2009年4月30日 星期四

2009-04-30 (Thu) 萬發小廚 & 狼人外傳


我同太陽哥哥都鐘意食雞,平時去旺角想食雞時會去泰妃雞,其實海南雞飯真係好多地方都有得食,今日決定試新野 - 萬發小廚,因為係網上見人講好好味!



地點係廣華街,舖頭入面的壁畫好吸引呢!




加六蚊就可轉雞脾,聽人講必轉喎,因為啖啖肉,所以我地兩碟都要雞脾呀!



雞真係啖啖肉,一分錢一分貨!論雞,跟泰妃雞不遑多讓;論湯,卻不及泰妃雞,略淡同冇雞腳呀,不過就大碗好多,抵飲!




$46連湯,其實我覺得都算貴呢!



心大心細的太陽哥哥,又想食牛腩又想食魷魚,最後揀了避風塘鮮魷($55),呢碟野真係麻麻地,覺得好唔抵食呀!後悔~~~




雞飯真係唔錯,應該會再光顧!




跟住太陽哥哥話想行街睇衫,點知有收穫既唔係佢,而係我,哈哈~~仲係佢送比我既呢,佢話當係黎緊六號既禮物喎,靚衫我鐘意,岩晒我,多~晒~!




買左飛睇十點鐘狼人外傳,今日時間係刻意就過架,平時通常一放工先睇戲後食飯,但會攪到個胃好唔舒服,因為睇戲時會肚餓食零食,跟住睇完戲就食唔落晚飯,食又唔係,唔食又唔係,跟住會成日gur,gur到都怕怕...宜家盡量三餐要準時食飯,果然有效,食飽左之餘,又可以行下街,不過睇完戲就夜左少少喇,係唯一唔好既地方!


狼人外傳我覺得好緊張,無悶場,幾好睇丫;以marvel系列黎講,我覺得好睇過 ironman;但咁緊張既戲,真係唔明太陽哥哥點解會訓著左,佢仲話下次都係唔好去朗豪坊睇,d櫈唔及百老匯同GH舒服喎,但我心諗,唔舒服您又訓得著既...哈哈~~