今日表姐同諾諾黎接我放工呀，點解？因為我地約左好今晚一齊食飯，跟住去機場接媽咪們機，但佢地十點半先到港，點hea咁耐呀？就係咁，我地就決定去迪迪尼打個轉、散個步咁，係咪好型呢？嘻嘻～～
五點半放工，返屋企換個快衫，去到迪迪尼已經天黑啦，ｄ人就走緊，我地就好似反方向咁宜家先入去玩，真係攪笑喇！
迪迪尼開始聖誕佈置啦，仲有大聖誕樹呢，不過好黑，影出黎既相質素唔好呀！表姐話十一月尾ｄ卡通人物就會換晒聖誕衫，上次因為結婚前後都好忙，冇機會同著Halloween服飾既卡通人物影相，希望今次聖誕服飾，有機會影下啦！
諾諾一黎到迪迪尼就好興奮呀，係咁指住要去玩"Owl 船船"，即係小小世界，因為架船一入去就會見到一隻貓頭鷹架！
ｄ發光氣球好靚呀，尤其是係夜晚，但百二蚊一個，實在太貴啦！
黎到小小世界啦～～
恩恩都要同諾諾影～～
成個場都冇人，得我地自己玩，梗係啦，七點就放煙火，所有遊戲都會close，宜家已經六點八啦！
雖然唔係第一次玩小小世界，但太陽同月亮都係今次先發現，原來小小世界入面有晒太陽哥哥同月光妹妹架，唔怪之諾諾咁鐘意玩啦！哈哈～～
因為全個場一個人都無，我地玩完一次後，就要求唔起身再玩多一轉，工作人員開頭話唔得架，要係出口出完，再係入口入過黎排隊架．．．下，但咁"兜"法，行咁多冤枉路，好攰啫，大家都知迪迪尼排隊個area係幾咁大都兜幾咁多路架啦．．．我地做出好陰功既面容，最後．．．工作人員帶左我地行shortcut，一落船個位有條樓梯，上幾級後有架lift，搭lift落去一開口，就係上船個度！原來只係幾級樓梯之隔，不過工作人員話唔可以比其他人見到架！嘻嘻～～
玩左兩轉小小世界後，未出到黎已聽到boom boom聲，已經七點夠鐘放煙花啦！
每次睇煙花都係坐係城堡前睇，未試過企係呢個位睇，原來係呢度睇，ｄ煙花係勁大個，亦係勁大聲架！左邊出完就到右邊，睇時就冇好似係城堡前睇個full picture咁喇，要左右咁望！遠處仲見到好大煙呢，好似探險咁架！真係勁大聲同勁大個煙花係頭頂出現，煙花boom完變晒煙，有ｄ似打緊仗／外星侵襲地球咁架，不過係靚版，因為ｄ煙花係由下而上，而唔係從天而降！哈哈～
boom到咁大聲，諾諾全程冚住耳仔！
放完煙火都冇遊戲玩架啦，行左陣商店，我地就出發去機場，我地揀左食味千拉麵，等埋表姐夫同威哥黎一齊食！
我地四個大人，竟然叫左個四人餐加二人餐，一共有五個麵加七個小食！全部食晒呀～～
去迪迪尼之前，我特登係屋企雪櫃拎左ｄ野比諾諾，就係．．．益力多喇！諾諾兩歲前，表姐都冇比諾諾食過／飲過小食／零食個ｄ非健康食品，一來想諾諾健康ｄ，二來唔想諾諾好似一ｄ小朋友咁，細細個就扭計要飲汽水，又或者正餐又扭計要食零食而唔肯食飯；過左兩歲生日後，表姐先開始比諾諾試我地人類既人間美食！人生既第一支多多，就係恩恩比諾諾飲架啦，極之珍貴，好值得紀念呢！諾諾開頭飲完第一啖，少少皺眉，可能少少酸，但跟住就一路飲一路話好好味啦，仲係兩個"好"字呢！
食完飯後我地就陪諾諾周圍行下，睇佢對呢個information area既單張幾有興趣！
跟住又同威哥一齊打機，諾諾對畫面既動畫好好奇呢！
諾諾自己擺甫士叫恩恩影～～
仲有時間，我地玩完一輪又去食野，去左許留山食甜品！
時間岩岩好，一食完就見到姑媽出黎啦！
跟住到我媽咪同兩位aunties都出黎啦，臨別時我梗係要幫四大美人影返張團體相留念先啦！
返到屋企，我就將自己平時去旅行既習慣，按在係媽咪身上，叫佢拎晒ｄ戰利品出黎，幫佢影張大豐收相先！呢度足足攪左半個鐘先排好晒呢，好壯觀吧？勁呀！
我同威哥都要影一張先！因為當時已接近十二點，影完後我就拿拿林閃啦，聽日仲要返工丫麻！不過我沖完涼後，就：哎呀，排得咁辛苦，唔記得幫媽咪再每類黎個close up添！因為成張相實睇唔清楚，尤其是媽咪ｄmonchichi 戰利品呀！好失望呢．．．
媽咪買左好多野食返黎，當然都有分比我啦，除左食，以下呢個shiseido眉拑真係值得一讚！其實係琪琪叫媽咪買既，我知道後搭單又要一支啫，因為琪琪話係佢用過既no.1最好用眉拑喎！我即刻試下啦，真係super good架，不過香港冇得買，想要就要係日本入貨啦！
沒有留言:
張貼留言