.gif)
今日係復活節假期最後一日，好開心太陽哥哥唔洗楂車，但我地已排好了schedule，全日都好full呢！首先我地要再入珀麗灣攪返ｄ婚紗相，因為前兩天揀完相，返到屋企先發現有張$1000 加相coupon唔記得用，大拿拿$1000，梗係要redeem返啦！
好少可以同太陽哥哥係日頭出街，影到呢ｄ相好開心呢！加上珀麗灣係個小島仔，好似去左效外咁，好relaxed；呢排黎左珀麗灣兩次，突然都幾鐘意呢度，好羨慕may係度住呢！不過交通費都幾貴，同夜晚想搵野食都幾唔方便，用黎渡假就唔錯，哈哈！
太陽哥哥似乎都患上左影婚紗相後遺症喎，係度擺甫．．．哈哈～～
成功redeem返一千大元，太好了！一場黎到，我地又順便check多次我地揀左既相，因為有ｄ返到去睇返，又好似應該要對調下咁；最後調動左八張相，變左又要重新對過揀邊ｄ相放大細相簿；呢part都冇咩問題，最大問題係做design既太陽哥哥，想親自排埋次序；而呢樣野，相信我地係第一對新人要求咁做，因為開頭sales姐姐只係比我地排大相簿，攪掂後諗住送我地走啦，點知我地再要求想排埋兩本細相簿，佢係都話唔得架，要比師傅決定架之類．．．但太陽哥哥好堅持，最後sales姐姐都比我地排埋，但我估佢實覺得我地呢pair超麻煩啫，哈哈！
人地話結婚相女仔緊張ｄ，估唔到太陽哥哥由揀相到做相簿都好重視同投入，呢樣都令我好開心既！
離開後我地就周圍行下影下相，咁貴車費入到黎，未天黑梗係要周圍行下啦！
婚紗店一落黎就係挪亞方舟，同埋我地影左好多靚相既沙灘！
今日天氣唔錯，不過好多人呢，我眼見已有三對新人影緊相啦！
咁岩仲見到我地個攝影師kelvin(拎住相機個個)，其實係舖頭入面已見到佢架啦，我地仲相認左，太陽哥哥仲後補返封利是比佢添！當時又係冇利是封係身，我就靈機一觸，叫太陽哥哥用佢新完成既結婚利是封個版用黎送比kelvin啦，反正可再印過，就係咁，kelvin反而成為左第一位收到我地既結婚利是封既人！
我的作品：
跟住我地行去馬灣公園，經過呢個background，當日既片段又開始浮現返出黎啦！
原來對面的石斜坡有好多唔同既字係上面架，仲係彩虹咁色，其實幾有創意，不過呢度好黑漆漆，都唔係太起眼，我都係今日先見到！
呢個每日都更換既日期好別出心裁，上次影唔到，今次要影返先！
熟悉既七彩牆再次出現係眼前，腦海浮起好多開心回憶，好開心呢！
其實呢ｄ牆暗藏玄機架，我當日都唔知，只覺得好靚好多顏色，因為我鐘意colourful既感覺！但原來呢幾堵牆，從左右咁睇，係兩幅完全唔同既畫黎架！
從左望去：
從右望去：
另外幾堵牆，有紅色：
有黃色：
有綠色：
有藍色，同埋前些有紫色，不過只影到一邊，因為夠鐘關門，管理員唔比我地再向前行了．．．
最後係呢個大貝殼，可以講係馬灣公園地標，一見到佢就知邊度黎了！當日著住婚紗禮服咁影，宜家著住便服影，感覺特別~~
行完馬灣公園已六點啦，因為約了呀仔伉儷七點半尖沙咀等，係時候要走了；其實我仲想去埋碼頭個邊架，聽人講個邊好靚好舒服，入左黎兩次都去唔成，係未來日子又應該唔會再無拿拿入黎珀麗灣，去唔到有ｄ失望呢！
晚飯去左呀仔介紹既日本餐廳，佢話呢度既吞拿魚係超超超同勁勁勁好味架喎，可惜我唔食魚生既，哈哈！
我的黑毛和牛肉飯定食：
太陽哥哥的鐵皮藍鰭香燒吞拿魚定食：
我個定食真係好好味呀，呢度真係冇介紹錯，唔怪之得太陽哥哥話呀仔佢地食慣好野，跟佢食野實冇死！不過我略嫌呢度貴左少少，定食唔太大份都要一百蚊份喇！
呀仔的火燒藍鰭吞拿魚赤身飯定食：
Hazel 的藍鰭吞拿魚扒飯定食：
我越黎越覺得呀仔個 look 有ｄ似威哥呢！
沒有留言:
張貼留言