今日係結婚後第二日，攰到呢．．．尋日返到屋企梳洗執野，攪到成三四點先訓，未結婚前會諗，返去第一樣野實係好開心咁拆利是，但原來係唔會有力做架，攰到明知一大袋錢放係面前，都冇心冇力．．．因為我地主要係先執屋，淨係處理個簽名板同紙牌公仔都好頭痕，仲有好多濕星野！
今朝十點就被迫要起身啦，好唔願起身，好攰好攰，但都要起，因為今日都好多野做．．．先去拎回門豬，好在舅父佢地仲未出門口，可以睇下呢個傳統習俗，表弟表妹都覺得好得意，係咁影相，表弟就一路望住一路個樣好想食咁！哈哈～～
由媽媽切豬，舅父仲一齊幫手，呢個情景，對我意義好深，相信媽媽更甚呢！
很少見到舅父咁鬼馬的一面呀！
回男家部份，有頭有尾、手腳各一隻：
跟住我地就返男家食午飯，再去還禮服、還易拉架，跟住去同victor食tea、過對面海還氣球stands，攪掂完已經黃昏啦！今晚約左farewell舅父，我地先返屋企抖抖；係三號幹線回青衣途中，太陽話天上面有隻大笨象，又真係幾似喎！
返屋企就拆下禮物，呢兩份係尋晚兩個堂弟送比我架禮物，估唔到佢地咁細個就咁乖，未識搵錢都咁有心，知我結婚都會去親自揀份禮物送比我，仲帶埋黎會場，我真係好意外＋感動呀！
係一對杯＆一對鎖匙扣：
另外亦收到相簿同埋金飾擺設：
好多賀咭，有寫字既我都會特別留低！
另外想特別提下兩份好有心思既禮物，第一份係Tracy係澳洲帶返黎送比我既，個盒已經特別靚過人，入面ｄ紙條碎亦係佢親手搣架！呢份禮物其實係上星期佢已比左我架啦，不過我一路都未提過，因為我想帶去會場，同大家分享下！
紙條碎下面有內衣褲，唔通外國興送呢ｄ？哈哈！
最意外係見到呢本相簿．．．
揭開第一頁，未睇完眼淚已經流出黎．．．
再揭入去簡直嘩嘩嘩聲，因為我完全唔知Tracy點可以整到呢本相簿？！點解佢咁清楚我同太陽哥哥既故事，由相識到宜家呢刻，好多片段都出現係本相簿度，由頭重演一次咁，佢好似有我電腦個harddisk一樣，我超驚訝呀！事後問返佢，呢份禮物係佢用左好多時間，係我個blog度睇返同摷返好多好多相．．．我真係好感動，覺得佢好有心，好勁呀！比著我，我都未必做到．．．睇晒咁多entries喎，好花時間架．．．所以我都有放呢本相簿係接待處，唔知大家有冇睇到呢？
第二份係一份神秘禮物，由elsa整架，係一本結婚版紀念冊，佢好辛苦咁搵左好多會黎飲宴既來賓既相片，然後貼落一本以彩虹色紙製成既簿入面，婚宴個晚傳比來賓們簽名同寫上祝福字句！
Elsa話彩虹係好有意思既，象徵住彩虹下既約定；當講出「我願意」一刻，就表示雙方作出左一個承諾、一個約定，而彩虹亦係落雨後有太陽時會出現既天文現象；當一對夫妻甜蜜、溫馨時就會好似太陽咁，而當一對夫妻意見不合、鬧交時就好似落雨一樣；而彩虹就係大家鬧交過後，和好時出現嘅境象：雨後彩虹！
Elsa呢個安排好有心，又係令我好感動，因為我知搵咁多相係好難好難架！係花好多精神同時間，佢有係我Blog入面搵相，又麻煩一眾兄弟姐妹加化妝師 Vivian 幫手，真係辛苦啦！
今晚晚飯係餞行舅父一家，佢地黎左三個星期都未試過打邊爐，我地就去新星食喇！
終於影到一張齊人既大合照：
新星門口有個超勁爆大既月餅：
兩個鬼馬人又黎整古做怪啦！
沒有留言:
張貼留言