2007年12月31日 星期一

2007-12-31 (Mon) 2007年除夕


今日係2007年的除夕,亦係2007年的最後一日!咁快就過左一年,真係有d唔捨得呀!上年迎接2007時仲記憶猶新,猶如昨日!


跟舊年一樣,我地前日碌齡時約好今日出去倒數;有左上年大安旨意的經驗,我地今年決定早幾個鐘出定去;講真,咁大個女真係第一次咁認真咁計劃出去倒數,幾點係邊度食野,幾點去邊個位置等等...不過咁都好,有安排,大家跟足指示,就唔會到時亂晒籠同意見唔一致啦!


2007年的最後一日,當然要見下媽咪先;我地約左媽咪食下午茶,非常豐富呢!



之後陪媽咪行街,太陽哥哥買左件褸比我,佢話好睇先要咋,thanks!^^



跟住我地就出發去尖沙咀,約左七點the gateway既翡翠拉麵小籠包,我地就早d出去行街同早d拎定飛,因為要人齊先比入,驚七點先拎有排等!我地六點一去到就拎左飛,跟住行街;到七點齊人,等左十分鐘就入得,正!食左咩餸,睇相啦,單人照又有,雙人照又有,yeah~~



除夕最後一餐晚飯喎,梗係要影多d影多d!




食飯時,alex因為泊車時發覺海運大廈樓上個露天停車場個view好正,就建議係個度倒數,好過係海旁人貼人咁迫;我地梗係舉腳贊成,但問題係十幾個人,點上去呢?因為個度係要出示泊車咭先可上去,五個就話姐,十幾個人喎...


食到九點幾,我地就慢慢行去海運大廈,因為我地要等埋elsa佢地共五人;趁呢個時間,alex就開始進行走私人口,即分批帶我地咁上去;大概十點到,所有人成功運晒上目的地 - 海運大廈樓上個露天停車場!


嘩,呢度個view真係超正,毫無障礙物阻擋視野之餘,仲直望到IFC!望住海運大廈正門開始封門,又望住海旁d人越來越多,越來越迫,反之我地就舒舒服服,空位多多,真係覺得自己好似VIP咁!



用左個相機幾個月,今晚終於搵到邊個setting係影夜景最靚既!



之前諗要係露天地方等幾個鐘,實好辛苦啦;但係度時間真係過得好快,可能我地又傾計,又分group影相,最重要又玩團體自拍,其他路人見我地咁開心都笑我地呢!雖然好凍,但真係好開心好正呀,咁先係fun麻,咁大班人一齊去現場倒數,我咁大個女都係第一次!



咁開心咁high,影下攬攬相先,人人有份,哈哈!


好多謝alex非常細心咁計定人頭特登去幫我地買拉炮,成半個人咁高既拉炮,我都係第一次見,$13支咋,非常抵玩!



當然唔少得同elsa合照,仲扮"魔女宅急便"添,哈哈!



大約2345,開始有激光煙花匯演,真係好精彩;講真,今日如果唔出黎現場倒數,係室內電視實唔多點睇,連望多兩眼都未必有興趣!但原來現場睇係咁正咁震撼架,我真係好開心好興奮呀!呢兩張係我覺得影得最靚既相片!



仲有短片~~







跟住由IFC負責倒數,十、九、八...煙火一層一層咁上,好型呀!






HAPPY NEW YEAR!!!!! 漫天彩紙就係黎自我地個十二支大拉炮啦,好靚呀!樓下d人都望上黎呢,型爆!威爆!哈哈!


跟住IFC好似著晒火咁係咁爆係咁爆,好攪笑!



2008既船呀,so cool~~




意猶未盡,返落旺角食宵夜,落旺角的過程簡直係過五關斬六將,八個人明明一齊行,跟住各散東西,最後有d搭到地鐵,有d就行去旺角,唔想再提了!凍左兩個鐘,大家都好肚餓呢!



由於琪琪亦過黎同大家say hi,咁就有藉口影返張團體照啦!呢張係2008年第一張團體照黎架,好珍貴架!



今日有計劃果然唔同d,我過得好開心,亦好充實咁迎接2008!多謝休咁有心攪今日的活動,唔少得當然要多謝alex幫手安排的大拉炮,同搵到一個咁正咁筍既位置比我地迎接2008!真係好開心、超興奮、加勁難忘!yoyoyo~~


期待下年的倒數約會,HAPPY NEW YEAR!



2007年12月30日 星期日

2007-12-30 (Sun) Jumbo 蝦條 & 小禮物


好大包Jumbo蝦條呀,係限定產品黎架,唔係成日有;我係被包裝左下角的圖片所吸引先買,心諗:真係會變到咁大條?入面有四小包,一打開...真係實物咁大喎,唔信?我特登用我部手機拼埋比大家睇架!




太陽哥哥送我的小禮物,一條矮瓜...大家知唔知係乜東東?



開估...係咪好得意呢?



仲有想買好耐,但次次去到都close左既 Jenny Bakery 曲奇餅!太陽哥哥個日落銅鑼灣偷偷買左比我,話比我食住迎2008喎!^^




今日的兩餐,太陽媽媽整的蘿蔔糕做brunch,仲有我好鐘意的譚仔記米線做晚飯!



今日都喺係食食食中渡過...