玩晒鬼屋後，其他時間都冇咁心急了，去ｄ未玩過的遊戲先，包括馳車天地同小小世界！馳車天地原來幾好玩，我仲以為好低能添，點知係堅踩油架車先會行架！每人仲獲頒贈米奇簽發既正式駕駛執照添，仲係永久生效架，我仲叫太陽哥哥返工楂車時，萬一比警察抄牌，一於比呢張永久駕駛執照警察叔叔，仲要話係米奇頒架，冇可能有問題喎．．．哈哈！
小小世界第一次黎，著了它的 tee影相，好有親切感呢！
入面好靚，坐住架船仔，就像環遊了世界一次咁！
最後有唔同語言的"再見"，好有心思！
出黎時剛好夠鐘，公仔們走晒出黎表演音樂！
好鐘意小小世界的Q版迪士尼公仔們！點解冇chip n dale架．．．
幻想世界總給人開心歡樂的感覺，所以我最鐘意呢個 land！呢度仲有幾間屋仔可以同迪士尼卡通人物影相架，但望入去見到winnie the pooh都係平時咁樣，冇咩特別，之前都影過兩次了，所以唔特登排隊影了！
咖啡杯後到小飛象，呢兩款遊戲都冇玩，太低Ｂ了，哈哈！不過呢兩個影相demo，我卻係第一次見同影相，以前黎通常太多人，亦唔會走近咖啡杯及小飛象，今日少人就見到，當然要埋去影張相呀！
好似同細妹影得開心ｄ喎，哈哈！多得太陽哥哥的指示啫！琪琪好勇，坐了上小飛象個頭度呀，嚇死我．．．一陣成個頭跌黎點算呀！原本佢仲叫我一人一邊坐上小飛象既耳仔度架，但我驚我地整斷人地隻耳仔先唔坐咋．．．
3D米奇幻想曲，琪琪原來未睇過，咁就一齊去睇啦；原來太陽哥哥又未睇過米奇金像獎，不過時間唔夾，最後都冇去，有ｄ唔完美既感覺添，不過佢去到可能都會訓著呢，哈哈！
跟住shopping時間，米奇手掌就見過好多啦，米奇V字手勢就好少見吧！
太陽哥哥朋友除左免費帶我地入場外，買野仲有discount添，呢樣先最吸引呀！我一心諗住黎狂掃chip n dale 產品，點知都冇乜，好失望好失望．．．最後只睇岩少量產品，有呢三種鉛芯筆／原子筆，同埋chip n dale 電筒仔！
tee 方面，呢幾件都幾岩我心水，唔理啦，影晒相先慢慢揀！最後我買左all you need is mickey，其實呔仔個件都好盞鬼，但我著似乎太低Ｂ了，唯有放棄啦！仲有史迪仔個件都好正，可惜我長頭髮都唔妨睇到，叫太陽哥哥要佢又嫌低Ｂ，冇計啦，最後太陽哥哥就揀左白底黑字個件！
chip n dale cushion同磁石公仔亦係我既戰利品，cushion好特別架，一邊係chip一邊係dale黎架！
萬聖節版公仔：
黃昏下的睡公主城堡，影到好多人，唔靚呢！
城堡前的米奇像因為萬聖節而換上了呀 jack，我都係喜歡米奇多ｄ！
商店外見到 jack同人影緊相，諗住都影返張啦，點知話截左龍了，因為 jack要預備去巡遊呀．．．唯有用商店裡的 jack公仔同自己影返張啦！
拮死您！插死您！驚唔驚？
巡遊啦，冇咩特別，我都係鐘意見到開心既迪士尼卡通人物多過ｄ鬼怪，何況上年已睇過了，但今年少了個米奇大氣球呀！
最後最後，等左成晚，終於見到佢地啦．．．
但佢地跑得好快．．．好想捉住佢地影相呀！同佢地影唔到相，係今晚最大的遺憾．．．
嘩！咩事？原來巡遊後仲有45分鐘到八點先放煙花，兩隻野太攰要抖抖！
有個小朋友幾得意，又學佢地訓係地度！
但佢跟住係咁撩太陽哥哥，我教佢叫太陽哥哥做"魔鬼"，佢又叫返我做獅子，好攪笑！
太陽哥哥請糖佢食，佢就講：多謝魔鬼！哈哈！
玩似好friend咁喎，最後太陽哥哥都唔訓覺啦！走時仲攪笑，小朋友拖住佢呀姨行，冇拿拿走上前另一隻手拖住太陽哥哥呀！呢個 look似一家人喎，我仲笑太陽哥哥睇下佢呀姨同您好似兩公婆咁喎，哈哈哈哈(相中小朋友後面個位就係佢呀姨喇)！跟住小朋友連拖住呀姨隻手都放埋，走過黎拖住我呀，數秒間，我諗到第時我地係咪會咁呢？嘻嘻~~
趕返青衣城，同太陽媽媽食日飯，原以為只得我同太陽媽媽食，咪叫埋媽咪囉，點知威哥又無街去，琪琪又冇野做，黎到又見到太陽爸爸，突然變左兩家人食飯咁呀，好熱鬧！威哥的紅豆IQ題，玩左我地十分鐘，印象難忘！
迪士尼每住工作人員身上面都有貼紙派架，由探險世界開始，一見人就問，拎到去明日世界、幻想世界，呢ｄ就係今日的貼紙紀念品啦，拎下拎下原來拎左咁多，多到自己都唔信呢！
其實有幾多款都唔知，究竟要拎幾多張先會儲齊呢？
張chip n dale值錢囉，全日先有一張咋！
呢款萬聖節貼紙係呢個月先有架咋，仲有棉花糖都係！
今日最遺憾，係冇同到迪士尼卡通人物影相呀，開頭只諗住以前都影過，唔洗花時間排隊影啦，點知出事啦．．．萬聖節佢地ｄ衫唔同架麻，我都冇為意．．．返黎上網睇人地ｄ blog先知呀，好唔開心呢！但其實話時話，係屋仔我都見唔到佢地，朋友話屋仔個ｄ應該係正常衫，係街度突然出現個ｄ先會係萬聖節衫；如果係咁，即係見到只係靠by luck，我今日全日都見唔到呀，不過我都好少係美國小鎮大街，夜晚先去，都走晒啦．．．好唔開心呀，最重要係太陽哥哥都冇影過架麻，好想同佢一齊影呢！．．．
沒有留言:
張貼留言