2009年12月14日 星期一

2009-12-14 (Mon) 拍拖假期.Pre-xmas celebration


因為太陽哥哥今年仲有一日假期,早前約好我今日一齊放,所以今日就係我地既拍拖假期喇!


原本約好媽咪一齊係荃灣飲茶順便拎埋結婚沖晒既相,點知我地剛起身媽咪就打黎,話尋晚姑媽約佢今朝係青衣城飲茶,仲有表姐同諾諾,問我改去同佢地一齊飲茶好無,最多佢聽日幫我拎相喎;可以見到諾諾,表姐又唔知我會放假,去比個驚喜佢地都好喎,咁就go啦!



果然,表姐同諾諾見到我就好surprise,最surprise係有埋sunny哥哥!諾諾今日好嗲我呀,成日捉住我隻手,又摸又用塊面哄埋黎,冧死我!




呢幾張相係諾諾影架~~自拍都OK喎,伸脷個張好攪笑!




飲完茶多謝表姐車我地去荃灣拎相,之後仲去埋對面海;係中環分別後,我同太陽哥哥就開始二人世界啦,先去九如坊後面條歌賦街買聖誕咭用的信封!嘩...呢度d路好QK呀,我真係識黎呢d地方呢!



原來太陽哥哥識咁多野架,佢話呢度d信封價錢最經濟,我地結婚請帖個款信封都係呢間鋪頭買架!




行去搭地鐵時,比我地撞到李麗珍,呢個係佢背影,估唔到佢真人都唔老,仲係好清純呀!



跟住我地就係銅鑼灣行街,順道揀下聖誕禮物!行街時發現太陽哥哥好鐘意個間日本tee shop,繼闖入台灣後進駐埋香港啦,太陽哥哥好開心呢!我地今日仲撞到好多明星呀,係銅鑼灣街頭竟然撞到陳奕迅迎面行過,我地同佢HI佢仲同我地笑;仲有係Y3入面見到陳自強!



行攰了就係超市買左生果去starbucks食!




Royce出左隻新既白朱古力芝士chips呀,唔知係咪同原味一樣咁好食呢?但礙於屋企實在太多零食食唔晒,同埋媽咪十月去完日本買既Royce都仲未食晒,我地唔敢買住,怕擺到過期呀!




晚餐係我地今日既主要節目之一,我地想提早慶祝埋聖誕節,唔係到下星期出去食實比人掠~~諗左好耐,上山頂試 Bubba Gump定係新開無耐既Towngas Avenue好?最後揀左後者,因為我地都係銅鑼灣shopping,貪方便!嘻嘻~~



食飯前先行下個showroom,見到有馬仔本明火煮食宣傳書仔,真版書仔多網上版幾頁架,即刻拎返幾本先!




過隔離就係餐廳範圍:



餐廳唔係好多人,都唔滿,一來星期一,二來可能真係冇咩人識呢度,又或者d人會覺得食西餐都唔會黎呢度,但我覺得呢度好唔錯,推介大家要試呀!




我地訂左窗口位,呢度環境好好呀,真係幾岩二人世界,或者朋友傾下計!影下d擺設先:




麵包籃~~呢度楂麵包既香草牛油真係super good呀!




『法式酒香龍蝦湯』~~睇太陽哥哥飲得咁滋味就知好好味啦,好味之餘仲好足料,入面堅有幾舊龍蝦肉架!讚~~




我既『西班牙豪華豚配香桃醬』:




太陽哥哥既『香草芝士焗龍蝦』:




飲杯~~Merry Christmas!合照:



 我個"乳豬"好正呀,把刀切落去都卜卜聲,好脆呀!怪不之係鎮店之寶!




甜品係『明火焗火焰雪山』,經埋將著緊火既液體倒入去,碟邊就會出現火焰:



藍色個d就係火焰啦,不過相機影得唔係咁清楚呀!




食食下野廚師會出黎同每檯客人見個面,傾下計,問我地覺得今晚d餸點架,呢個真係好impressed!



呢度位經理都好好人,又有禮貌,會同每檯客人傾下計,介紹下d菜咁;我估佢見我地岩咀形,每次埋黎都越傾越耐,因為太岩傾既關係,佢仲請左個甜品我地食,名為『幸福空氣』,其實即梳乎里,係餐廳既主打之一,希望我地幸幸福福呀






晚飯完已經九點半,即刻衝去IKEA買櫈,等左兩個月,我地想要既櫈終於有貨啦!



因為晏畫去到銅鑼灣時,放低左好重既信封係PT度,要麻煩Elsa放工拎黎比我,咁重真係唔好意思,唔該晒!見另一位好耐冇見既PT同事都係度,大家就影返張相留念!嘻嘻~~




返到屋企太陽哥哥即刻開工...砌櫈!



我地的...愛之櫈!哈哈~~




今日節目之一係揀聖誕禮物麻,太陽哥哥係5cm睇中件皮褸,做緊七折,但我覺得未係好抵,聖誕後分分鐘會半價添...但既然佢咁鐘意,千金難買心頭好,何況係聖誕禮物,既然揀岩,最好梗係聖誕前買啦,所以都好快扑鎚!不過最重要係...千祈唔好聖誕後被我見到更加平呀,唔係我會嬲到震架!哈哈~~



至於我既聖誕禮物,如無意外應該係電話一部,我用緊呢部都三年了,係剛同太陽哥哥拍拖時佢送比我既,一路都有份情意結,唔係點會用三年咁耐丫!但真係想要部可以寫字既,因為我打sms超慢,一慢我就炆...於是就決定換啦~~我要求好簡單:要有筆、指甲detect到最好、薄身、瑩幕大d、3G、唔要business function,所以四五千個d唔岩我啦!


經豐澤朋友介紹後,其實選擇唔多,因為有筆都較少了,宜家換電話通常都換好多function個d,最後佢介紹左兩部比我:LG GT505 & Samsung S8000,不過我要諗諗先,始終呢兩個牌子都跌價幾快,但大牌子既勁機又真係唔岩我。


LG GT505:



Samsung S8000:

 



By the way,今日既拍拖假期真係過得好開心呀!平時真係好少機會我同太陽哥哥都一齊放假架!



沒有留言:

張貼留言