跟住佢地係度傾計織冷衫，我就同諾諾一齊玩，佢都好黐我呢，好開心呀！做褓姆之餘，我亦充當埋攝影師，幫諾諾影靚相，我既標準係要笑，或者有得意表情先收貨架！大家睇下諾諾cute唔cute先？張張都有表情架！
好鬼祟呀，隻手仔想做咩呢？
呢張我問諾諾where're your eyes？佢就眨眼啦～～
以下呢三張我最鐘意，第一張好似係度裝我咁，第二張係smile，第三張係hello～～
不過影靚相係要付出代價架，首先要長期好似國內同胞咁踎係度，攰到有人行過時，我都冇咩力起身迴避，反而繼續踎係度，等佢地避開我然後行過我身邊；當一班人係我身邊行過時，我仲 feel 到自己有ｄ似乞衣呢，哈哈！
第二係小朋友實係咁行黎行去，我要keep住氹諾諾坐低比我影相架；最攪笑係諾諾對掌握「坐」仲有一段距離，佢會比大人早左少少時間轉身，跟住向後吞吞吞，直至feel到可以坐為止，真係好攪笑！
雖然長期踎係度好攰，但換黎諾諾記得我叫「恩恩」，佢每次叫「恩恩」，我都好開心呀！！！
跟住有個路人ＢＢ囡經過，佢一手搶左諾諾手上個紙巾套，所以諾諾唔係咁睬佢，哈哈！跟住個媽媽拎返比我地，個ＢＢ囡竟然發出叫喊聲，諾諾見狀好驚咁走過我身邊攬住我呀！嘩～呢下．．．原來我比到諾諾咁大安全感架，超開心，開心到今晚實訓唔著啫！哈哈～～
close up諾諾仔鱷魚鞋仔啫，真係好襯oscar個件tee呀！
表姐幫我同諾諾係海邊影返張相留念先～～
我就係咁好似褓姆咁睇實諾諾爬黎爬去、走黎走去啦～～
影左咁多張oscar造型，係時候換第二個big bird造型喇！諾諾好似天生係model BB一樣，竟可以擺左咁多個甫士既，仲係個個都好 kawaii，勁呀！
呢兩張勁嗲，好可愛！
呢張指天相我覺得係今日最好之作，指上個天好有feel，個天仲岩岩光光地，唔知可唔可以拎去參展呢？哈哈～～
跟住又有個路人ＢＢ囡經過，又係囡，佢好想同諾諾玩呢，佢係外國baby黎架，叫lucy呀！
比左個水樽諾諾玩佢好似如獲至寶一樣，係度楂住好耐都唔捨得放低！
又係練習時間：where's your tongue？
where're your teeth？諾諾有ｄ動作／發音，會倒及牙架，好似say PLEASE 時都係，我覺得好得意呀！
跟住開始落雨，我地就離開海旁，又去左shopping again；之後決定一齊食埋晚飯，仲就晒我地揀左青衣城呢！由赤柱到青衣，我又同諾諾一齊係車度訓覺，今日係第二次同諾諾一齊訓覺覺豬啦，哈哈～～
我地去左青衣聯邦，諾諾係度做咩呀？
哦，原來玩 peekabu～～
我地食左好多野呀，唔記得影條魚添，個冬瓜盅ｄ料好正呢！
咁多野食，有咩人呢？原來加埋表姐夫同姑丈！
雖然玩到好攰，但今日真係過得好充實兼好開心呢！下次見諾諾，好大可能係．．．後日呀，咁快？係呀！哈哈～～
沒有留言:
張貼留言