2008-01-25 (Fri) 北海道東京九天之旅 - 第六天 (下)

之後坐JR去上野行街〔@290円〕，係車站買左罐好好味既pokka檸檬熱飲〔120円〕，仲影到張好有特別效果既相呢！

第一站當然又係百貨公司睇agnes b啦，行程將近尾聲，都有ｄ擔心冇收穫．．．呢兩個袋既顏色係咪好少見同型呢？原來係日本spring season新出的色系，袋款唔算係超超超靚，但真係好想買到agnes b袋，就決定買啦〔@9450円稅入(9000円)〕，；兩隻色暫時只係日本有售，要咩色好呢？既然揀唔到，就兩個買晒啦，哈哈！開頭太陽哥哥都唔贊成架，但我諗住一個自己，一個細妹，加上victor & gigi都一致贊成，最大原因係香港冇麻，同埋呢ｄ手袋仔實用得到既，嘻嘻~~ 希望香港遲ｄ都唔會有啦，咁我地就型爆！

另外，太陽哥哥亦揀了個公事包斜揹款〔@15750円稅入(15000円)〕，佢聖誕已想要個公事包袋款，香港揀唔到，我都叫佢黎到日本先買，當然係我買比佢啦；由於我都未揀聖誕禮物，宜家就當互送聖誕禮物囉；雖然遲左，但最緊要揀到份實用又真係鐘意麻！買咁多，過左一萬円仲可以退稅呢，又平多幾十蚊，yeah！

 

拎住戰利品係OICITY前影返張先！

 

跟住行上野街頭，仲去左間幾層高既玩具舖頭，有好多得意野呢，梗係要影低比我鐘意kitty既朋友睇啦！

跟住回程返池袋食飯〔@160円〕！

我地係"中華食堂"食晚飯，呢餐好抵食，埋單只係3230円咋！

返到酒店導遊派發訂了的手信，呢三樣係我地袋訂既，有北海道夕張蜜瓜朱古力〔@1200円〕、炸天婦羅〔@1200円〕、帆立貝〔@1500円〕！炸天婦係我屋企既favourite，試過幫媽咪買成十幾包當新年拜年時送禮呢！

當然唔少得"晒冷"今日係迪士尼既手信啦，不過有ｄ影漏左，激死！

今日好開心，因算係買到最多心水野既一天了！