2007年7月31日 星期二

2007-07-31 (Tue) Hello Kitty kittybrick

呢兩張相係綱上見到的,係麥記上年的Hello Kitty kittybrick,我從來唔知有對咁大對架,我唔係Hello Kitty迷都覺得好靚,所以同大家分享!


不過鐘意都可能係軟硬情意結,因為麥記係上年推出時,我真係咩色都冇興趣,只係想要對軟硬特別版;太陽哥哥有日就送左下面盒野比我,當我諗緊特別版仲有個咁靚既盒連埋時先知,原來個盒係...佢自己整的!


諗返當時,真係半信半疑,因為實在太真,盒底後面連咩barcode咩標記都有,係有句"designed by sunny"我先信咋!但真係好開心!最攪笑係好後來先知,其實佢都唔係點樣班對特別版返黎,只係為左我成套買左,而其他個d...仲係佢床下底啦!哈哈!最重要係其實當時佢追緊我架,亦就係呢樣冧招,我比左好多分佢呀!哈哈!


2007年7月30日 星期一

2007-07-30 (Mon) Lunch @ 赤丸製麵所

今日的午餐,燒排骨係好好味,其餘三味...很普通很普通...




2007-07-29 (Sun) 小恩恩

小時候的我...好喜歡呢兩輯相,大頭,笑得好真,喊得好真,小朋友就係咁純,笑同喊可以一秒之隔,大人亦會得啖笑;上面那輯的連身裙亦是我的最愛,媽咪一向有taste,細個把我同細妹都打扮得好型!講真呢條裙要是今日仲係度的話,無論cutting or條子pattern都冇out,是仍然很IN的大露背呀!

期待有自己的小朋友時,一樣將佢打扮得有型同IN,自己信心不大,但唔怕,有fashion sense比我強的阿x同婆婆做後台麻!唔知大家有冇留言到,izzue有條line係賣小朋友衫的,好多時的tee仔跟大人tee係一模一樣設計的,我真係好期待可以買黎同我個仔/女一齊著呀,真係又型又IN呀!哈哈!


2007年7月28日 星期六

207-07-28 (Sat) Gift from KiKi

上次跟細妹閒聊,講開呢輪成日買野,尤其是BB野,我就叫佢唔好買咁多啦,真係成日買,太誇張了,我唔係叫佢唔好錫BB,係要量入為出呀!

當時講笑咁講,又唔見您買野比媽咪同我,佢話大人野貴喎,我就話唔見得BB野平姐...佢今日就送左兩本相簿比我,唔知係咪心生內疚呢?哈哈!

不過我知呢個細妹其實心入面都好錫我既,佢前幾日返大陸做野,放工一入屋就話買左野比我,原來係Tom & Jerry卡通片,佢好細心,見上次係大陸坐的士我睇得好投入,又知我一向鐘意睇d冇對白個d低B卡通片,所以我都幾窩心架!

氹人...其實只要有心,人地就會感覺到,價值真係唔重要!Thanks my beloved sister!!

另外,有個希望工程係時候要進行了,咩都準備就緒啦!


2007年7月27日 星期五

2007-07-27 (Fri) Dinner @ 御泰坊 and Transformers

今日一早訂左飛同太陽哥哥的朋友係APM睇Transformers,之前去左"御泰坊"食晚飯,係我最鐘意的泰國餸,有八五折之餘,琪琪識得個侍應,仲有甜品送,正!

認識Transformers係幾個月聽太陽哥哥講的,中文係變形金剛,只知道係六神合體,Gundam之類,總之係卡通機械人啦,哈哈!跟住有日經過Broadway,見到個大電視播緊套野,好緊張,好好睇,最尾先知就係套變形金剛tailer!我就問太陽哥哥點解有真人既,先知今次係現實版的電影!

套戲真係好緊張,仲緊張過男兒本色,不過兩套片種唔同,我係指緊張次數!仲有好多攪笑位:男主角第一次見變形金剛變身時嚇到死個樣啦;咁多隻變形金剛係男主角屋企出面匿埋,跟住要避開佢父母而踩爛晒花園d植物、噴泉咁,男主角爸爸仲以為地震,衝去檯底匿埋!最後仲以為地震震到成個花園都摧毀晒!成個戲院d人都笑到哈哈聲,哈哈!!另外都有感動位:大黃蜂被人捉走時,男主角做唔到d咩,無奈地睇住大黃蜂被人折磨,佢地兩個既眼神交流好感動呀;大黃蜂被斬斷腳(我仲以為佢會死添),睇到我都眼濕濕;女主角錫左男主角一啖,同佢講無論結果係點,都冇後悔上左佢架車!緊張位好多,不能盡錄,總之我大部份時間都係拳頭緊閉同手心濕晒就知啦!

近來睇的戲都唔錯,值回票價之餘,仲高過期望,正!下一套應該係..."五星級大鼠",Yeah!!


2007年7月26日 星期四

2007-07-26 (Thu) Happy Birthday to Daddy!!

今日係爸爸正日生日,其實上星期已特登上大陸一轉同佢事先慶祝左一次,但我諗佢實有太悶,今日正日又想約我地再食過,仲話請返我地,見佢咁孤伶伶一人,我地都唔忍心啦,所以同佢去左佢最鐘意的打邊爐,我仲係喉嚨痛緊呢!

細妹好有心,買定張大生日咭寫比爸爸;我見到爸爸一路睇時,可能我拍住movie,又係男人要面子吧,佢好似唔係幾想表露出黎咁,間唔中望過黎,笑下同點下頭咁,但我知道,佢應該都幾感動!我心中,又有一番說不出的感受...

一直以來,我都覺得琪琪係好錫爸爸的,感情仲深過同住的媽咪咁,坦白我就冇佢咁強烈...我諗係童年關係,琪琪成個童年都跟住爸爸的,因為佢讀的幼稚園係爸爸教會個間,所以每日返學放學就等於爸爸返工放工,做咩都一齊,仲有細個成日跟爸爸飛去泰國!所以佢地係特別有情意結的,宜家爸爸亦同琪琪最親,仲成日搵琪琪做野,最幣都係d麻煩click手野多,每次都聽琪琪呻,呻到喊都見過,唉...我錫佢,梗係唔想見到佢咁,唔明咁佢做咩要應承,其實琪琪每次都係無奈接受,唉...不過,其實都係佢錫爸爸的表現啦!我就一定唔會,因為爸爸d野,真係最好唔好插手,唔係都幾多手尾跟,同埋佢好多時都真係會"得寸進尺",幫完呢樣又加第二樣咁...又或者,係我心入面,我覺得對佢好,就等於對媽咪唔好咁...唔知呀,始終我覺得,佢對媽咪真係唔好,對佢好就會諗起媽咪宜家的慘...

好似扯得太遠了,咁岩碌齡朋友今晚會食飯,就約埋一齊隔離枱食,幾開心!仲因為多人,我地買左蛋糕,有人幫手食麻!

又係東海堂出品的雞仔蛋糕,我地似乎好鐘情呢個系列,哈哈!


爸爸對我地呢個切蛋糕安排好意外,但亦好怕羞,話大庭廣眾好瘀喎!所以我地冇唱生日歌,只係影相同許願吹蠟燭咋!琪琪真係好似爸爸呀!



眼見爸爸日漸蒼老,雖然跟佢感情唔深,但您話唔心酸就假既!係今晚餐飯,佢成日同我地碰杯,我諗佢好多心事咁...,可能有感動,又感觸啦!佢今日仲係五十歲啦,呢個歲數對我實在太遠,係我心入面,仲係頗老的感覺,所以我都好驚,始終都過左人生一大段路,但爸爸好似仲未肯落地生根咁?心酸外,我亦帶種炆同無奈的感覺...點解佢要揀條咁既路?原本...我地可以一家人,開開心心咁過;就起碼過去呢十年,我唔覺佢揀的路係岩的...五個人的快樂,變成五個人的不快樂,仲有更多人的不快樂,而換來現在的...零得著...為何?


2007年7月25日 星期三

2007-07-25 (Wed) Tea @ Leonidas

同媽咪的下午茶,個小龍蝦沙律超唔抵,樣就靚啦,但隻野鹹到死啦!反而我個牛尾意粉穩穩陣陣仲好味,個汁幾好,又大碟喎!



2007年7月24日 星期二

2007-07-24 (Tue) Colour Treatment

上星期整的Colour Treatment,因為用手機影的,今日先得閒load返d相,係咪好紅呢?只不過多年以來,染頭髮我只鐘情紅色,最討厭金色啡色呀!


2007年7月23日 星期一

2007-07-23 (Mon) 機場攪笑事件

尋日係機場幫太陽哥哥影的,因為佢係成龍大哥的die hard fans...由我呢位名攝影師操刀,效果不錯吧!

係機場的櫈上發現坐著這個咁既姿勢的人,唉...影衰晒香港!

尋日幫太陽哥哥同佢偶像影完相後,回想以前自己都試過跟自己喜愛的偶像華仔,擺同一個pose影相,就摷返出黎比大家欣賞!第一張係2004年,第二張係2002年!兩張都係係台灣影的,又會咁既?可能因為係外地,抱著旅行既心態,所以做咩都敢放d,試問係香港,人來人往,大街大巷,我都唔會咁做,大鄉里出省咩...哈哈!



2007年7月22日 星期日

2007-07-22 (Sun) 機場的新客運大樓(Terminal 2) & 翔天廊 (SkyPlaza)

今日係太陽爸爸媽媽返香港的日子,我地就早d入機場,行下個新Terminal 2同翔天廊!

去到機場第一件事,就係去離境大當ZONE A個度影返輯相先,因為我地呢幾個月返睇"衝上雲霄",有集見到ISSAC佢地係呢個scene影相,覺得好靚,講過下次去機場都要係返呢個位影相!不過宜家呢個area多左幾排櫈同cafe shop,要影唔到障礙物都有d難度架!



呢兩張雙人相仲係影左多次先成功呢!


之後去食全港只得機場同山頂至有的BURGER KING,以前機場仲係喺禁區入面先有,宜家開多兩間,共三間,兩個terminal各一間! 呢個新出的芝士磨菇BURGER真係好正,因為有我好鐘意的芝士同磨菇,太陽哥哥真係知我心意!



翔天廊好新,好大,好靚,好少人,感覺好relaxed,唔會好似Terminal 1好趕咁feel,大家睇下Terminal 2的面貌啦,個流線型頂真係幾靚!

初頭行下行下,都唔覺有咩等別,都係商店居多,之後有間扭蛋舖頭,我開頭都不太有興趣,只係陪太陽哥哥睇下有冇變形金剛,點知發現有部好靚好意的印仔扭蛋機,d印仔係兩面旋轉的,最緊要比較起其他扭蛋公仔,我覺得呢款扭蛋係極度化算囉;加上印仔比起d匙扣呀,或者就咁放係度擺冇用途的扭蛋公仔,呢款有用好多!

其實邊個人物我都冇所謂架,反而係印仔上的字句有冇用,所以我只係唔想要patty!扭左第一個,係melody,幾好呀,有用呀,仲即刻蓋黎試下,好得意呀!跟住太陽哥哥問仲要唔要,諗左幾秒,點左頭,因為真係好過癲;換完錢就再扭過,第二個,係kitty,呢個都唔錯,但只可蓋比女仔朋友同太陽哥哥囉,有d限制啦!跟住太陽哥哥又問:仲要唔要呀?諗左幾秒,又點左頭,哈哈!又去唱錢,第三個,係jimmy,幾鐘意,少有的黃色/青色,"開心"又夠意思呢!太陽哥哥又再問:仲要唔要呀?我頭先仲換多左一次,不過您已有三個,抽中重覆的機會會大d架啦!諗左幾秒,去馬!因為仲有其他想要的,哈哈!緊張的太陽哥哥仲匿埋去第二行扭蛋機度,"卟"低唔敢睇等我宣佈結果呢!點知...很可惜,重覆了jimmy...即刻想喊!嗚嗚...各位好友,我多了個jimmy,想要的話,請跟我換,橫掂重覆了,跟我換個我冇既就可以了,咁當然,最好順序係daniel,usahana,lala,kiki,先到patty啦!有冇好心人呀?

其實仲好想繼續扭的,但重覆了一個,仲邊敢?開始明白,賭博真係會令人越踩越深,各位朋友,要多加留意呀!哈哈!

門口呢個大扭蛋機真係好大個好得意呀!

仲有呢間專賣bear bear既舖頭,您地睇我呢隻bear bear幾大隻!

離開扭蛋舖頭後無耐,有間精品店好吸引我,d野幾靚,又平,最緊要係出面未見過,好似有chip n dale印仔,好大隻的大雄同技安;由於唔比影相,我唔能夠影多d新鮮野比大家睇呀!chip n dale印仔共有六個,有兩個唔靚,好容易就foul出局,淨返四個揀極都揀唔到,太陽哥哥就買晒比我啦!哈哈!

除左商舖,Terminal 2仲有個叫"娛樂消閒區(Entertainment zones)"的地方,我地先去左"航空博覽館",入面有4D戲院,好似有harry potter,但係2D,即係好似Disney有水飛濺出黎,有香味個d喎;不過已開場,所以我地都冇再駐足;見到"五星級大鼠"的紙板,大家搵唔搵到呢兩張有咩唔同呢?我又似唔似楂住隻匙羹呢?


博覽館入面當然好多展覽品啦,仲有模擬飛機客位,其他都係講關係飛機的;仲有比小朋友打PS2的地方,入面有隻大變形金剛!




離開航空博覽館後,我地去另一面睇下有咩玩;見到有頭文字D送豆腐架車,無間道人物,呢個唔知叫咩星光館,由於要收費,我地冇入去呀,反而過左隔離個遊樂場!



最吸引我地就係部射龍門機,睇過TVB的"筋肉擂台"就知係咩啦!


每局要成十個五蚊架,五十蚊鋪,幾貴!不過咁遠黎到,試下喎!我地糊里糊塗,分零鐘就玩完,都唔知發生咩事咁;最攪笑我隻腳根本都踢唔到,全部都係用手掟,不過真係好難中呀!同埋部機好勁,個波撞柱or跌落黎or彈返出黎冇落坑都識count架,見地面d電線就知,咪以為可以厄多幾球!我地中左四球咋!

跟住有人玩,我地就睇,見玩左兩球,部機熄左,個工作人員用條鎖匙開返就由頭玩過,我地心諗:唔通識得所以任玩?點知原來係有套票買架,$99就可以玩晒五六個game,仲有打拳,射籃球等等!我都覺得點解換錢時都唔主動同我地講下架...最重要係我地見到人地玩完後部機會出張分紙架,但我地頭先都冇,都唔知係咪部機其實未玩完就停左,所以我地問返d工作人員,點知個一男一女工作人員態度非常惡劣,話部機唔會壞,又話因為已經玩左第二個game,check唔返之前個game的record,咁我問點解頭先熄機您可以同佢地開返,佢就話人地係小朋友!仲要係講完呢句就拎轉頭走左去,我好似未問完喎!!真係興到爆!!我地就走去reception問公司聯絡,諗住投訴佢地!!個cashier可能係高級d既,好緊張問我地咩事,我地就將個一男一女既對話講返出黎,佢就話可能部機真係有d問題,送返鋪比我地玩,我地條氣先順d咋!

第二鋪成績仲差,射中三球咋,呢張就係分紙!變相$25局,算抵玩啦!哈哈!我地玩完仲講笑,不如行去同佢地講,呢一局係我地應份玩返既,但我都係要投訴您地!哈哈!

玩完已經夠鐘啦,所以我地琴琴青返Terminal 1,一場黎到,梗係要影低接機相證明我有份接機啦,點知有人見人影又話要影喎,唔知頭先邊個話唔影呢?呵呵!

 

今天的戰利品,好好好鐘意,好好好開心的一天呀!