DAY 3 - 雪上電單車~小樽運河~shopping@小樽市(水晶音樂城&玻璃趣緻街)
今日係我好期待既重點行程，因為玩雪上電單車呀！我有電單車牌好多朋友都知，但咁大個女，都係第一次楂雪上電單車，所以好期待，其實呢次黎北海道，我渴望玩雪上電單車多過滑雪好多架！
咁重要既行程，梗係著返件sharp醒衫影相啦！今早係大排檔食過早餐後就出發，太陽哥哥係呢間酒店同我預祝左一個咁難忘既生日，梗係要係酒店門口影返張留念啦！有機會都可考慮再入住呢間酒店，因為榻榻米房間同大排檔餐廳真係好正！
雪上電單車收費：單人車〔10000円〕／雙人車〔15000円〕
我地開頭其實都唔知會點楂同楂去邊，只知要跟住帶頭既工作人員架車行；我先比太陽哥哥楂先，開車後發覺我地向山上方向楂去，周圍既景色真係勁勁勁靚呀，一齊楂住雪上電單車上雪山，漫天雪景，真係好浪漫呀！
我向後影的一幅相，似雪上電單車鴨仔團嗎？橙色衫個個咪victor囉！
我地梗係緊次住工作人員，楂第一名啦！
去到山頂，諗住會停車可轉人楂，點知調完頭就繼續落返山，我好擔心冇得楂，所以好快咁偷偷同太陽哥哥調左位，it's my turn啦！太陽哥哥自拍低我流露住開心表情的一面！
由於停左一停，被後面架雙人車爬左頭添，但楂車出名辣過人既我，好快就爬返佢頭啦！哼！見到尾燈當您羸，哈哈！
過左一陣，收到指示要停埋一邊，以為被訓話添，點知唔係，哦．．．終於停低比我地影下相啦！
其實一路楂都好大風吹埋面度，個個都好凍，但係得我一個就覺得好熱，一停車仲要即刻除低件羽絨同手套，可能太開心啦！yeah~~
楂雪上電單車上到雪山頂，唔係咁多機會架，呢度真係好靚呀！
周圍白雪雪，影相咁靚，梗係要影多ｄ動感相啦！一於由上次同太陽哥哥的台灣之旅，跳到黎北海道雪山啦！jump jump jump~~ yeah yeah yeah~~我真係好開心呀！！！
全靠我地架車排頭位，冇野阻擋，風景一流，先可以係前面條路係咁跳係咁影咋；後面既團友見我地影得咁開心又想學，就上前叫我地幫手影，由於佢地冇我地平時訓練有素咁跳慣晒，加上年紀又冇我地咁green，效果當然就．．．差ｄ啦，哈哈！跳左好多次先有張勉強OK，有pair直情跳極都唔得，非常麻麻．．．哈哈！所以我覺得我地呢輯相真係超正超勁，係一個非常好的回憶！
下面兩張相，四個窿四隻腳，係同一個窿黎架，四個窿都咁深，點可以調晒位都入得返同一個窿既？我都覺得好奇呀！咪又係因為拜奀皮既太陽哥哥所賜囉，我過去佢個兩個窿度唔難呀，最難係佢係條路度一跳起，再180度轉身．．．竟然跳返入我個兩個窿度呀，一ｄ"歪"都冇，非常準呢！哈哈！
開心時間好短咋，落返山後雪上電單車之旅就完結！我覺得車速太慢了，可能要鴨仔團咁一個跟一個啦，如果自己鐘意點楂就點楂就好好多了；不過如果三十人個個鐘意點楂就點楂，又好似危險左ｄ既，佢都唔會比咁多架雪上電單車您靠飛啦！希望第時有機會自由行兼租到ｄ自己鐘意點楂就點楂既雪上電單車啦！
臨走時見到好大個雪鏟，見顏色咁sharp就．．．借黎影下相啦！
意圖偷襲太陽哥哥，可惜終告失敗．．．嘻嘻~~
上車前買左罐暖笠笠既粟米湯〔150円〕！
午膳於小樽，咁凍既天氣下食鐵扒，格外溫暖，餐廳設計好有特色呢！
餐廳門口既．．．唔知點叫呢舊野，好大個整左係路邊，好特別呢！
沒有留言:
張貼留言