2008-01-21 (Mon) 北海道東京九天之旅 - 第二天 (下)

之後去左昭和新山的熊牧場，主要係睇火山同野熊！

入場票~~

呢度好多好大隻的野熊，仲識得企係身．．．因為等人餵蘋果，佢地好餓咁，眼界亦非常準，遠處可一"口"將蘋果接住！勁！

不過呢度好ｄ臭．．．睇動物我一向麻麻，好快就去左shopping，買左北海道限定的monchichi筆〔630円〕同鎖匙扣〔504円〕比媽咪！

香港時間三點半準時日落，後面就係昭和新山，長期有煙霧噴出，其實仲有個有珠火山，但我真係唔知邊個打邊個．．．哈哈！

男子組女子組都影返張先~~

又凍到抽筋，今次試左暖笠笠的粟米湯〔120円〕！

跟住返酒店，今晚我地會入住溫泉酒店，意外地被安排住榻榻米房間，仲好大間呢！

安置行李後就即刻去浸溫泉，由於gigi有喜唔浸得，幾經掙扎後，我決定豁出去，都敢自己一個去浸，不過都係快入水快上水閃，哈哈！呢間酒店的溫泉冇咩特別，只得兩個室內大池，同一個得露台size既室外細池！最難忘係有一個小女孩同一個小男孩同我玩，佢地應該係兩姐弟，我去室外浸佢地又去室外，我返入室內佢地又跟住我，好kawaii！我後來仲見到佢地媽咪呢，生完兩個都咁索，勁！哈哈！ 浸完坐埋一邊沖涼時，細佬仲走過黎拍我背脊呢，真多手！佢地仲唔捨得我咁，同我講野，應該係問我野．．．可惜我唔明啦．．．

浸完溫泉就係呢個大排檔食自助餐~~

好大個煲呀，放成個人落去煮都得呢！

點解我地叫呢度做大排檔，除左大同多人外，真係好多野食；有燒牛扒、好多種好好味既意粉、魚生等等．．．好好味！

飯後又去左便利店，買左蜜瓜味fanta〔147円〕同北海道先有既卡樂B薯片〔145円〕！

正當諗住訓覺既時候，太陽哥哥帶我埋一邊，原來佢靜靜雞攪左ｄ野比我．．．真係好好好surprise！佢話一早計劃左係日本同我預祝生日，其實冇諗住咁早比我既，但今日間房難得係榻榻米咁特別，又大間，就不如今日啦！計我話，佢應該係怕忍唔到咁多日就真，哈哈！

其實個蛋糕佢幾時買我都冇為意呢！但我真係好驚喜好開心，雖然下個月先係我生日，但太陽哥哥特登為我做定左咁多野，我真係好感動！因為我成日同佢一齊，係我嚴密監視下，佢應該好少時間做到私人野，哈哈！畫呢幅畫，我諗佢又係公司又係屋企靜靜雞偷時間畫，當中的心意同付出，淨係呢點，已經令我好好好感動了！

我最愛的心型pattern．．．呢條係我人生中第一條收到的tiffany手鍊，當然好鐘意啦！

戴住影返張相先，多謝太陽哥哥！！！

咁難忘的日子，梗係要兩個人一齊上鏡啦，自拍時間~~

簡單而隆重既切蛋糕儀式，其實我地係大排檔已經食到好飽，不過太陽哥哥咁有心，我都要係咁．．．餵太陽哥哥食，其實每次比佢個啖我都"不"到好大啖，自己就個啖就細細啖，咁就唔覺唔覺咁食晒啦！哈哈！

今個生日雖然早左ｄ慶祝，可能係咁，真係估唔到同冇諗過，所以真係好好好驚喜，加好好好開心，覺得太陽哥哥真係好錫我．．．所以真係好多謝太陽哥哥比左個咁難忘的生日我！Thanks！！！