2007年6月7日 星期四

2007-06-07 (Thu) 自家製的泰式晚餐

今晚係期待已久的泰式晚餐,由休的媽媽一手操刀,係上次跟休去完九龍城食泰國菜時約定的,估唔到個衰仔咁上心,一路應承左我腳好返前一定整到,終於係今日安排到!

總共四道菜,冬蔭公、生菜包、鳳爪、仲有最令人期待的活蝦刺身,就係呢味菜先有今日呢個約會!我就預備地方,全冷氣開放,飲品任飲,同埋煲左煲飯!

先食活蝦刺身,點埋d秘製辣汁,嘩嘩嘩,第一個感覺係...好似呀!好似係餐廳個d味,一模一樣,勁呀!(死啦,我打到呢句,竟然係度吞咗啖口水,好為食,哈哈!)冬蔭公係我都好喜歡的其中一道泰國菜,夠晒辣,好正呀!生菜包同鳳爪都好高水準,好好好好味的一餐!希望仲有機會食...嘻嘻!下次想食炸蝦餅同咖哩呀!嘻嘻!

跟住我地打牌,好開心的一晚!多謝休!

睇到休的blog,佢對呢餐有好多感受,睇到我都好有feel:http://hk.myblog.yahoo.com/sunline-1984/article?mid=70&prev=73&next=62

睇完我都有野想講,其實休都同佢媽媽一樣,好緊張呢餐,佢係MSN已問定我每位朋友幾點到,我地幾點食好,由於難就,我話食住等,唔係好晏,點知佢話唔好,一齊食,佢計到咁岩,原來佢係夾到好仔細,佢想一整完就即係屋企拎過黎,保持最新鮮的level,就好似道活蝦刺身要用冰冰住,時間遲左d冰溶晒就唔好味了;仲有又問我食到幾辣,琪琪又食到幾辣;又備晒案話唔好咁大期望,可能會失準架...等等,係呢個過程,其實睇到佢好緊張,佢想比最好的一面我地,咪同佢媽咪心態一樣,果真兩母子!

我最深印象係佢同漢黎到我屋企,係流晒汗,成個額頭濕晒,好"令立立",真係好辛苦,睇黎佢係屋企流晒汗咁煮呢餐,熱左三個鐘...跟住一整好就"琴琴青"拎過黎,好感動呀!總之好有心,未食已食到感情啦!

休:您個blog寫得好真切,我都好感受到您個日的心情,我都好戥您開心,您個1+1+1>3理論,好正!證明成日催您係無錯啦,令您咁有意外收穫,您應該要多謝我呢個咁麻煩既姨姨!我唔介意再食過,您又再感受到family day feel啦!

 


沒有留言:

張貼留言