DAY 4 - 滑雪~狸小路商店街/購物城自由購物
今日行程係太陽哥哥同victor最期待既，就係滑雪啦，佢地亦因為想試下係日本滑雪先咁想黎北海道，因為佢地之前已去過韓國兩次玩滑雪了；我都睇過佢地旅行時ｄ相同movies，都滑得唔錯架！我自己就未滑過雪，只係以前去韓國時玩過雪兜咋！食過早餐就出發了，跟尋晚的晚餐一樣，酒店食物的水準認真麻麻．．．
天都未光晒我地就出發啦~~
呢位係教練，雖然佢係位伯伯，但都非常身手敏捷同very nice nice，仲親身示範跌倒時點起身呢，好攪笑！
滑雪場其中一邊景色，有吊車可搭上山頂滑落黎架，不過當然係 for advance人士啦，太陽哥哥同victor都唔敢去，一來望上去都幾高吓，二來唔想丟低我啦！擺返個靚甫士影相先~~
兩兄弟一齊第三次滑雪，咁有意義，當然要影低留念啦！
我同太陽哥哥套衫係咪好襯呢？原本冇咁好彩同一隻色架，因為我地係租既，派到咩色比您就要要咩色，冇得揀，但拎衫時我最尾，我件jacket係沉brown色，嘩，阿婆咩．．．著左真係全場最型囉，我梗係要求換啦，但因為冇衫剩，個staff就問我介唔介意著男裝中碼，為左靚，冇辦法啦，雖然大件左ｄ，但我唔要做阿婆呀！
滑雪收費：用具〔每人@4500円〕，上身jacket〔每人@2300円〕；太陽哥哥話日本租ｄ衫比起韓國，乾淨好多同新好多，係勁乾淨同勁新好多倍，仲話以後滑雪都去日本喎！嘩，好彩我同佢去呢次係日本咋，因為我勁驚污糟呢，哈哈！
第一次滑雪既我，蝦碌百出，當然唔少得拍低短片跟大家分享啦；不過短片唔多，因為好多時我都係同太陽哥哥一齊滑落去既！
我覺得滑雪都幾辛苦，滑到落去，又要除左對雪橇，跟住要拎返上斜路；呢下先最甘，睇太陽哥哥就知，因為佢每次都要拎兩對雪橇呀！上到去又要著返對雪橇，又上又落，又著又除，好大勞動力，而拎雪橇上斜既時間仲多過滑落黎個下既時間好多倍呢！開頭戴晒冷帽耳套，好快就唔洗用了，因為全身都好興呢！
滑兩野我都攰了，發現有雪兜玩，當然即刻衝過去玩啦，又唔洗咩技術，又滑得快喎，正呀！佢地兩個好似係荒島度拖住救生艇求生咁呀，哈哈！
我同太陽哥哥先玩雙人雪兜，跟住我自己再玩一次單人雪兜；冇左百幾磅重量，我第二次滑得好快，仲好高，滑到上邊緣位呢，勁！好好玩呀！
滑雪場另一邊景色，右邊個兩個人仔就係兩位壯男喇，佢地想滑長ｄ高ｄ，就向高處進發，我就梗係留守較低既地方啦，等佢地滑到咁上下我就join埋佢地囉！
到我幫太陽哥哥拍片啦，無論平衡呀、控制呀各方面，佢當然叻我好多啦，不過．．．"炒"左入網喎，好好笑呀，哈哈！
佢地話呢度的確比韓國景靚同乾淨，但論場既好玩程度，好似韓國個個好滑ｄ，冇咁辛苦，又話下次去韓國滑喎；究竟下次去日本定韓國架？其實去邊都好，我玩到雪上電單車就得架啦，係任我楂個隻喎！哈哈！
玩到好攰了，我地冇咩野做，導遊又得閒，佢見我地坐係度，就主動幫我地起左個陣同我地影相，呢個idea幾好喎！
個陣咁型，梗係唔好晒啦！
似唔似個ｄ完成左登峰記錄，然後插旗影相既動作呢？
影完靜態相，又係影動態相既時候啦！太陽哥哥次次都跳到好高呀，我就當然冇佢跳得咁高啦，隻雪靴其實紮到上小腿，好難發力呀！
跳到跌低了，好攰呀，不如索性唔好起身啦，掟死您！嘻嘻~~
跟住仲要麻煩團友幫我地影張一齊跳既添！
跳左兩張就攪掂，yeah~~
玩到冇野好玩，我地越玩越high，拍埋動作片添，超爆笑呢！
情緒高漲，既然又唔會濕身既，横掂尾聲，不如就盡地一煲，訓身啦！
太陽哥哥睇都唔睇下入面有冇樹枝，就一野轉身跳入後面既"雪叢"，真係好曳呀！不過佢試跳成功，仲話呢度ｄ雪林好多，我都忍唔住要試下！好軟棉棉呀，林過滑雪場地面ｄ雪好多好多倍呢，睇我地成個人吸左入去就知啦！
玩完就醫肚，午膳於滑雪場，我地仲係度搵到導遊推介既DYDO粟米湯呢〔120円〕，仲唔一量入貨咩！
臨離開滑雪場留倩影，原來得零下七度，掛住玩，一ｄ都唔覺呢！
沒有留言:
張貼留言