細妹今朝要過對面海攪ｄ野，而我地今晚會係旺角睇"男兒本色"，佢就叫我不如下午過對面海陪佢行街，但我心諗：今晚約七點，咪要hea好多個鐘，好辛苦喎！但又唔忍心見佢一個孤零零，靈機一觸，諗起之前申請左R66旋轉餐廳的會員咭都未去拎，不如今日去拎，順便食埋午餐！即刻約埋媽咪，表嫂咁岩有野比媽咪都join埋，咁就速成左一個buffet lunch！
我地今朝先訂枱，冇晒窗口位，不過我地個位置都唔錯，因為內圈係升高咗的！自助午餐每位＄98，會員九折，食物其實普普通通，貴價野就冇乜架啦，係青口同魚生囉，仲有d甜品都唔錯，我最鐘意係糯米滋同蛋韃！buffet lunch十二點半開始，但我地一點先到，遲左人地半個鐘，一去到梗係即刻食食食，就係掛住食，唔記得影低ｄ食物，到食甜品先記得，哈哈！
不過黎得呢度食，另外一個賣點係sell環境，呢幾日幾曬幾熱大家都知啦，所以藍天白雲真係好靚呀！
食完好飽，我同細妹就周圍影相，媽咪就同表嫂傾偈，侍應姐姐好好人，特登行開比我同細妹係reception影個大logo！呢度就算完左buffet，都唔趕人走的，幾好，行完街想抖吓，或者想hea時間，我會推介呢度，兩點半仲係high tea時間呢！
呢度分外圈同內圈，外圈就可以近ｄ欣賞靚景，但坐得就冇內圈卡位／半圓形的sofa櫈咁舒服，所以點揀就適隨尊便喇！
到我地走時先記得要影低周圍環境做記錄，等我略略介紹吓呢度啦，R66旋轉餐廳位於灣仔合和中心62樓，以66分鐘旋轉一圈命名！要去餐廳真係要留意指示，因大堂電梯上到五十幾樓就要出lift，再轉另一部lift，唔留意的話，就會落返地下遊lift河架啦！轉lift時可選擇搭觀光電梯，咁就可以感受吓由低而上／由高而下的一番視覺享受！
由於餐廳會旋轉，今日就有個非常好笑既笑話發生：話說我同細妹去左一次洗手間，臨走時到媽咪同表嫂去，咁我地就叫佢地轉左一上就係；點知佢地去完返黎，鬼殺咁嘈話我地老點，佢地兜咗成個圈咁滯先到，應該轉右；但我同細妹都好肯定轉左的，我地咪試吓行，點知．．．頭先成個洗手間唔見咗，連個reception都唔見埋！！原來．．．不知不覺間，成個餐廳已轉咗半個圈，所以個洗手間同個reception都走晒位！！真係笑死人呀！！
呢幾對耳環係銅鑼灣既戰利品，仲睇中了一條連身裙呢，不過覺得貴冇買到，只係偷偷地兼好快地影左相咋！嘻嘻！
"男兒本色"真係好勁，一開始就解款車爆炸，遲幾分鐘入場都會miss咗；港產片黎講成百二分鐘真係好抵睇，雖然我對呢三個男主角一向冇咩好感，今次去睇都係因為之前睇到trailer覺得好勁，而睇完真係令我刮目相看，由頭打到落尾之餘，仲有好多特技；其次亦有好多笑位，好似同個乞兒做人工呼吸啦，班小朋友搶住比髮夾同當個炸彈係鐘啦，痾子彈啦，搽鐵打酒啦．．．等等，真係好好睇呀；房祖名既演出亦令我對佢改觀不少，最尾仲好感人添！大家快ｄ去睇啦，不過記得準時入場呀！
沒有留言:
張貼留言