DAY 9 - 池袋~機場~香港
今日到左行程最後一日，其實由前天起已開始唔捨得！雖然尋晚已pack晒野，但我地今日都好早起身，因為我決定買埋尋日見到個兩個agnes b 袋啦，所以一早起身，十點去到，買完再趕返酒店pack入喼先check-out，入喼前仲可以放係床度影張相添呢！yeah~~
左：16800円稅入(16000円)／右：11550円稅入(11000円)
攪掂晒後，我地就逛係酒店後面的sunshine city，住左幾日都係第一次黎，好大個商場好多野行．．．發覺真係唔夠時間呀，下次stay behind要多幾日呀！其實講黎講去，都係玩到唔捨得走姐．．．
我地去左burger king食早餐，兩個餐共1410円；原本我想去M記食多次個黑椒煙肉芝士雙層漢堡架，但gigi唔想食，咁就下大肚婆啦，我都知佢地日日對住M記，去到旅行仲要食會好辛苦既！
跟住最後衝刺，見到disneystore，入面好多靚野呀，有好多仲係迪士尼見唔到，其實有好多都好想買，但礙於洗晒ｄ現金，碌咭已碌左幾個agnes b袋，加上迪士尼既野通常買完都係擺，所以都係忍住手了，只係買左四樣野！但好後悔冇買到個米奇nds盒．．．嗚嗚~~
再係sario買左個 kitty相機套，係咪好奇怪我地都會買kitty呢？其實係因為本身個相機套爛左要買，而呢個相機套係黑白色，都幾型；加上係太陽哥哥話ok，咁一齊用架麻，佢係男仔都覺得ok咪買囉！
呢幾款小丸子野係咪好得意呢？其實係幫同事erica買架，佢一早搭我見到小丸子就幫佢買二百蚊樓下既野，我由淺草開始搵，一路都搵唔到，後尾又係victor幫我摷到，係sunshine city對面幢名為animate專賣漫畫野既舖頭有，繼cheese curry杯麵後，今次又多得victor，真係可以封佢為searcher！哈哈！可惜大部份都係食物為主〔@630円〕，後尾同店員雞同鴨講，知道樓上仲有小丸子野，原來係memo pad〔262円〕，四樣野對返港幣只係一百六十蚊度，非常抵！
呢張紙簡直係珍藏，我由第七日係淺草就袋到今日；因為淺草好多玩具舖頭，我見"小丸子"三個字亦係日本漢字，相信日本人實睇得明，我就寫左係紙度問店員；去到其中一間舖頭，個女店員就畫左個小丸子頭落去，問我係咪咁樣，我當然up晒頭say晒yes啦，可惜佢地冇．．．不過佢好好人，英文亦算ok，起碼知道佢表達緊咩，佢寫左幾隻日文係紙上面，同我講係小丸字既"japanese name"！話晒呢次係日本人好熱心好熱情既主動幫忙，我覺得好有紀念價值，就影低相了！
我地訂左兩點幾係酒店出發去機場既旅遊巴〔@3000円〕，所以唔夠時間都要走；返到酒店拿拿林係大堂梳化影低戰利品：kitty相機套〔987円〕、chip n dale memo紙〔420円〕、chip n dale candies〔840円〕、兩個mickey電話座〔@1029円〕，電話座好神奇架，一個斜既平面，將電話放上去，會自動吸住，唔會跣落黎架！
一路趕住影相，趕住pack喼，又趕上車，都冇時間唔捨得，到係車上坐定定開始黎料．．．勁唔想返香港呀，可以繼續留低就好．．．嗚~嗚~嗚~~
去到機場撞下撞下，又被人點左去自助check-in機呢度，其實都幾好玩，試下新野，加上又快又方便；可惜，我同太陽哥哥揀完窗口位後，victor部機顯示坐位full晒，焗住揀我地隔離個單丁位加隔左走廊個位，雖然隔條走廊唔係遠，但冇理由一pair人要分開坐麻，當時又咁早，我地唔覺架機會咁快full晒囉；跟住磅行李時同職員講，佢可以check到位架，亦明我地想change seating，但佢睇到電腦就話我地係group seating already，唔可以轉．．．哼！最嬲係入閘見到又係stay behind既團友，佢地係搭遲我地一班酒店開出既旅遊巴，黎度機場後係counter check-in，都有窗口位喎！攪錯呀，好嬲呀！
入左禁區後，遠處見到我地將會乘搭既航班，94閘口既JL機，已經係度等緊我地啦！
咁都比太陽哥哥撞到佢偶像，大哥先生．．．，唉，冇眼睇．．．
我地揀左有落地玻璃既餐廳醫肚，我地將所有用剩既錢交晒比victor由佢發板，兩個意粉加兩個湯麵，共食左3620円！
JL735原定1815起飛，係跑道度排隊都排了半個鐘，加上回程比去程多一小時，返到香港相對又會晏左；其實點解去日本，回程比去程會多左成粒鐘出黎既，而呢粒鐘又用左係邊呢？
到達香港已接近夜晚十一點了，估唔到搭 JL 都要坐接駁巴士出境；不過好耐都未試過係停機坪落機了，就當影下相，替我地既旅程劃上完滿既句號啦！
話咁快，九天日本之旅就結束了，好少去咁多day旅行，所以今次更加比ｄ短trip唔捨得；時間過得好快，回想十一月時計劃去，跟住報名，再跟住gigi有左差ｄ去唔成．．．轉個頭就玩完兼返埋黎添！
我好開心今次能同太陽哥哥一齊去北海道，雖然唔係二人行，但我本身鐘意熱鬧，個個朋友出黎做野後都好難就到時間一齊去旅行，難得有朋友同戀人同時就到時間，四人行我仲開心，所以呢次旅程我好難忘好深刻亦好開心！最感動當然係太陽哥哥話要帶我去睇雪呢樣野實現左啦，而我地一齊楂雪山電單車一齊滑雪，我都好深刻；仲有太陽哥哥幫我預祝生日呢個驚喜，我當然會永世難忘啦！
太陽哥哥：謝謝您給了我一個開心難忘既假期，您的一切安排，我很感動，多謝您！
北海道：妳讓我跟太陽哥哥留下了很多開心難忘浪漫深刻的回憶，多得妳，我們的感情增進了不少，謝謝妳！
沒有留言:
張貼留言