今日係零九年四月的第一天，除左係愚人節外，亦係我人生好難忘同好開心的一天，就係影婚紗相既日子！
一路好擔心今日的天氣，但尋日開始已經好老定，所以好安心咁期待今日既來臨！不過今朝都有段插曲，就係太陽哥哥一早去泵氫氣球，尋日朝都去左間舖頭confirm一次隻氣球岩唔岩，亦講好今朝會八點半到，點知去到未開．．．好旁惶．．．九點．．．九點三．．．都冇人黎．．．終於到九點四有人黎啦，嚇餐死！個呀嬸話個呀伯冇交低喎，頂．．．算，最緊要買到！
我地遲左五分鐘，十點四到達珀麗灣！
irene原來係咁既樣，我都係上網見好多人讚佢先book佢咋！佢好病呀，聽ｄ女仔講佢有左呀，好在佢都照返工咋，因為我真係覺得佢化得好好；本身我好抗拒化妝，總覺得自己係唔受妝的人，亦最怕一化左妝會變左第二個人樣，但今日既妝都睇得出係自己，所以我好滿意呀！irene真係掂架，大家有機會就book佢啦！
先卷髮，跟住開始化妝：
化完妝就去廁所先，跟住要換衫出發，去廁所時經過條大通道，影下相先；認得出係自己，好開心，哈哈！
跟住同攝影師同助手溝通下先，今日攝影師係kelvin，又係我上網見好好comment先book佢，助手係呀lok，佢地兩個都好young好nice，最緊要young，咁先冇代溝麻！我地同佢講左想要一個開心同sweet既style，cool look一律唔要，kelvin都好明白，亦好細心留意我地既samples同帶來既道具，仲話已經開始有靈感呢！其實我都信呀，因為六七pair人入面，我只係見到我地先有野帶黎，仲係兩大袋加一袋氫氣球呢，哈哈！
呢個係第一個造型，我好鐘意既黃色裙；外景我地揀左迪欣湖，放棄石澳真係一個明智既選擇，因為呢度好多景點同埋好靚呀！
因為呢part係外景，我地係咁周圍影下相，攝影師都冇理我地，可惜冇合照．．．其實呢part有兩位特別嘉賓，就係表姐同諾諾，呢部份會留返下篇entry先講～～
之後返去轉第二個造型，呢個亦係我最鐘意既造型，因為真係最似自己呀！
去廁所時又影影影，呢個妝咁滿意，一心要影低比phoebe做參考！
第二個外景係珀麗灣入面馬灣公園同沙灘，中間影唔到咩相，因為要同時影相加拍video，非常忙碌，冇機會自拍！
影馬灣公園同沙灘呢兩部份係好開心好難忘既，可能要兼顧攝影師同錄影師的指示同吩咐，我地又非常有默契同配合，佢地又拍得好開心，攝影師仲叫太陽哥哥做演技派，因為佢真係表情豐富喎！(浮誇就真啦!! 不過面部表情對一輯開心既婚紗相又真係好重要既...)
錄影師亦跟我地講話如果pair pair都好似我地咁好玩咁好拍就好喇！standard既video係錄二十分鐘度，但拍我地over晒三十分鐘呢！加上我地又帶左好多道具，比到佢地好多靈感喎，好似太陽哥哥畫個兩對波鞋，好多人見到都好驚訝，攝影師們亦好鐘意影；仲有氫氣球襯沙灘，真係好浪漫同好靚呀！好可惜我唔記得影低太陽哥哥咁辛苦買返黎既氫氣球啦！
第三個造型，換上一套隆重既婚妙，因為影室內studio！
太陽哥哥的偷拍，亦係唯一一張，因為周圍都係攝錄機，費時連累kelvin同呀lok比公司鬧啦～～
最後的夜景環節，好記得問過試衫部sales係唔可以換返晚裝影相，點知kelvin比喎，超開心！呢個已經好意外啦，點知仲有第二個意外，就係kelvin又同我地落返沙灘影煙花景同夜景，呢個連門市部sales都好肯定同我地講過，係唔會落第二次沙灘架，因為冇燈，要打燈等等，所謂青馬大橋夜景只係係studio內的露台影出去而已！所以我地完全冇expect過kelvin會同我地落返沙灘影，佢地仲帶左兩個喼仔，入面有燈同腳架等，最驚訝係有ｄ蠟燭燈既物體／道具，佢一個個咁係個喼度拎出黎，跟住放係沙上面，嘩，真係好浪漫好靚呀！
我地真係超滿意同勁鐘意kelvin＋呀lok，兩個都好細心，好體貼，好明白我地鐘意ｄ咩，又唔計較過晒時間；我想特別一提，當時我地出沙灘時，舖頭的其他新人已影晒相走晒架啦，但我地先開始落沙灘影夜景；當時得返一個sales，佢仲換好晒便裝，坐係梳化度睇電視等我地出發同返黎添！
諗住影完沙灘就完，點知仲要去影街景，當時已接近十點啦，今晚剛起季後風，好大風、好凍，尤其是我衣衫單薄；係沙灘已經好凍，不過為左靚，都要堅持落去，哈哈！同埋我地都好enjoy，未係有好攰的感覺！
終於煞科，好唔捨得呀！呀lok幫我地影的唯一一張合照，傻瓜機都一take過影得咁靚，果然食呢行飯呀下！
返到影樓叫sales幫我地四個影返張相留意，左邊係呀lok，右邊係kelvin，認住佢地呀，我超級兼誠意推介！
今日真係難忘經驗＋開心回憶的一天，我以為女仔先會有呢種感覺，但點知太陽哥哥都係，佢同我講影得好開心好難忘，都好心急想快ｄ睇相呢！成個影相過程都係同自己鐘意既人一齊，話晒影左成日相咁長，當中的一種交流，大家都好深感受，好難形容．．．總之好開心好開心啦，好似加重左對對方既愛咁；影完相後，我亦有種"我真係要結婚喇!!"一種好實在既感覺，而呢種感覺，係就算book酒席、book婚紗相、揀衫時都冇架．．．好啦，係時候正式宣佈：
我922結婚啦，大家到時早ｄ到啦！
沒有留言:
張貼留言