2007年6月6日 星期三

2007-06-06 覆診之三

今日第三次覆診,媽咪返工陪唔到我,琪琪就請了假陪我,咁岩BEN亦得閒車我去醫院,咁我就順道可以還埋輪椅同拐杖,fit到漏,真係無言感激!

醫生話我行路進步左,下個禮拜覆診前要照x-ray,如果進度理想,就可以拆針啦,好緊張!不過佢話拆針後唔代表好返同可以好似以前咁,只係因為支針已固定左舊骨,作用不大時就拆咗去,因為始終係傷口,一日係度都有容易有感染既機會;而舊骨亦未生好,所以唔係樣樣鞋都著得,連波鞋同cons都唔得,拖鞋呀,人字拖就可以!咁都好丫,人字拖我有好多呀,最開心冇左支針,我終於可以唔使再著隻核突鞋了!

最重要可以沖涼,今日一拆紗布,過左一陣,我就覺得有d臭味,我問琪琪聞唔聞到,佢話冇喎,咁我就周圍索啦,索索吓,發覺原來係我拆左紗布個隻腳臭臭呀,但我好驚訝醫生若無其事,仲徒手係我隻腳上摸黎摸去...我忍唔住講,我隻腳好臭呀!醫生就笑笑口話,係咁架,冇沖涼麻!我話上兩次都冇事...佢就話上次係兩個禮拜,今日係第三個禮拜啦,同埋夏天呢!我於是就問佢:您使唔使戴返個口罩先呀?哈哈!佢話:咁又唔使!真係笑爆咀,好頂癮!

我個針口位附近好多死皮,我其實自己都搣過吓,但始終包實晒,搣唔到,醫生好勇,拆完紗布一見到就係咁搣,我就望住d皮被佢係咁"撕"住咁擴展,仲撕到落個百足位添,醫生個樣好似冇野咁,當我係死物咁,好似唔留力咁撕,我同細妹都唔敢睇,擰"咩"面,但又真係冇痛的感覺,只係見佢咁既手勢,覺得好恐怖,話晒係我隻腳麻...睇人同我打針抽血捐血我就唔驚,仲可以眼金金咁望住,但今次揻皮,真係唔掂...

橫掂名攝影師係度,唔好"晒"左佢,我終於可以同醫生拍照留念啦!琪琪都估唔到幫我做手術的係個女醫生,所以,我覺得醫生真係後生又叻女呀!佢今日仲讚自己,話我個百足傷口埋得幾靚丫,咁樣仲唔係讚自己?嘻嘻!

不過大家望返個傷口,尤其是死皮搣左個個area,又真係唔覺開過刀喎,最重要我係由頭到尾冇戒過口,牛肉雞蛋鼓油照食可也,勁呀!

睇完醫生後約左姑媽飲茶,佢係醫院比過利是我,係時候還人情啦,點知失敗左,都係佢比左...有d唔好意思,佢山長水遠係對面海過黎同我飲茶,又要佢長輩出錢,仲有呀,我咁大個佢仲有比生日大利是我架...勁唔好意思,下次再請過佢啦!







沒有留言:

張貼留言