今朝九點就起身啦，真係辛苦，冇計啦，為左要探正灝BB，早少少起身啦！正灝BB係同事Sherry既新生小男孩，本來今日我冇諗住去既，一來星期日早上會返教會，二來真係好遠；不過最後都係臨時決定去啦，咁就較定鬧鐘起身，不過都係床度"典"左好耐先起身！
我地約左十一點係馬鞍山飲茶，順道跟好久不見既舊同事黎個短聚；我第一次搭馬鐵，影低我既第一次先～～
係大圍一上馬鐵月台，竟然撞到Yammy，就係佢陪我搭呢程第一次既馬鐵喇！
我地係Exit A 出閘：
去左馬鞍山廣場既美心飲茶～～
好少酒樓仲有推車仔，我好開心咁出去揀食物，因為好肚餓呢！(呢度只係部份食物!)
多謝Jimmy-san請我地飲呢餐茶！
跟住我地去左屈臣氏買禮券，再搭小巴去Sherry係嘉華星濤灣既屋企！
嘉華星濤灣隔離個曉峰灣畔，原來就係Jimmy-san 屋企，好近呀！
呢度好high呀，連搭lift都有電視睇呀！
Sherry屋企的chip n dale電話座：
露台靚景：
去搵小主角先～～張BB床成個禮物籃咁，好可愛，一見就知係囝啦！哈哈～～
正灝BB正在熟睡中，手指全部張開晒，冇楂實拳頭，應該好relaxed好有安全感呢！
成個指揮家咁！嘻嘻～～
我貪得意，將放係床角既pooh pooh搖鈐，放係佢隻手上影相！哈哈～～
醒啦醒啦～～有雙眼皮架！！
腳仔＋手仔寫真～～手指仔同腳趾仔都好長呀，第時係咪應該要學彈琴呢？！
同事們輪流抱住正灝BB拍照：
個個輪住抱完影晒相，正灝BB都冇喊過一聲，證明大家手摯都唔錯，可以做合資格爸爸媽媽啦！嘻嘻～～趁正灝BB仲未訓返，快快影埋大合照先！正灝BB一ｄ都冇扭計，真係非常合作！
一眾女士都淨係掛住望住正灝BB～～
媽媽親自抱：
Uncle Bread話要一張同爸爸媽媽一齊影既～～
大約一點九我地就走啦，因為我同Jimmy-san都有野做，佢楂開車去荃灣，我梗係黐埋啦！出城隧口時，見到三車交通意外！
我約左媽咪兩點半一齊係荃灣剪頭髮，我就焗油＋剪髮，媽咪就染髮＋焗油＋剪髮，我攪掂時都五點半，太陽哥哥剛收工黎到，佢都要剪髮呀！為爭取時間，我自己去左換燈膽同上旅行社．．．途經"阿升麵線"，香噴噴，勁似呀宗陣味，自己一個未必食得晒都要買碗黎試下！
麵線似呀宗，豬腸都似呀宗呀，好味過旺角間呀土呢！要回味台灣的呀宗，呀升的確係不錯既選擇，我竟然可以自己一個成碗隊晒呢！
等埋太陽哥哥攪掂後都成八點，太陽哥哥又掛住山形大粟拉麵，就去左味千食！點知．．．落order時話暫時冇山形大粟拉麵，所以太陽哥哥一幅唔開心既樣喇！
我想試下捨拉麵取咖喱飯，就叫左個咖喱蝦餅飯，呢次果然係good try，個咖喱飯幾好食丫！
經過呢兩日去旅行社拎資料＋商討，我地初步有個打算，由於時間只得返兩星期唔夠，加上報其他已成團既南非團好唔抵，因為相差成三千蚊一位，唔甘心被佢控制我地．．．報其他團又怕到時又唔成團仲冇時間轉其他野．．．於是我地初步打算去個東南亞旅程，跟住出年四月尾鐵定約Tracy去紐西蘭玩，因為Tracy之前都問過我架，佢個兩個禮拜一定要放假，想去紐西蘭玩，問我有冇興趣，只係當時我覆佢去左南非honeymoon，冇咁快儲到咁多錢又去紐西蘭，但紐西蘭同南非，其實都係我同太陽哥哥想去既地方，尤其是紐西蘭，好想玩sky diving呀！既然今次同南非無緣，四月去紐西蘭又係一個集天時地理人和於一身既好選擇！因為講到最開頭，我地係最想去紐西蘭既，只可惜我同太陽哥哥都係一ｄ唔識策畫自由行既人，問過跟團去紐西蘭又冇得玩sky diving喎，最後就揀左第二選擇跟團去南非喇！咁如果同埋Tracy去紐西蘭，就有專人計劃，又唔洗跟團，真係非常正架！
至於今次呢個東南亞旅程，條件已經由初先大家都未踏足過既國家，改為大家都未一齊踏足過既地方．．．當中有兩個大不同架，唔知大家睇唔睇得出呢？哈哈～～
跟團方面，我地睇過一ｄ成左既東南亞團，包括汶萊＋沙巴、越南、印度、韓國，但都麻麻地，我地唔鍾意齋睇景，又唔好陽光海灘，所以較為最好係韓國了；雖然我地都各自去過兩次，但都符合左其中一個原則 - 未一齊去過！
韓國呢團幾特別，唔似以前去開個ｄ團種，所以先吸引到我，因為佢有ｄ整石頭飯、天文望遠鏡星之旅程、住小木屋、餵羊剪羊毛、teddy bear 館．．．呢ｄ係我以前去過既團無既！
而自己行方面，成個地球咁多國家地方，我估我地只係有信心去到中國、泰國、台灣！中國一定唔會諗啦，泰國又唔合原則，唯有台灣啦．．．但台北我地已各自去過四次都有，有兩次仲係一齊去既．．．咦，咁不如台南台中丫，未去過喎！所以台南台中亦係一個可考慮既選擇，只可惜我地連高雄、花蓮、宜蘭、墾丁．．．係台南台中邊忽都未攪清，好好笑啫！今日同Jimmy-san飲茶時，佢就大約畫左呢個台灣地勢我知喇！等我同太陽哥哥呢幾日認真諗下點先得～～
沒有留言:
張貼留言