尋日放假一天，一來近來好攰，想休息下訓耐ｄ；二來今天媽咪會去日本旅行，就當係旅行前夕陪下佢，比佢見多我幾面啦！
媽咪見我咁乖，都有好野益我，就係．．．呢個樽．．．
打開．．．咩黎架？
其實入面係紅色蓋個細樽，放左係雪櫃度！其實白色個大樽，係用黎整Home-made Yogurt架！
打開．．．嘩！好似呀！仲係香蕉味，一聞就聞到！媽咪好勁呀！
質感跟真Yogurt一模一樣，不過"杰"左少少，媽咪下次會唔整咁"杰"架啦！其實，我一路食時，一路諗起諾諾，因為我記得佢好鍾意食香蕉味既baby yogurt！
媽咪仲將佢ｄ材料晒冷比我睇！
原來媽咪仲開始整緊蛋糕仔，威哥已經試過；但我前排好忙，日日都好晏先返到屋企，所以媽咪冇比我試呀！
尋日放假，除左食Yogurt外，媽咪仲陪我行左千色店，買左個不秀鋼碗盤架，好重呀，拎到我．．．好似被人fit完咁，真係師奶唔易做呀！
旅行前夕，媽咪整左頓豐富晚餐比我地，有鹽焗雞脾雞翼，仲有雲吞雞湯煲，唔洗問，當然好正好好味啦！
到今朝，晨早六點起身．．．
送媽咪～～順便一齊嘆返個醒神早餐！威哥同媽咪就醒神啦，我就慘喇，食完就要返工，今晚仲要PT，直踩十六個鐘呀！
您話我點唔殘丫．．．
食完早餐後，威哥竟然人有三急，要返屋企辦大事，唯有我幫媽咪托行李，送佢上車啦！送媽咪上機場巴士後，我就返工啦～～
睇媽咪笑得幾開心燦爛～～
媽咪架巴士開走後，我竟然有ｄ想喊呀，好唔捨得佢．．．因為咁大個女，通常都係自己去旅行玩，同媽咪拜拜；但今次係媽咪同我拜拜．．．我結婚致謝時都講過，咁多年黎，媽咪將最好既野比晒我地，自己咩都冇都冇所謂，所以咁多年黎，佢都極少有多餘錢去旅行，最上一次都係我同琪琪出錢，幾年前一家去左個超值泰國團咋；而再上一次去旅行，已經係十幾年前啦．．．媽咪真係好錫我地，個下突然好感觸．．．覺得佢咁大個人，都未點樣享受過人生，今次難得夾到同朋友姑媽一齊去旅行，我都好戥佢開心，希望媽咪開開心心咁享受呢個旅程！我有能力的話，係未來既日子，我都好想可以同媽咪一齊去下旅行！而今次我唯一既能力，就係同太陽哥哥封左封大利是比媽咪，當pocket money又好，當sponsor團費又好，都幾可觀架，媽咪收到都好開心呢，算係我地一點心意吧！
沒有留言:
張貼留言