我地等緊第一班巴士，舅父尋晚一直叫我地唔好送晴晴，晏ｄ到機場送佢地就得了，但今日一別，都唔知幾時再見，上一次都十年前，雖然佢地係咁講下年去美國探佢地，但都唔知成唔成行到，加上表妹表弟到時都唔知係咪係西雅圖，而今次佢地返黎，話晒都因為睇我出嫁，所以我地一定要唔訓覺都要去送機！
黎個簡單的goodbye with hug，太陽哥哥都有份，我事後仲問佢表妹好唔好攬？哈哈！晴晴入閘後，我地就去 terminal 2 飲茶！
因為佢地班機十點半先開始check-in，我地都係係度hea．．．皓仔仲攰到訓著左呢！
最後我地個個都面露疲態，舅父就叫我地返屋企啦，大家面對面連恰下都唔好意思，夾硬撐住喎；反正都差唔多時間，我地就真係分別啦，我地互相攬下，真係好唔捨得．．．媽咪喊，攪到舅父舅母都喊，我都差ｄ忍唔住．．．好唔捨得好唔捨得呀！雖然平時同舅父唔係咁多聯絡，但可能因為結婚既關係，大個女啦有自己既家咁，睇到好多野，親情唔淨止係自己為內個屋企，仲有親戚朋友，我地本身就係源自同一個家庭，流著同一種血，有著千絲萬縷既關係，好想可以咁多人一齊生活，日日都好似呢段日子咁開心，一齊食飯，食完飯就鋤下Dee、傾下計．．．唔洗面對別離之苦！我地要努力儲錢啦，希望真係有機會去到美國玩啦，太陽哥哥仲叫皓仔一定要帶佢去學玩snowboard．．．去美國滑雪，好型喎！
返到屋企大家一齊冬眠狀態，下午我就同太陽哥哥去左旺角行陣街，同埋去上海街睇下ｄ裝修野，因為我地計劃下星期一開始翻新全屋既牆，會貼返牆紙；另外，廚房同騎樓天花會鋪返瓷磚，仲有應該會換個新既洗手瓷盤連櫃仔、電視櫃、廁所門．．．需時話就話十日，希望兩個星期內攪掂啦！就係因為要整間屋，我地先冇得即刻去honeymoon呀，希望快ｄ攪掂間屋，咁就可了左件事，開開心心咁去旅行啦！
我地去左意粉屋醫肚，到夜晚我好唔舒服呀，個人好攰又冇力咁，可能連日來都好頻撲，結婚後日日都有野做，又要餞行親戚，又要送機，忙到透唔到氣，長期唔夠訓，我由星期一開始，每日都只係得幾粒鐘訓咋！加上旺角又多人，同埋行左好耐，旺角太子來回兩轉，我既極限了，所以都係快快返屋企穩陣！
tracy今晚都離開香港啦，一眾親友因為賀我結婚而回來，亦因為婚禮告一段落而逐一離開，回覆返之前的生活．．．唉，人點解要賺錢呀？人點解要為生活而工作呀？如果唔係我地就唔洗咁快要分離啦．．．我仲好傻咁諗，如果時光倒流返三個星期前就好啦，一切重新黎過，結多次婚，玩多一次！哈哈～～屋企少左舅父一家，好友走了，一切回覆平靜，頓時好失落好空虛．．．
沒有留言:
張貼留言