2008年4月12日 星期六

2008-04-12 (Sat) 琪琪的生日慶祝 @ MK Cafe



今日係碌齡朋友幫琪琪攪生日,ben好好咁主動做攪手,如果唔係,可能真係無人攪了,呢個圈子的人,通常只會叫,好少做,包括我...哈哈!




呢度環境幾靚既,但我地的檯實在太細同太迫了!不過亦可反應好多人都有比面出席,琪琪多哥哥姐姐錫吧!









食物方便,較為參差,有d好食,有d唔好食,我個黑松露海鮮飯就好正喇,可能係廚師推介啦!

 


飯後就玩左陣明記killer,但可能係長方檯太長的關係,玩得唔太方便,但都有幾part攪笑場面,好似sa自己扮係killer咁,我又以為自己死左,攪到亂晒龍,哈哈!

切蛋糕時間,ben原本想買兩支旗插係蛋糕上寓意琪琪攪下笑,但搵唔到,唯有用手畫啦!不過佢呢個 idea其實真係好攪笑,可惜可惜!



























拆禮物時間,琪琪見到個膠袋就好開心了,因知道係同單車野有關!




下...單車衫?咁質地既咩?個款仲...岩阿爸多d喎!




件衫其實係ben自己既衫黎既,佢呢招係整古琪琪!但琪琪亦好配合,估到ben整古佢都照著上身比大家睇,睇下岩唔岩身喎!ben出晒名臭汗多,琪琪真係勁!勇!呢個真係一個開心又笑到碌地既笑話!






健黎唔到食飯,但自備左一張生日咭,上面有晒佢同pui yee的祝福字句,呢下真係好有心,我本身係重文字的人,對d咭呀信呀都覺得好有心意,呢下,真係唔係睇價值,而係有冇心,真係花時間去揀張咭,去寫d祝福上去喎!雖然唔係我生日,但我都幾多謝阿健!當中有個小插曲,健有條頸巾放在同一個袋入面,唔記得抽起先,大家都以為係佢送比琪琪的生日禮物,琪琪又好比面咁戴左上頸,係呢個時候,我不幸地聽到有位朋友話:條頸巾十蚊雞咋!(語氣講到覺得健好cheap咁)可能講者冇心,聽者有意,我覺得呢句說話好唔應該,十蚊都係心意姐,何必當眾講個價錢出黎?好冇品...調返轉,自己又有咩心意呢?一蚊都冇喎,有得咁計既咩?




呢件衫就係我地送比琪琪的生日禮物!呢份禮物係ben諗架,其實我真係好慚愧,我根本無為意細妹有咩需要,都係ben有次碌齡聽到琪琪問sa d單車衫係邊度買,傾左好耐,佢就知細妹想買!






單車衫係前天跟ben一齊去買既,其實仲有好多款,不過d款真係麻麻,但件紳士單車衫好攪野,如果sa著都好攪笑!





14 April 2008 (Mon)講返呢個生日會,其實都要多謝ben,佢當中做左好多野係大家唔知,因為呢個圈子出左名多聲氣多意見但又唔會有人主動做野,可能始終多人,就會多意見啦!ben 今次花左幾多時間諗地方,仲特登吟荷包自己出左五十蚊做個cafe vip,因為想搵到個可以圍埋一班人的地方;揀蛋糕方面,又計過出去買的話,cafe會收四十蚊切餅費over budget,最後都係決定係cafe買佢地的cake,又特登去落訂,仲有度"計"整古琪琪等等...老實講,我估呢個圈既人,有邊個會肯吟五十蚊出黎唔計返,仲要特登去一次場地落訂?連我自己都做唔到...

我係度講,係因為想大家知道有人係好有心做左好多野既,而唔好放大好多小事而大做文章...因為我睇到d好唔應該既野,最慘係琪琪發現問我咩事既,我睇完覺得...洗唔洗講到咁呀?開開心心以為個個都幾錫佢的壽星女知道會點諗?點解係d咁公開既地方講d咁既野呢?連壽星女都發現,想冚都冚唔住啦!以下既野,我諗左好耐,但我唔講出黎,我個心會好唔舒服,不過我都係係我自己個blog抒發下個人感受je!更更更重要係:

咁大隻死貓我真係啃唔落

公平唔公平,咁多年朋友,點會唔知?之前亦聽過好多投訴,我想講,個point唔係公唔公平,因為就係知唔公平,ben先問大家意見;但點解要覺得問呢個行為係問黎都廢?係迫住夾呢?點解要諗歪?調返轉,有冇諗過唔問又會有咩後果?咪仲比人插死...朋友一場,唔願意點解唔講,為面子?咁點解之後要攪手承擔您口是心非的責任?反而今次有位黎唔到食飯的朋友我好欣賞,佢坦白話佢會自己預備禮物,唔洗預佢;咁咪唔會有誤會囉!

公平公平,其實點先係公平呢?上次個蛋糕二百蚊,今次個蛋糕二百五十蚊喎,唔公平!蛋糕價錢一樣,上次十個人黎十個人除,今次得六個人除,唔公平!用自己的餅咭買蛋糕,餅咭唔係有折既咩,但計時用返蛋糕原價喎,唔公平!上次餐飯同今次餐飯個價錢唔同喎,唔公平!.....要公平,我諗每次要同樣個幾個人,黎少一個都唔得,去返同一個地方,食返同樣既食物,買返同樣既蛋糕,先可以叫公平!講真,下次攪手都唔知係邊個,點講埋黎緊呢年既生日慶祝係點?

我再強調,個point唔係公唔公平,因為就係知唔公平,先問大家意見;個point係點解問您時您話ok,但買左先話唔ok?我明,四十蚊唔係問題麻,都係發表下意見姐,但比機會發表意見時冇發,臨比錢先發,咁攪手個心理您地有對佢公平過嗎?鬧完人講句:我當冇事,但您下次唔好啦,您都咁大個人啦!嘩,換住係您,可以若無其事嗎?仲會收錢咩?唔收係為骨氣、為尊嚴,而唔係文塞、執著!比人話完,講真,唔通仲面幪幪收錢咩?唔收都好,可睇下佢地有咩公平行動,點知...如我所料...

究竟同每位朋友講時係點講,係咪溝通上的誤會呢?我唔係問個位,我唔確定,我當時只相信攪手係問清楚左,但原來,我聽返其他朋友講,真係有d話講明了四十蚊,有d話唔知四十蚊;呢個moment,口同鼻嗌,真係無得查得返,又冇第三者在場,我亦唯一對此感到無奈,亦無話可說...但奇怪地,有一個人的口供,一把口有兩個版本,令我覺得佢的口供好有問題;佢同我講時,非常強調攪手冇講過禮物幾多錢,只講食飯百五蚊度;但佢又同另一朋友講,攪手話份禮物只係十零廿蚊...兩個版本出自同一個人,一個有禮物價錢,一個冇,呢方面我真係好質疑喇!退一步咁諗丫,如果攪手真係講左十零廿蚊,佢又點敢去買份四十蚊既禮物?收錢時唔怕比您炳鑊金?

就算冇講清楚禮物幾多錢,只講食飯百五蚊度,埋單的確百一蚊,計埋禮物咪百五囉,同開始budget相約,咁點解要將禮物錢抽起再放大咁講呢?係咪真係因為百五蚊食飯蛋糕就ok,因為食晒落自己個肚度;但百五蚊入面如果知道當中四十蚊係佔禮物,因為唔係用返自己身上,咁就唔ok呢?

最可笑係,佢仲同我講:一係咁啦,呢次每人比二十啦,點都係攪手唔岩架啦,個二百,佢自己攪掂或者自己諗辦法啦!下...施捨?諗辦法咪即係叫人自己啃左去,為骨氣又好,為尊嚴又好,四十蚊唔收您,廿蚊會收咩?我當然講話梗係唔可能啦!

其實我一路激動,係因為覺得攪手花左咁多時間心思,某d位已諗過度過去配合所有人,我激動係因為攪手話要將個四百蚊自己攬上身,佢連同我share都唔肯,就係因為比人咁話佢;其他人可能話佢戇居,為啖氣唔收錢姐;但又唔通比人話完仲面幪幪收錢咩?所以我好激動,但我又無能為力;我想講,我激動我係冇著數的,我點都係比咁多!但奈何就係因為我太激動,係人地眼中,原來睇到係另一個故事:今個月係G細妹生日,G梗係知細妹想要咩啦,份禮物係G主使要買既,攪手同G咁friend,實和議啦,冇野架,叫我地夾咋麻!

我承認ben係同我特別friend,但咁就可以亂講一通咩?咁就可以將成個故事完全改晒咩?講講下仲可以講到係我地先揀左禮物,買左先黎屈佢地比錢!完全委曲事實;我係度強調,係問左大家,手上楂住幾多budget先去買的!咁大隻死貓我真係啃唔落!!!

點解會買呢件衫,我亦一次過講埋,一開始我都冇咩idea買咩,我地屋企慣性買唔到就封利是,係ben講琪琪問過sa單車衫d野我先醒起,呢個idea唔係我主使的!為免大家誤會,我亦同ben講好唔會同一份,就係知人言可畏,我諗住買單車鞋,ben就拎大家個四百蚊去買單車衫;但去到單車鞋揀唔到,四百蚊的衫亦揀唔到,我地先話買呢件八百蚊既單車衫,係唔影響大家原則下,我包底!

故事講完了,我只想為自己食死貓呢件事申冤,因為先問後買、先買後問呢件事,同埋係咪我主意話買呢樣野,我一定要相當執著,關乎我聲譽問題!至於前面個d有冇講價錢,我相信無論我點講,都係有唔同意見架啦;但我講左,我自己舒服就得了!不過今次真係體驗到人言可畏、以訛傳訛的恐怖!有人問我為咩咁嬲,如果人地係要委曲黎講我,唔值得為左咁而唔開心,越嬲咪即越在乎...無錯,可能我真係太在乎呢朋友!

沒有留言:

張貼留言