會放過佢地丫!呢個大會安排都幾好,一共有幾十個呢d大型紙牌,比嘉賓一路食一路傳黎影相,好得意呀!


我的A型血包呀:



最鍾意呢個大血滴:




難得的大合照,實在太多人排隊想拎個紙牌啦,我地拎住已影左好多好多張!



BEN呢個甫士好似蝸牛呀!




跟住有捐血達25次紙牌,掛住係咁影都唔洗食野啦!




玩玩下上埋台影相添呀,終於等到個O型血包:




充當埋攝影師,幫BEN同KARMEN影相,BEN真係好有表演慾,勁轉甫士,當正自己係model咁!最激氣係幫佢影完,佢竟然將個紙牌交比第二個;大佬,我仲未影架!激死我呀!




影影下相之際,突然清場,因為頒獎嘉賓食完野啦,有時間補頒返個獎比BEN,全場人只得佢一個,都唔知係煨定勁啦!哈哈~~不過有機會獨自上台領獎,我都想呀!唔通遲到係有著數既?哈哈~~




臨走時係backdrop度再影相留念:




擺完酒新人會企係門口送客,今日就有一班義工同紅十字會職員同我地道別;佢地好好戲,一有人出黎就一齊揮手+連聲拜拜,十足擺酒一樣,好攪笑!




門口仲有個可愛版backdrop,我都要同個A型公仔影返張先!




跟住太陽哥哥車我返佐敦搭車返屋企,佢再過海繼續做野,仲車埋BEN同KARMEN去灣仔呢!返到屋企同d紀念品影返張相先:



呢張係即場比返我地既相片,真係好勁,做到好似擺酒咁!



獎章獎座們:




獎座close-up:




獎章close-up:




係度都想呼籲下各位朋友,得閒就去捐血啦,捐血真係幫到好多好多好多人架!加上血庫長期都仍然係唔夠血,大家真係要一齊幫下手,因為每包血分分鐘講緊有機會救到一條命架!我一早已拉埋太陽哥哥加入我地既捐血行列啦,您地都快d一齊加入啦!


就是祝福!




沒有留言:

張貼留言